தன் உயிர் கொடுத்து விழிப்புணர்வை ஏற்படுத்தியுள்ள ஹம்தியும், உயிர் காக்கும் மருத்துவமனையே உயிரெடுத்த துயரமும்

- எம்.எப்.அய்னா -

ஹம்தி பஸ்லிம். 3 வருடங்களும் 3 மாதங்களுமான குழந்தை. எதுவும் அறியாத இந்த குழந்தையின் மரணம் இன்று பலரையும் பேசவைத்து விழிப்புணர்வை ஏற்படுத்தியுள்ளது எனலாம்.

ஆம், கடந்த வெள்ளிக்கிழமை ( ஜூலை 28) ஹம்தி இந்த உலகத்துக்கு விடை கொடுத்த பின்னர், முழு நாடும் அவருக்காக கண்ணீர் வடித்தது. இன்று ஹம்தியின் மரணத்துக்கு நீதி கோரி பல சட்டப் போராட்டங்கள் ஆரம்பிக்கப்பட்டுள்ள நிலையில், இக்குழந்தையின் மரணத்தின் பின்னால் உள்ள சம்பவங்கள் மற்றும் சந்தேகங்களை இக்கட்டுரை பேச எதிர்பார்க்கின்றது.

கொழும்பு ‍ கொட்டாஞ்சேனை பகுதியைச் சேர்ந்த 4 ஆண் பிள்ளைகள் உள்ள குடும்பத்தின் கடைக்குட்டியே ஹம்தி. ஆரோக்கியமான குழந்தையாக உலகை கண்ட ஹம்திக்கு, பிறந்து 9 மாதங்கள் வரையில் எந்த பிரச்சினைகளும் இருக்கவில்லை என பெற்றோர் கூறுகின்றனர். 9 மாதங்களின் பின்னர் ஹம்தியின் அடி வயிற்றுப் பகுதியில் அவதானிக்கப்பட்ட கட்டியொன்று தொடர்பில் ஆரம்பிக்கப்பட்ட சிகிச்சையே சுமார் 30 மாதங்கள் வரை நீடித்து ஹம்தியை காவுகொண்டது.

வயிற்றின் அடிப்பகுதியில் அவதானிக்கப்பட்ட அந்த கட்டிக்கு சிகிச்சையளிக்க பெற்றோர் ஹம்தியை மருத்துவர்களிடம் காண்பித்த நிலையில் தான், தனியார் வைத்தியசாலை ஒன்றின் ஊடாக ஹம்திக்கு சிகிச்சையளிக்க அறிமுகமாகியுள்ளார் விஷேட வைத்திய நிபுணர் மலிக் சமரசிங்க. அவரது ஆலோசனைகளுக்கு அமைய ஹம்தி கொழும்பு ‍ லேடி ரிஜ்வே சிறுவர் வைத்தியசாலையில் சிகிச்சைகளுக்காக அனுமதிக்கப்பட்டுள்ளார். கடந்த 2022 ஆம் ஆண்டு ஜூன் மாதம் அளவில் அவர் இவ்வாறு வைத்தியசாலையில் அனுமதிக்கப்பட்டுள்ளார்.

ஹம்தியின் சிறுநீரகங்கள் தொடர்பில் செய்யப்பட்ட மருத்துவ பரிசோதனைகளில், அவரது இடது பக்க சிறுநீரகம் 9 வீத செயற்பாட்டையும் வலது பக்க சிறுநீரகம் 91 வீத ( நல்ல நிலை) செயற்பாட்டையும் கொண்டுள்ளமை உறுதி செய்யப்பட்ட நிலையில், ஹம்திக்கு அறுவை சிகிச்சை செய்து செயலற்ற இடது பக்க சிறுநீரகத்தை அகற்றுவதற்கான நியாயங்கள், மற்றும் நன்மைகளை வைத்தியர்கள் பெற்றோரிடம் கூறியுள்ளனர். அதன்படியே ஹம்திக்கான சத்திர சிகிச்சைகளை முன்னெடுக்க பெற்றோரின் சம்மதத்துடன் தீர்மானிக்கப்பட்டுள்ளது.

ஹம்தியின் வைத்திய அறிக்கைகளை ஆராய்கின்றபோது, ஹம்தியின் சிறுநீரகங்கள் உண்மையிலேயே Horse shoe kidney ஆகவா இருந்தன என்ற சந்தேகம் எழுகின்றது. அத்துடன் இறுதியாக சத்திர சிகிச்சைக்கு முன்னர் பெறப்பட்ட மருத்துவ பரிசோதனை அறிக்கையில் மிகத் தெளிவாக இடது பக்க சிறுநீரகம் மட்டுமே அகற்றப்பட வேண்டும் என அடையாளம் காணப்பட்டுள்ளது.

