ஜம்மியத்துல் உலமாவுக்கு கடிதம் அனுப்பியுள்ளேன் - அத்துரலியே ரதன தேரர்

இஸ்லாம் சமய அடிப்படைவாதத்தினால், நடைபெறும் சமூக பிளவுகளை தடுத்து நிறுத்த உடனடியாக தலையீடு செய்யுமாறு கோரி, எமது மக்கள் சக்தி கட்சியின் தலைவர் அத்துரலியே ரதன தேரர், அகில இலங்கை ஜம்மியத்துல் உலமா சபைக்கு நேற்று -23- கடிதம் ஒன்றை அனுப்பி வைத்துள்ளார்.

இது சம்பந்தமான ஜம்மியத்துல் உலமா சபையின் நிலைப்பாட்டை உடனடியாக தெரியப்படுத்துமாறும் இல்லை எனில் சமூகத்துக்கு தடைகளை ஏற்படுத்தும் செயல்களை தடுத்து நிறுத்துவதற்காக அகிம்சை வழி நடவடிக்கைகள் மூலம் தலையீடுகளை செய்ய போவதாகவும் ரதன தேரர் தனது கடிதத்தில் கூறியுள்ளார்.

ஜம்மியத்துல் உலமா சபை என்பது முஸ்லிம் மக்களின் சமூக வாழ்வியலுக்கு பெரிய அழுத்தங்களை கொடுக்கக் கூடிய இஸ்லாமிய சமயத்தின் பிரதான அமைப்பாகும். இதனால், இஸ்லாமிய சமய அடிப்படைவாதம் தொடர்பாக அந்த அமைப்புக்கும் பொறுப்பு இருக்கின்றது.

அந்நிய கலாசார அடையாளங்களை ஏற்றுக்கொள்ள நாங்கள் தயாராக இருக்கிக்றோம். எனினும் சமய அடிப்படைவாதத்தை ஏற்றுக்கொள்ள தயாரில்லை.

சிங்கள மற்றும் முஸ்லிம் சமூகங்கள் இடையில் பிளவுகளை ஏற்படுத்த காரணமாக அமைந்த சமய ரீதியான மாற்றங்கள் அண்மைய காலத்தில் ஏற்பட்டமைக்கு ஜம்மியத்துல் உலமா சபையும் பொறுப்புக் கூற வேண்டும்.

முஸ்லிம் நாடுகள் கூட அணி தடைவிதித்துள்ள புர்கா மற்றும் நிகாப் போன்ற ஆடைகளை அணியும் அடிப்படைவாத நிலைமையை மாற்ற வேண்டும்.

மதரசா பாடசாலை தடை செய்யப்பட வேண்டும். அத்துடன் சிறுமிகளை திருமணம் செய்துக்கொள்ளும் சட்டத்தை மாற்றி, நாட்டில் அமுலில் இருக்கும் பொதுவான திருமணச் சட்டத்தை கடைபிடிக்க வேண்டும்.

அல்லாவை நம்பாதவர்களை கண்டித்து, அவர்களை பலவந்தமாக மத மாற்றம் செய்யும் கருத்துக்கள் பரப்பப்படுவதை நிறுத்த வேண்டும் எனவும் அத்துரலியே ரதன தேரர் தனது கடிதத்தில் குறிப்பிட்டுள்ளார்.