"பஷில் ராஜபக்ஷ பணத்தை கொண்டுவந்து தருவார், அதனை தனது பையினுள் போட்டுகொள்வார்கள்"

தமது சுயலாபத்துக்காகவும், அமைச்சு பதவிகளுக்காகவும் ஆசைப்பட்டு நிபந்தனைகளை முன்வைத்து பேரம்பேசும் அரசியல்வாதிகள் எமக்கு அவசியமில்லை. எமது ஜனாதிபதி வேட்பாளர் சஜித்பிரேமேதாச ஜனாதிபதியான பின்னர் பெருந்தோட்ட தொழிலாளர்கள் எதிர்பார்த்து காத்திருக்கும் அனைத்து விடயங்களும் கட்டங்கட்டமாக நிறைவேற்றப்படும். அதற்காக நாம் புதிய வேலைத்திட்டங்களை முன்னெடுக்க திட்டங்களை வகுத்துள்ளோம் என பெருந்தோட்ட கைத்தொழில் அமைச்சர் நவீன் திஷாநாயக்க தெரிவித்துள்ளார்.

அட்டன் நகரில் நேற்று முன்தினம் ஞாயிற்றுக்கிழமை இடம்பெற்ற புதிய ஜனநாயக முன்னணியின் தேர்தல் பிரசார கூட்டத்தில் கலந்து கொண்டு மக்கள் மத்தியில் உரையாற்றும் போதே அவர் இதனை தெரிவித்தார். அவர் அங்கு மேலும் உரையாற்றுகையில்,

எமது தோட்டதொழிலாளர்கள் தொடர்ந்தும் கஷ்டங்களை அனுபவித்து வருகின்றார்கள். அது தொடர்பில் புதிதாக கூற எதுவும் இல்லை. தோட்டத் தொழிலாளர்களுக்கு 500ரூபாவில் இருந்து 720 ரூபவிற்கு அவர்களின் சம்பளம் அதிகரிக்கப்பட்டுள்ளது. இருந்தாலும் அவர்களுக்கு வழங்கப்பட்டுள்ள சம்பளம் போதாது. அமைச்சர் திகாம்பரம் உள்ளிட்ட மலையகத்தில் உள்ள ஏனைய அமைச்சர்களும் நானும் இணைந்து பல்வேறு பேச்சுவார்த்தைகளை மேற்கொண்டு வருகிறோம்.

முதலாளிமார் சம்மேளனத்தோடு புதிய வேலைத்திட்டங்களை முன்னெடுக்கவுள்ளோம்.

தோட்ட தொழிலாளர்களின் ஒரு நாள் சம்பளம் ஆயிரம் ருபாய் என்பது முக்கியமானது. இதனை எவ்வாறு பெறுவது என்பது ஒரு புறமிருக்க தேயிலை தயாரிப்பினை எவ்வாறு அதிகரிக்கவேண்டும் என்பது மறுபுறமுள்ள சவால்மிக்க விடயமொன்றாகும்.

அதேவேளை தோட்ட தொழிலாளர்களின் பாதுகாப்பு குறித்து நாம் கவனம் செலுத்த வேண்டும். தேயிலையின் வரலாறு என்பது 150வருடங்கள் கொண்டது. ஆங்கிலேயர்களால் கொண்டுவரபட்டது இந்த தோட்டப்புறங்களில் உள்ள காணிகள் எமது தோட்டபுறங்களில் உள்ள மக்களுக்கு இருந்தது. ஆனால் ஆங்கிலேயர்கள் அந்த காணியினை பெற்றுக்கொண்டார்கள். தமிழ் மக்களை இந்தியாவில் இருந்து கொண்டுவந்து இங்கு குடியமர்த்தினார்கள். எங்களுடைய சகோதரர்கள் மீது நாங்கள் அன்பு வைத்துள்ளோம். எமது நாட்டில் தோட்டதொழிலாளர்களே அதிகமாக கஷ்டப்படுக்கின்றார்கள்.

தோட்டதொழிலாளர்களின் வாக்குகளை சட்டை பையினுள் வைத்து கொண்டு மாறி மாறி கட்சிதாவும் அரசியல்வாதிகள் எமக்கு தேவையில்லை. மலையகத்தில் உள்ள சில அரசியல் வாதிகள் காணப்படுகிறார்கள். யார் அதிகூடிய பணம் தருகிறார்களோ அவர்களோடு பல்வேறு நிபந்தனைகளை முன்வைத்து இணைந்துக் கொள்வார்கள்.

கடந்த ஜனாதி பதி தேர்தலின் போது அமெரிக்க டொலர் பெறுமதி மூன்று மில்லியன் ரூபா. இந்த ஜனாதிபதி தேர்தலின் போது அமெரிக்க டொலர் ஜந்து மில்லியன். பஷில் ராஜபக்ஷ பணத்தை கொண்டுவந்து தருவார். அதனை தனது பையினுள் போட்டுகொள்வார்கள். வெளிநாடுகளில் உள்ள வங்கி கணக்கில் வைப்பு செய்து கொள்வர். இறுதியில் ஸ்ரீலங்கா பொதுஜன பெரமுனவுடன் புரிந்துணர்வை ஏற்படுத்தி கைச்சாத்திட்டு கொள்வார்கள். பணத்திற்காகவும் அமைச்சு பதவிகளுக்காகவும் ஆசைப்பட்டு நிபந்தனைகளை முன் வைத்து பேரம்பேசும் அரசியல்வாதிகள் எமக்கு அவசியமில்லை.

அமைச்சர் திகாம்பரம் அவ்வாறு இல்லை. அவர் சாதாரண தோட்ட தொழிலாளியின் மகன் என்ற வகையில் தோட்டதொழிலாளர்களின் கஷ்டம், துன்பம், வேதனை போன்றவற்றை நன்கு அறிந்த அரசியல் தலைவர். அரசியல் தரகர் தொழிலை நாம் நிறுத்த வேண்டும். இவர்களின் போலி நாடகத்தை நன்றாக சிந்திப்பவர்கள் புரிந்து கொள்வார்கள் என் றார்.