முதலில் சத்திர சிகிச்சைக்காக கடந்த 2022 ஆம் ஆண்டு நவம்பர் மாதம் வைத்தியசாலையில் அனுமதிக்குமாறு ஹம்திக்கு அறிவிக்கப்பட்டபோதும், அது பிற்போடப்பட்டு அதே ஆண்டு டிசம்பர் மாதம் அவர் வைத்தியசாலையில் அனுமதிக்கப்பட்டுள்ளார். இந்நிலையில் தான் விஷேட வைத்திய நிபுணர் மலிக் சமரசிங்கவின் கட்டுப்பாட்டில், வைத்தியர் நவீன் விஜேகோன் உள்ளிட்ட சத்திர சிகிச்சை நிபுணர்கள் குழு, கடந்த 2022 டிசம்பர் மாதம் 24 ஆம் திகதி ஹம்தியின் செயலிழந்த சிறுநீரகத்தை அகற்றும் சத்திரசிகிச்சையை முன்னெடுத்துள்ளது.

சத்திர சிகிச்சைகளின் பின்னர் அவசர சிகிச்சைப் பிரிவில் ஹம்தி வைக்கப்பட்டுள்ள நிலையில், அவரது உடல் நிலையில் முன்னேற்றம் எதுவும் இல்லாமல் இருக்கவே மீள எடுக்கப்பட்ட ஸ்கேன் மருத்துவ பரிசோதனைகளில் தான் அதற்கான காரணமும் வெளிப்பட்டது. ஆம், பின்னர் செய்த ஸ்கேன் பரிசோதனைகளில் ஹம்தியின் உடலில் சிறுநீரகங்களே இல்லாமல் இருப்பது தெரிய வந்துள்ளது.

இந்நிலைமை அனைவரையும் அதிர்ச்சியில் ஆழ்த்தியுள்ளது. இதனையடுத்து பல்வேறு மருத்துவ பரிசோதனைகள் செய்யப்பட்டும், ஹம்தியின் செயற்பாட்டில் இருந்த வலது பக்க சிறுநீரகமும், செயலிழந்த சிறுநீரகத்துடன் சேர்த்து அகற்றப்பட்டுள்ளமை உறுதி செய்யப்பட்டுள்ளது.

அதன் பின்னர் வைத்தியர் மலிக் சமரசிங்க, நவீன் விஜேகோன், சிகிச்சை அறை பிரதான வைத்தியர் ரந்த்துல ரணவக உள்ளிட்ட வைத்தியர்கள் பெற்றோரை அழைத்து பேசியுள்ளதுடன், சத்திர சிகிச்சையின் போது தவறு ஒன்று நடந்துவிட்டதாக தெரிவித்ததாக பெற்றோர் கூறுகின்றனர். அந்த தவறை சரி செய்ய முடியும் எனவும், அதற்காக 4 மாதங்கள் கால அவகாசம் தருமாறும் கோரியுள்ள மருத்துவர்கள், சிறுநீரக மாற்று சத்திர சிகிச்சை ஒன்றினை முன்னெடுத்து வேறு ஒருவரின் சிறுநீரகத்தை பொருத்தி ஹம்தியை குணப்படுத்துவதாக பெற்றோரிடம் உறுதியளித்ததாக பெற்றோர் கூறுகின்றனர். ஆனால், அது ஹம்திக்கு நடந்த விடயங்களை கசிய விடாமல் தடுக்க வைத்தியர்கள் கையாண்ட யுக்தி என்பது கடந்த வெள்ளிக் கிழமையே தெரியவந்தது.

அதற்குள் சத்திர சிகிச்சை செய்த பிரதான வைத்தியர் நவீன் விஜேகோன் அவுஸ்திரேலியாவுக்கு சென்றுவிட்டார்.

ஹம்தியின் செயலிழந்த இடது சிறுநீரகத்துடன் சேர்த்து அகற்றப்பட்ட நல்ல நிலையில் இருந்த வலது பக்க சிறுநீரகத்துக்கு என்ன ஆனது என்பது இதுவரை தெரியாது. இந்த சத்திர சிகிச்சை நடந்து 6 மாதங்களுக்கு மேல் ஆகும் நிலையில், அது தொடர்பில் குறைந்தபட்ச விசாரணை ஒன்றினைக் கூட ஆரம்பிக்காத வைத்தியசாலை நிர்வாகம், ஹம்தியின் மரணத்தை தொடர்ந்து எழுந்துள்ள நிலைமைகளை அடுத்து விசாரணைகள் ஆரம்பிக்கப்பட்டுள்ளதாக அறிக்கை விடுத்துள்ளது.

