சிறைக்கு அழைத்துச்செல்லும் போது, ஞானசாரர் குறிப்பிட்ட விசயங்கள்

- எப்.அய்னா -

பொது­பல சேனா அமைப்பின் தலைவர் கல­கொட‌ அத்தே ஞான­சார தேரர் இஸ்­லாத்தை அவ­ம­தித்­தமை தொடர்பில் குற்­ற­வா­ளி­யாக காணப்­பட்டு தண்­டனை அளிக்­கப்­பட்­டுள்­ளது. ஞான­சார தேர­ருக்கு எதி­ராக கொழும்பு குற்­றத்­த­டுப்பு பிரி­வினால் இந்த விவ­கா­ரத்தில் வழக்கு தாக்கல் செய்­யப்­பட்­டி­ருந்­தது. அவ்­வ­ழக்கின் இறு­தி­யி­லேயே ஞான­சார தேர­ருக்கு 9 மாத கால சிறைத் தண்­டனை விதிக்­கப்­பட்­டது. அத்­துடன் 1500 ரூபா அப­ரா­தமும் செலுத்த உத்­த­ர­வி­டப்­பட்­டுள்­ளது. இவ்­வ­ழக்கின் தீர்ப்பு கடந்த‌ 9 ஆம் திகதி கொழும்பு மேல­திக நீதிவான் பசன் அம­ர­சே­ன‌வால் அறி­விக்­கப்­பட்­டது. குறித்த தீர்ப்பு ஏற்­க­னவே மூன்று முறை ஒத்தி வைக்­கப்­பட்ட நிலையில் கடந்த‌ 9ஆம் திகதி, தீர்ப்­ப­றி­விப்­ப­தற்­காக‌ கொழும்பு மேல­திக நீதவான் பசன் அம­ர­சேன முன்­னி­லையில் விசா­ர­ணைக்கு அழைக்­கப்­பட்­டி­ருந்­தது.

அதற்கு முன்­னைய வழக்கு திக­தியில் மன்றில் ஞான­சார தேரர் ஆஜ­ரா­காமல் இருந்த போதும், 9 ஆம் திகதி பிர­தி­வா­தி­யான ஞான­சார தேரர் மன்றில் ஆஜ­ரா­கி­யி­ருந்தார்.

இஸ்லாம் ஒரு புற்று நோய் என ஞான­சார தேரர் வெளி­யிட்ட கருத்­துக்கு எதி­ராக கொழும்பு குற்றத் தடுப்புப் பிரிவில் பொரளை ஜும்ஆ பள்­ளி­வாசல் நிர்­வாக சபை உறுப்­பினர் ரிகாஸ் முன் வைத்த முறைப்­பாட்­டுக்கு அமைய, கொழும்பு பிர­தான நீதிவான் நீதி­மன்றில் மேல­திக நீதிவான் (3 ஆம் இலக்க அறை) முன்­னி­லையில் வழக்குப் பதிவு செய்­யப்­பட்­டுள்­ளது.

கடந்த 2016 ஜூலை 8, அன்று நடை­பெற்ற செய்­தி­யாளர் சந்­திப்பின் போது, ​​இஸ்லாம் தொடர்­பான அறிக்கை மத நல்­லி­ணக்­கத்தை மீறு­வ­தா­கவும், அதன்­படி, குற்­ற­வியல் சட்­டத்தின் 291 (பி) பிரிவின் கீழ் தண்­ட­னைக்­கு­ரிய குற்றம் இழைக்­கப்­பட்­ட­தா­கவும் குற்றம் சாட்டி இந்த வழக்கு தாக்கல் செய்­யப்­பட்­டது.

இந்த வழக்கில் சாட்சி விசா­ர­ணைகள் ஆரம்­பிக்­கப்­பட்­டு, முறைப்­பாட்­டாளர் தரப்பின் சாட்­சி­யாளர் உள்­ளிட்ட சாட்­சி­யா­ளர்கள் நீதி­மன்றில் சாட்­சி­ய­ம­ளித்­துள்­ளனர்.

இவ்­வா­றான நிலையில், குறித்த வழக்கை சுமு­க­மாக முடித்­துக்­கொள்ளும் நோக்கில் தனது சேவை பெறுநர் நீதி­மன்றில் பகி­ரங்க மன்­னிப்புக் கோர தயா­ராக இருப்­ப­தாக ஞான­சார தேரரின் சட்­டத்­த­ரணி காமினி அல்விஸ் நீதி­மன்­றுக்கு அறி­வித்­தி­ருந்­தார்.

இவ்­வா­றான நிலையில் சாட்சி விசா­ர­ணைகள் நிறை­வ­டைந்த நிலையில், முறைப்­பாட்டில் முன்­வைக்­கப்­பட்ட குற்­றச்­சாட்டை நிரூ­பிப்­ப­தற்­கான ஆதா­ரங்கள் முன்­வைக்­கப்­ப­டாத நிலையில், குற்­றம்­சாட்­டப்­பட்­ட­வரை விடு­தலை செய்­யு­மாறு சிரேஷ்ட சட்­டத்­த­ரணி காமினி அல்விஸ் நீதி­மன்றில் கோரினார்.

