பாராளுமன்றத்தை கலைத்து பொதுத் தேர்தல் ஒன்றை நடத்தினால் 1000 கோடி ரூபா செலவாகும்

நாடாளுமன்றை கலைத்து பொதுத் தேர்தல் ஒன்றை நடத்தினால் சுமார் ஆயிரம் கோடி ரூபா செலவாகும் என தேர்தல் ஆணைக்குழுவின் தலைவர் சட்டத்தரணி நிமால் புஞ்சிஹேவா தெரிவித்துள்ளார்.

நாட்டின் பொருளாதார நிலைமைகளினால் தற்போது தேர்தல் ஒன்றுக்கு செல்வது பொருத்தமற்றது எனவும் அவர் சுட்டிக்காட்டியுள்ளார்.

இது தொடர்பில் அவர் மேலும் தெரிவிக்கையில்,

நாடாளுமன்றின் அனைத்து கட்சிகளும் ஒன்றிணைந்து குறுகிய காலத்திற்கேனும் இடைக்கால அரசாங்கமொன்றை நிறுவி ஆட்சி செய்து பின்னர் தேர்தல் ஒன்றுக்கு செல்ல முடியும்.

தேர்தல் ஒன்றுக்கு செல்ல வேண்டுமாயின் நான்கு மாத கால அவகாசம் தேவைப்படும்.

அதற்கு முன்னர் எரிவாயு, எரிபொருள் மற்றும் மின்வெட்டு பிரச்சினைகளுக்கு தீர்வு வழங்கப்பட்டிருக்க வேண்டும்.

தேர்தலுக்கு செலவிடும் பணத்தை இந்தப் பிரச்சினைகளை தீர்க்க பயன்படுத்திக் கொள்ள முடியும் எனவும் குறிப்பிட்டுள்ளார்.