இஸ்ரேலியர்களுக்கு அச்சுறுத்தல் - முன்னரே தகவல் கிடைத்தும், அரசாங்கம் நடவடிக்கை எடுக்காதது ஏன்..?

இலங்கையின் அறுகம் குடா பகுதியில் இஸ்ரேலிய சுற்றுலாப் பயணிகள் மீது தாக்குதல் நடாத்தப்படக்கூடிய அச்சுறுத்தல்கள் குறித்து ஒக்டோபர் 07 ஆம் திகதிக்கு முன்னர் தகவல் கிடைத்த போதிலும் தற்போதைய அரசாங்கம் அது தொடர்பில் நடவடிக்கை எடுக்காமல் இருந்தது குறித்து முன்னாள் அமைச்சர் காஞ்சன விஜேசேகர கவலை வெளியிட்டுள்ளார். 

எச்சரிக்கப்பட்ட தாக்குதல்கள் பற்றிய தகவல்கள் தொடர்பாக முன்னெடுக்கப்பட்ட நடவடிக்கைகள் குறித்து வெளிநாட்டு இராஜதந்திர அதிகாரிகளுக்கு அரசாங்கம் ஏன் விளக்கமளிக்கவில்லை என்று காஞ்சன தனது எக்ஸ் பக்கத்தில் கேள்வி எழுப்பியுள்ளார்.

"தேசிய பாதுகாப்புக்கு ஏற்படும் அச்சுறுத்தலை ஒருபோதும் சாதாரணமாக எடுத்துக் கொள்ளக்கூடாது, சுற்றுலா வருமானம் நாட்டின் மிக முக்கியமான வருமான ஆதாரங்களில் ஒன்றாகும்" என்று காஞ்சன விஜேசேகர கூறினார். 

அரசாங்கத்திடம் முன்கூட்டியே தகவல் இருந்திருந்தால் மற்றும் இராஜதந்திர தூதரகங்களுக்கு அது பற்றி விளக்கியிருந்தால், எடுக்கப்பட்ட முன்னெச்சரிக்கை நடவடிக்கைகளின் அடிப்படையில் இலங்கைக்கான பயண ஆலோசனை எச்சரிக்கையை தடுத்திருக்கலாம் என்று அவர் சுட்டிக்காட்டினார். 

"அரசாங்கம் குறைந்தபட்சம் இப்போது இராஜதந்திர தூதரகங்கள் மற்றும் பாதுகாப்பு அதிகாரிகளுடனான ஒரு கூட்டத்திற்கு அழைப்பு விடுக்க வேண்டும், எடுக்கப்பட்ட நடவடிக்கைகள் குறித்து அவர்களுக்கு விளக்க வேண்டும் மற்றும் இலங்கைக்கான பயண ஆலோசனையை நீக்க வெளிநாட்டு தூதரகங்களுடன் இணைந்து செயல்பட வேண்டும்" என்று முன்னாள் அமைச்சர் மேலும் கூறினார்.