இவ்­வா­றான நிலை­யி­லேயே குறித்த வழக்கின் தீர்ப்பு 9 ஆம் திகதி அறி­விக்­கப்­பட்­டது.

இந்த வழக்கில் பாதிக்­கப்­பட்ட தரப்­புக்­காக சிரேஷ்ட சட்­டத்­த­ரணி சிராஸ் நூர்தீன் ஆஜ­ரானார்.

திறந்த மன்றில் தீர்ப்பை அறி­வித்த நீதிவான் பசன் அம­ர­சேன‌, அர­சி­ய­ல­மைப்பின் 10வது உறுப்­புரை, ஒருவர் விரும்பும் எந்­த­வொரு மதத்­தையும் அல்­லது நம்­பிக்­கை­யையும் பின்­பற்­று­வ­தற்­கான சுதந்­தி­ரத்தை அடிப்­படை மனித உரி­மை­யாக உறுதி செய்­துள்­ளது. அதன்­படி, முஸ்­லிம்கள் தங்கள் மதத்தில் நம்­பிக்கை கொள்ள முழு உரி­மையும் அவர்­க­ளுக்கு உண்டு என்று நீதிவான் தனது தீர்ப்பை அறி­வித்து குறிப்­பிட்டார்.

“கடந்த 2016 ஜூலை 8 ஆம் திகதி அன்று கொழும்பில் நடை­பெற்ற செய்­தி­யாளர் சந்­திப்பில் பிர­தி­வா­தி­யான ஞான­சார தேரர் தெரி­வித்த சில கருத்­துக்கள் முஸ்­லிம்­களின் மத நம்­பிக்­கை­களை அவ­ம­தித்­த­தாகக் கூறி இந்த வழக்கு தாக்கல் செய்­யப்­பட்­டது. அர­சி­ய­ல­மைப்பின் விதிகள் மற்றும் தண்­டனை சட்டக் கோவையின் 291 (அ) பிரிவின் படி, மத நம்­பிக்­கை­களைப் புண்­ப­டுத்தும் வகையில் செயல்­பட முடி­யாது. முஸ்­லிம்­களின் மத நம்­பிக்­கைகள் அவ­ம­திக்­கப்­பட்­டுள்­ளமை பிர­தி­வாதி தொடர்­பு­டைய ஊடக மாநாட்டில் வெளி­யிட்ட கருத்­துக்கள் ஊடாக‌ தெளி­வாகத் தெரி­கி­றது. அந்த கருத்­துக்கள் அலட்­சி­யத்தால் செய்­யப்­பட்­டவை அல்ல, மாறாக பிர­தி­வா­தியால் வேண்­டு­மென்றே வெளி­யி­டப்­பட்­டன என்­பதும் தெளி­வா­கி­றது. அதன்­படி, பிர­தி­வாதி வேண்­டு­மென்றே தொடர்­பு­டைய இந்த குற்­றத்தைச் செய்­த­தாக வழக்கு விசா­ர­ணையில் நிரூ­பிக்­கப்­பட்­டுள்­ளது அதன்­படி, பிர­தி­வா­திக்கு எதி­ரான குற்­றச்­சாட்­டுகள் நியா­ய­மான சந்­தே­கத்­திற்கு இட­மின்றி முறைப்­பாட்­டாளர் தரப்பால் நிரூ­பிக்­கப்­பட்­டுள்­ளது. அதனால் பிர­தி­வா­தியை குற்­ற­வாளி என இந்த நீதி­மன்றம் தீர்­மா­னிக்­கின்­றது.’ என நீதிவான் பசன் அம­ர­சேன‌ அறி­வித்தார்.

ஞான­சார தேரரை குற்­ற­வாளி என நீதிவான் அறி­வித்த போது, ​​கூண்டில் நின்­றி­ருந்த அவர், திறந்த நீதி­மன்றில் பேசினார். “கனம் நீதிவான் அவர்­களே… நான் ஒரு பௌத்த துறவி. நான் சுமார் இரு­பது ஆண்­டு­க­ளாக இஸ்­லா­மிய அடிப்­ப­டை­வாதம் பற்றிப் பேசி வரு­கிறேன். ஒவ்­வொரு நாளும் இப்­ப­டியே இருக்க முடி­யாது. அதற்கு என்னை உட­ன­டி­யாக கொன்­று­வி­டுங்கள்..’ என குறிப்­பிட்டார்.

இதற்கு பதி­ல­ளித்த நீதிவான், தனது முடிவில் திருப்தி அடை­ய­வில்லை என்றால், மேன்­மு­றை­யீடு செய்ய வாய்ப்­பி­ருப்­ப­தாக கூறினார்.

