பிரதமருக்கு கற்றுக்கொடுக்கத் தயார் - ரணில்

அமைச்சரவையில் பணியாற்றுவதற்கு அதிகாரிகளின் அங்கீகாரம் அவசியம் என பிரதமர் ஹரிணி அமரசூரிய கூறியதாக தெரிவித்த முன்னாள் ஜனாதிபதி ரணில் விக்ரமசிங்க அரசியலமைப்பு குறித்து பிரதமர் கற்றுக் கொள்ள விரும்பினால் அதனை கற்றுக்கொடுக்க முடியும் என தெரிவித்துள்ளார்.

குருணாகலை - பன்னல பிரதேசத்தில் வைத்து ) முன்னாள் ஜனாதிபதி மேற்கண்டவாறு குறிப்பிட்டுள்ளார்.

அத்தோடு, அரச சேவையில் நிலவும் சம்பள முரண்பாடுகளை நீக்குவதற்காக தாம் நியமித்த உதய ஆர்.செனவிரத்ன நிபுணர் குழுவில் தற்போதைய ஜனாதிபதி அநுர குமார திஸாநாயக்கவின்  பொருளாதார ஆலோசகர் துமிந்த ஹுலங்கமுவவும் அங்கம் வகித்ததாக ரணில் குறிப்பிட்டுள்ளார்.

இதேவேளை, அரச ஊழியர்களின் சம்பள முரண்பாடுகள் நீக்கப்பட்டு, அனைத்து அதிகாரிகளுடனும் கலந்தாலோசித்து, அமைச்சரவையின் அங்கீகாரம், அமைச்சரவை தீர்மானம் மற்றும் அமைச்சரவைப் பத்திரம் என்பனவற்றைப் பெற்று முறையான முறையில் உரிய சம்பளம் அதிகரிக்கப்பட்டதாகவும் முன்னாள் ஜனாதிபதி சுட்டிக்காட்டியுள்ளார்.

மேலும், சம்பளத்தை அதிகரிப்பது மற்றும் செனவிரத்ன குழுவின் நியமனம் தொடர்பான ஆவணமும் ஊடகங்களுக்கு வெளியிடப்பட்டதாக ரணில் தெரிவித்துள்ளார்.

இந்த நிலையில், அரச உத்தியோகத்தர்களின் சம்பள அதிகரிப்பை வழங்குவதற்கு அரசாங்கத்திற்கு திறமை இருப்பதாக தெரிவித்த முன்னாள் ஜனாதிபதி, உரிய சம்பள அதிகரிப்பை உடனடியாக வழங்குமாறு அரசாங்கத்தை வலியுறுத்துவதாகவும் கூறியுள்ளார்.