நாம் இனவாதத்தை முன் எடுக்கும் போது, மறுபுறத்தில் எம்மீதும் இனவாதம் பிரயோகிக்கப்படுகிறது

இன ரீதியான கட்சிகளின் உருவாக்கத்தால் எமக்கு எதிராக இனவாதம் பிரயோகிக்கப்படுகிறது. முஸ்லிம் பெயர்களில் கட்சிகள் உருவாக்கப்படுகையில் எதிரான கட்சிகள் முளைக்கின்றன.

இதுகுறித்து நாம் சிந்தித்து முன்மாதிரியாக செயற்பட வேண்டும் என பொதுஜன பெரமுன முஸ்லிம் பிரிவின் தலைவர் ஜனாதிபதி சட்டத்தரணி அலிசப்ரி தெரிவித்தார். 

பொதுஜன பெரமுனவின் கண்டி மாவட்ட வேட்பாளர் பாரிஸ் ஹாஜியாருக்கு ஆதரவளித்து நடைபெற்ற பிரசாரக் கூட்டத்திலேயே இவ்வாறு குறிப்பிட்டார்.

மேலும் கூறுகையில், பயங்கரவாதத்தை நிறைவு செய்த தரப்பிற்கு நன்றி செலுத்த வேண்டிய தருணத்தில் தமிழ், முஸ்லிம் மக்கள் எதிராக வாக்களித்தது பாரிய வரலாற்றுத் தவறாகும்.  

கடந்த ஜனாதிபதித் தேர்தலில் கோட்டாபய  ராஜபக்சவுக்கு எதிராக சஜித் பிரேமதாச பெற்றவாக்குகள் 55 இலட்சமாகும்.

அதில் அரைவாசிக்கு மேற்பட்டவை சிறுபான்மை இனங்களான முஸ்லிம்களும் தமிழர்களும் வழங்கியதாகும். அதேநேரம் கடந்த காலத்தில் இடம்பெற்ற கொடிய யுத்தத்தால் பாரியளவில் நட்டங்களை சந்தித்தவர்கள் தமிழர்களாகும்.

அதற்கு அடுத்தபடியாக முஸ்லிம்களுக்கும் பாரிய பிரச்சினைகள் இருந்தன. முஸ்லிம்கள் வெளியேற்றப்பட்டமை உட்பட 612 பொலிசார் வரிசையில் வைத்து சுடப்பட்ட சம்பவம் உட்பட பலவற்றைக் குறிப்பிடலாம். எனவே மேற்படி யுத்தம் முடிவடைந்த காரணத்தால் அதன் மூலம் நிம்மதி அடைந்தவர்களும் தமிழ் - முஸ்லிம் சமூகம்தான். எனவே கூடுதலான அளவு நன்றிசெலுத்த வேண்டிய இரு சமூகங்களும் எதிராக வாக்களித்தமை ஒருபாரிய வரலாற்றுத் தவறாகும்.  

கடந்த மகிந்த ஆட்சியில் நடந்த ஒருசிறு சம்பவம் தான் பேருவளைச் சம்பவமாகும். 24 மணிநேரத்தில் கலவரம் நடந்த இடத்தின் அடையாளம் தெரியாமல் யாவற்றையும் அகற்றி புதிதாக கட்டிடங்களையும் முப்படையின் உதவியுடன் அமைத்துக் கொடுக்கப்பட்டது. அதேநேரம் முஸ்லிம்கள் 90 சதவீதம் ஆதரவு தெரிவித்த நல்லாட்சி அரசில் திகனையில் ஐந்து நாட்கள் தொடர்ந்து கடைகளும் வீடுகளும் எரிய அதனைதடுக்காது பார்த்துக் கொண்டிருந்தார்கள். சஹ்ரான் பிரச்சினையில் எம்மை பாதுகாக்காதவர்கள் யார் என்பதும் உங்களுக்குத் தெரியும். இவ்வளவு காலமும் நீங்கள் வாக்களித்த ஜக்கியதேசிய கட்சிக்கும் மகிந்த ராஜபக்சவிற்கும் இடையே உள்ள வித்தியாசம் இதுதான்.  

சர்வதேச சுகாதார ஸ்தாபனத்தில் நிரந்தரப் பிரதிநிதி தெரிவித்த கருத்தை சற்று பாருங்கள். உலகில் வளர்ச்சியடைந்த பலநாடுகளால் மேற்கொள்ள முடியாத 'கொவிட் - 19'   ஐ இலங்கையில் கட்டுப்பாட்டுக்குள் கொண்டுவந்துள்ளமை பாராட்டத்தக்கது எனத் தெரிவித்துள்ளார்.  

ஒருநாட்டிற்குத் தேவை பாதுகாப்பு , பொருளாதார அபிவிருத்தி  இந்த இரண்டுமாகும்.  யுத்தத்தில் இருந்து நாட்டை பாதுகாத்த அரசு,கொவிட் -19 பரவுதலில் இருந்து எமது உயிர்களைப் பாதுகாத்த அரசு ராஜபக்ச அரசாகும்.  

நியுடனின் விதிப்படி ஒவ்வாரு தாக்கத்திற்கும் மறுதாக்கம் ஒண்டு. நாம் இனவாதத்தை முன் எடுக்கும் போது மறு தாக்கமாக எம் மீதும் இனவாதம் பிரயோகிக்கப்படுகிறது. ஆரம்பத்தில் தமிழ் கட்சிகள் தமிழரசுக் கட்சி, தமிழ் காங்கிரஸ் என்று ஆரம்பித்து பல இனவாடை வீசும் கட்சிகள் உருவாகின. அதன் பின் முஸ்லிம் காங்கிரஸ்,தேசிய காங்கிரஸ், அகில இலங்கை மக்கள் காங்கிரஸ் என பல காங்கிரஸ்கள் உருவெடுத்தன. எனவே அதன் மறுதாக்கமாக சில சேனாக்களும், உரிமைகளும் உருவாகின. எனவே இதிலிருந்துவிடுபடவேண்டும். அதற்கு எடுத்துக் காட்டாக நாம் நடந்துகாட்டவேண்டும் எனக் கூறினார்.  

அக்குறணை குறூப் நிருபர், எம்.ஏ.அமீனுல்லா