அதன் பின்னர், ஞான­சார தேரர் சார்­பாக மன்றில் சட்­டத்­த­ரணி இரோஷ் சென­வி­ரத்­ன­வுடன் ஆஜ­ரான சிரேஷ்ட சட்­டத்­த­ரணி காமினி அல்விஸ், ஞான­சார தேர­ருக்கு இலகு தண்­டனை ஒன்­றினை அளிக்­கு­மாறும் அவர் மீண்டும் சமூ­கத்தில் ஒன்­றி­ணை­வ­தற்கு அது ஏது­வாக அமைய வேண்டும் எனவும் கோரினார்.

அனைத்து தரப்­பி­னரின் வாதங்­க­ளையும் பரி­சீ­லித்த பின்னர், நீதிவான் ஞான­சார தேர­ருக்கு 9 மாத­ கால சிறை­த்தண்­ட­னையும் 1500 ரூபா அப­ரா­தமும் விதித்தார்.

இத­னை­ய­டுத்து பிர­தி­வாதி சார்பில் ஆஜ­ரான சட்­டத்­த­ரணி காமினி அல்விஸ், இந்த முடிவை எதிர்த்து மேல்­மு­றை­யீடு செய்ய உள்­ள­தாக நீதி­மன்­றத்தில் தெரி­வித்தார்.

அதன்­படி கொழும்பு மேல் நீதி­மன்­றிலும் மேன் முறை­யீடு தாக்கல் செய்­யப்­பட்­டது. இத­னை­ய­டுத்து நீதிவான் நீதி­மன்றின் தீர்ப்­புக்கு எதி­ராக கொழும்பு மேல் நீதி­மன்றில் மேன் முறை­யீடு செய்­துள்­ளதை மையப்­ப­டுத்தி, தீர்ப்­ப­ளித்த கொழும்பு மேல­திக நீதிவான் பசன் அம­ர­சிங்­க­விடம் பிணை விண்­ணப்பம் முன் வைக்­கப்­பட்­டது.

ஞான­சார தேரர், முதுகுப் பகு­தியில் ஏற்­பட்­டுள்ள உபா­தைக்கு ஸ்ரீ ஜய­வர்­த­ன­புர வைத்­தி­ய­சா­லையில் சிகிச்சை பெறு­வது பிணை கோரிக்­கைக்­கான விஷேட கார­ணி­யாக முன் வைக்­கப்­பட்­டது. இத­னை­விட 9 மாத கால சிறை என்­பது சிறைச்­சாலை நாட்­காட்டி பிர­காரம் சுமார் 6 மாதங்கள் வரை குறைந்த காலத்தை கொண்­டது எனவும், அது மேன் மு­றை­யீட்டு நட­வ­டிக்­கைக்கு சென்று நிவாரணம் பெற்­றுக்­கொள்­வ­தற்கு போது­மான காலம் அல்ல என்­பதால், அத­னையும் விஷேட கார­ணி­யாக கருதி பிணையில் ஞான­சார தேரரை விடு­விக்­கு­மாறு, அவர் சார்பில் மன்றில் ஆஜ­ரான சிரேஷ்ட சட்­டத்­த­ரணி காமினி அல்விஸ் கோரினார்.

இதன்­போது ஞான­சார தேர­ருக்கு சிறையில் உயிர் அச்­சு­றுத்தல் இருப்­ப­தா­கவோ வேறு கார­ணி­களோ இருக்­கின்­ற‌­னவா என நீதிவான் ஆராய்ந்தார். இதன்­போது அவ்­வாறு எந்த அச்­சு­றுத்­தலும் இல்லை என உறுதி செய்த நீதிவான், ஞான­சார தேர­ருக்கு சிகிச்சை பெறும் நட­வ­டிக்­கை­களை சிறையில் இருந்து முன்­னெ­டுக்க முடியும் எனவும், மேன் முறை­யீட்டு நட­வ­டிக்­கை­க­ளையும் அங்­கி­ருந்து முன்­னெ­டுக்க பாதிப்பு இல்லை எனவும் சுட்டிக்காட்டி, பிணை கோரிக்கையை நிராகரித்தார்.

அதன்படி, கலகொட அத்தே ஞானசார தேரர் சிறைத் தண்டனை கைதியாக வெலிக்கடை சிறைச்சாலைக்கு அழைத்துச் செல்லப்பட்டார்.

அவரை சிறைச்சாலைக்கு அழைத்துச் செல்லும் போது, சிறைச்சாலை பஸ் வண்டி அருகே ஊடக வியலாளர்களை நோக்கி, கருத்து தெரிவித்த ஞானசார தேரர் தெரிவித்த விடயங்கள் , தான் கூறிய கருத்துக்கள் தொடர்பில் பச்சாதாபப்படுவதை வெளிப்படுத்தவில்லை. மாற்றமாக உயிர்த்த ஞாயிறு தாக்குதல்களை மீண்டும் ஒருமுறை ஒட்டுமொத்த முஸ்லிம்கள் மீதும் பழி சுமத்தும் விதமான கருத்துக்களையே ஞானசார தேரர் வெளிப்படுத்தியதை அவதானிக்க கூடியதாக இருந்தது.- Vidivelli