பெரும் பாதிப்புக்குள்ளாகியுள்ள அரபுக் கல்லூரி மாணவர்கள் - ஏன் இந்த அநீதி..?
(ஏ.ஆர்.ஏ.பரீல்)
பரீட்சைத் திணைக்களம் வருடாந்தம் நடத்தி வந்த அல்ஆலிம் பரீட்சை உயிர்த்த ஞாயிறு குண்டுத் தாக்குதல்களின் பின்பு நிறுத்தப்பட்டுவிட்டதால் அரபுக் கல்லூரி மாணவர்கள் பெரும் பாதிப்புக்குள்ளாகியுள்ளனர்.
குறிப்பிட்ட அல்ஆலிம் பரீட்சை இறுதியாக 2018ஆம் ஆண்டு நடத்தப்பட்டது. 2019ஆம் ஆண்டு உயிர்த்த ஞாயிறு தாக்குதல் நடத்தப்பட்டதன் பின்பு, தாக்குதலுடன் தொடர்புபட்டவர்களில் பலர் அல்ஆலிம் பட்டம் பெற்றவர்கள் எனக் கண்டறிந்த அரசாங்கம் அப்பரீட்சையை நடத்தாமலிருக்க தீர்மானித்ததாகத் தெரியவருகிறது.
2019 முதல் இன்று வரை அல்ஆலிம் பரீட்சை நடத்தப்படாமலிருப்பதற்கு அல்ஆலிம் பரீட்சைக்கு பயிலும் மாணவர்களுக்கு ஒழுங்கான பாடத் திட்டம் அமுலில் இல்லை என்றே காரணம் கூறப்பட்டு வந்துள்ளது. சம்பந்தப்பட்ட அதிகாரிகள் இந்தக் காரணத்தையே தெரிவித்துள்ளனர்.
இவ்விவகாரம் தொடர்பில் பாதுகாப்பு தரப்பினர் ஏற்பாடு செய்த கலந்துரையாடல்கள், பாராளுமன்ற தெரிவுக் குழு கூட்டங்களில் அகில இலங்கை ஜம்இய்யத்துல் உலமாவின் பிரதிநிதிகள், முஸ்லிம் கல்விமான்கள், முஸ்லிம் பாராளுமன்ற உறுப்பினர்கள் எடுத்துக் கூறியும் உரிய நடவடிக்கைகள் முன்னெடுக்கப்படவில்லை.
இது தொடர்பில் அகில இலங்கை ஜம்இய்யத்துல் உலமாவின் கல்விப் பிரிவு செயலாளர் அஷ்ஷெய்க் எம்.எஸ்.எம். நாளிமை விடிவெள்ளி தொடர்பு கொண்டு வினவியபோது அவர் பின்வருமாறு தெரிவித்தார்.
‘கல்வி அமைச்சு மற்றும் பரீட்சை திணைக்களத்தின் அதிகாரிகளுடன் பல கட்ட பேச்சுவார்த்தைகள் நடத்தியும் இதுவரை அல்ஆலிம் பரீட்சைக்கான ஏற்பாடுகள் முன்னெடுக்கப்படவில்லை. கல்வி அமைச்சினால் சமய ஆலோசனை சபையின் கூட்டமொன்று அண்மையில் நடைபெற்றது. அந்தக் கூட்டத்திலும் பரீட்சைக்கான பாடத் திட்டம் தொடர்பில் வினவப்பட்டது. அல்ஆலிம் பரீட்சைக்கான பாடத்திட்டம் சம்பந்தப்பட்ட தரப்புக்கு ஏற்கனவே கையளிக்கப்பட்டு விட்டதாக முஸ்லிம் சமய பண்பாட்டலுவல்கள் திணைக்களத்தின் பணிப்பாளர் தெரிவித்தார். இக்கூட்டத்தில் சமய ஆலோசனை சபையில் அங்கம் வகிக்கும் அகில இலங்கை ஜம்இய்யத்துல் உலமா சபையின் பிரதிநிதிகளும் கலந்துகொண்டார்கள்.
கல்வி அமைச்சரின் தலைமையில் நடைபெற்ற இக்கூட்டத்தில் அல்ஆலிம் பரீட்சை நடத்துவது பற்றிய தீர்மானத்தை விரைவில் அறிவிப்பதாக அதிகாரிகளினால் தெரிவிக்கப்பட்டது. ஆனால் இதுவரை எதுவித பதிலும் வழங்கப்படவில்லை.
தற்போது ஐந்து வருட காலமாக அல்ஆலிம் பரீட்சையை நடத்தாது நிறுத்தி வைத்திருப்பது மாணவர்களுக்கு பெரும் பாதிப்பை ஏற்படுத்தியுள்ளது என்றார்.
இவ்விவகாரம் தொடர்பில் அகில இலங்கை மக்கள் காங்கிரஸின் தலைவரும் பாராளுமன்ற உறுப்பினருமான ரிசாத் பதியுதீன் பாராளுமன்றத்தில் இது தொடர்பில் சுட்டிக்காட்டியிருந்தமை குறிப்பிடத்தக்கது.
திணைக்கள பணிப்பாளர்
இஸ்லாம் மதத்துக்கு மாத்திரமே இலங்கையில் வருடாந்தம் மூன்று பரீட்சைகள் நடத்தப்படுவதாகவும் ஏனைய மதங்களுக்கு வருடாந்தம் இரண்டு பரீட்சைகளே நடத்தப்படுவதாகவும் ஏனைய மதங்களுக்கு வருடாந்தம் இரண்டு பரீட்சைகளே நடத்தப்படுவதாகவும் விளக்கமளித்த கல்வி அமைச்சு அதனாலேயே அல்ஆலிம் பரீட்சையை நிறுத்தப்பட்டதாகவும் தெரிவித்துள்ளது என முஸ்லிம் சமய பண்பாட்டலுவல்கள் திணைக்கள பணிப்பாளர் இஸட்.ஏ.எம்.பைஸல் தெரிவித்தார்.
இவ்விவகாரம் தொடர்பில் திணைக்கள பணிப்பாளர் தொடர்ந்தும் விடிவெள்ளிக்கு கருத்து தெரிவிக்கையில்,
இஸ்லாம் தொடர்பான 3 பரீட்சைகள் வருடாந்தம் நடத்தப்பட்டு வந்தன. அஹதிய்யா பரீட்சை, தர்மசாரியா பரீட்சை மற்றும் அல்ஆலிம் பரீட்சை என்பனவே அவை. அண்மையில் நடைபெற்ற சமய ஆலோசனை சபை கூட்டத்தில் இவ்விவரங்கள் தெரிவிக்கப்பட்டன.
ஒரு பரீட்சையை நிறுத்தி விட்டு அல்ஆலிம் பரீட்சையை நடத்துவதற்கு ஏற்பாடு செய்யும்படி நாங்கள் கல்வி அமைச்சு மற்றும் பரீட்சை திணைக்கள அதிகாரிகளையும் அமைச்சரவையும் கோரினோம். எமது கோரிக்கை கொள்கையளவில் ஏற்றுக் கொள்ளப்பட்டுள்ளது என்றார்.- Vidivelli
Post a Comment