ஜனாதிபதித் தேர்தலில் போட்டியிடவிடாமல் தடுக்க, எனது உயிருக்கு தீங்கு விளைவிக்கலாம்

எதிர்வரும் ஜனாதிபதித் தேர்தலில் தன்னை போட்டியிடவிடாமல் தடுப்பதற்காக ஆர்வமுள்ள குழுக்கள் தனது உயிருக்கு தீங்கு விளைவிக்க முயற்சி செய்யலாம் என எதிர்க்கட்சித் தலைவர் சஜித் பிரேமதாச தெரிவித்துள்ளார்.

கிரிந்தி ஓயாவில் இடம்பெற்ற மக்கள் சந்திப்பில் கலந்து கொண்டு உரையாற்றிய போதே அவர் இதனை தெரிவித்தார்.

ஜனாதிபதி தேர்தலில் தான் போட்டியிடப் போவதில்லை என பிடிவாதம் பிடிப்பவர்கள் தம்மை கொலை செய்யும் முயற்சியின் பின்னணியில் இருக்கலாம்.

“தற்போதைய ஜனாதிபதி ரணில் விக்கிரமசிங்கவின் போட்டி வேட்பாளராக நான் ஜனாதிபதித் தேர்தலில் போட்டியிடமாட்டேன் என சிலர் வலியுறுத்தி வருகின்றனர். உயிருடன் இருந்தால் போட்டியிடுவேன். தேர்தல் நடக்கும் நேரத்தில் உயிருடன் இருந்தால் மட்டுமே என்னால் போட்டியிட முடியும். எனவே, நான் போட்டியிட மாட்டேன் என அவர்கள் வற்புறுத்தும்போது எனது உயிருக்கு ஆபத்து உள்ளதா என எனக்கு ஆச்சரியமாக இருக்கிறது” என்றும் பிரேமதாச குறிப்பிட்டுள்ளார்.