இதனைவிட ஹம்தியின் மரணத்துக்கு காரணம், சத்திர சிகிச்சையின் பின்னர் ஏற்பட்ட தொற்றுப் பரவல் என வைத்தியசாலை பணிப்பாளர் வைத்திய நிபுணர் ஜி. விஜேசூரிய குறிப்பிட்டுள்ளார்.

இந்நிலையில் சிறுவன் ஹம்திக்கு என்ன நடந்தது என்பதை கண்டறிய வேண்டிய கட்டாயம் உள்ளது. ஹம்தியின் நல்ல நிலையில் இருந்த சிறுநீரகம் மருத்துவ மாபியாக்களால் சட்ட விரோதமாக விற்கப்பட்டிருக்கலாம் என ஒரு சந்தேகம் எழுப்பப்படுகின்றது. பெற்றோரின் தகவல்கள் பிரகாரம், தவறுதலாக அந்த வலது பக்க சிறுநீரகம் அகற்றப்பட்டதாக கூறப்பட்டாலும் அவ்வாறு அகற்றிய சிறுநீர‌கத்துக்கு என்ன நடந்தது என்பதற்கு தெளிவான பதில் இல்லை.

ஹம்தியின் பெற்றோர் முன் வைக்கும் குற்றச்சாட்டுக்கள் ஒரு புறம் இருக்க மருத்துவர் தரப்பு ஹம்தியின் சிறுநீரகங்கள் Horse shoe kidney ஆக இருந்தாகவும் அதுவே சத்திர சிகிச்சையின்போது இரு சிறுநீரகங்களும் அகற்றப்படுவதற்கான காரணியாக அமைந்ததாக நியாயம் கற்பிக்க முற்படுவதை அவதானிக்க முடிகின்ற‌து. உண்மையிலேயே ஹம்தியின் சிறுநீரகங்கள் அந்த வகையில் தான் இருந்திருந்தால் கூட நிச்சயமாக சத்திர சிகிச்சைக்கு முன்னர் முன்னெடுக்கப்படும் மருத்துவ பரிசோதனைகளில் அது தெரிந்திருக்கும். மிக அரிதாக தெரியாது போவதற்கும் சாத்தியம் உண்டு. ஒரு வேளை அப்படி தெரியவில்லை என்றாலும், சத்திர சிகிச்சை செய்யும்போது கூட, அதை கண்டுபிடித்திருக்க வேண்டும். மாற்றமாக அதனை நினைத்தவாறு அகற்ற முடியாது என பெயர் குறிப்பிட விரும்பாத வைத்தியர் ஒருவர் தெரிவித்தார். அப்படி ஏதாவது நடந்திருந்தால் அது பாரிய மருத்துவத் தவறு என அந்த வைத்தியர் குறிப்பிட்டார்.

எனவே தான் ஹம்தியின் பெற்றோர் கூறுவதைப்போல ஒரு குற்றம் அல்லது பாரிய மருத்துவ தவறு இங்கு நிகழ்ந்துள்ளதா அல்லது மருத்துவமனை தரப்பு சொல்வதைப்போல ஏதும் அரிதான காரணிகள் உள்ளனவா என்பதை உண்மையான சுயாதீனமான விசாரணை ஒன்றூடாகவே உறுதி செய்ய முடியும். அதன்படி தற்போது பொரளை பொலிசாரால் ஆரம்பிக்கப்பட்டுள்ள குற்றவியல் விசாரணை விரிவுபடுத்தப்பட்டு, நிபுணர்களின் ஆலோசனைக்கு அமைய நுணுக்கமான விசாரணையாக அது மாற்றப்படல் வேண்டும்.

விசாரணைகள் குற்றப் புலனாய்வுத் திணைக்களம் ஊடாகவும், இலங்கை மருத்துவ சபை ஊடாகவும் முன்னெடுக்கப்பட்டு உண்மை வெளிக்கொண்டுவரப்படல் வேண்டும்.

இதற்காக தான் ஹம்தியின் ஜனாசா கடந்த ஞாயிறன்று மாளிகாவத்தை மைய வாடியில் நல்லடக்கம் செய்யப்பட்ட போது மையவாடிக்கு முன்பாக குடும்ப உறுப்பினர்கள், நலன்விரும்பிகள் சிலர் இணைந்து ஆர்ப்பாட்டம் ஒன்றினையும் முன்னெடுத்திருந்தனர்.

நீதியான விசாரணைகள் நடைபெற்று உண்மை வெளிப்படுத்தப்படும் போது தான் அரச வைத்தியசாலைகளை நம்பியிருக்கும் அனைவரது சந்தேகங்களையும் நீக்கி சுகாதார சேவையின் தரத்தை உறுதி செய்ய முடியும்.- Vidivelli