றிசாத் பதியுதீன் தொடர்பில், பொய்யுரைத்தார், இராணுவத் தளபதி - கம்மன்பில பிதற்றுகிறார்

இராணுவத் தளபதி பொய்யுரைத்துள்ளார் என பிவித்துரு ஹெல உறுமய கட்சியின் தலைவர் உதய கம்மன்பில தெரிவித்துள்ளார்.

ரிசாட் பதியூதீன் தொலைபேசி அழைப்பினை ஏற்படுத்தியதாக இராணுவத் தளபதி மகேஸ் சேனாநாயக்க வெளியிட்ட தகவல் பொய்யானது என அவர் சுட்டிக்காட்டியுள்ளார்.

ஊடகவியலாளர் சந்திப்பில் கலந்து கொண்ட போது அவர் இதனைக் குறிப்பிட்டுள்ளார்.

ஈஸ்டர் ஞாயிறு தாக்குதலுடன் தொடர்புடையவர்களை விடுதலை செய்ய மன்னாரை மையமாகக் கொண்ட அமைச்சர் ஒருவர் தமக்கு அழுத்தங்களை பிரயோகித்தார் என அரசாங்க பத்திரிகையொன்றுக்கு இராணுவத் தளபதி கூறியிருந்தார் என அவர் சுட்டிக்காட்டியுள்ளார்.

கூட்டு எதிர்க்கட்சியினால் அமைச்சர் ரிசாட்டுக்கு எதிராக தயாரிக்கப்பட்ட நம்பிக்கையில்லா தீர்மானத்தின் முதல் குற்றச்சாட்டே இந்த அழுத்தம் குறித்தானது என தெரிவிக்கப்படுகிறது.

சந்தேக நபரை விடுதலை செய்யுமாறு ரிசாட் கோரியதாகவும் ஊடகவியலாளர் சந்திப்பில் குறிப்பிட்டிருந்தார். எனினும், நாடாளுமன்றத் தெரிவுக்குழுவில் பங்கேற்று சாட்சியமளித்த போது அவர் வேறுவிதமான கருத்துக்களையே வெளியிட்டிருந்தார்.

ரிசாட் பதியூதீன் அழைபேசியில் அழைத்து சந்தேக நபர்கள் பற்றி கோரிய போது ஒன்றரை ஆண்டுகளின் பின்னர் தகவல்களை வழங்குவதாக தாம் கூறியதாக முன்னதாக இராணுவத் தளபதி குறிப்பிட்டிருந்தார் எனவும் பின்னர் நாடாளுமன்றத் தெரிவுக்குழுவில் வேறும் ஓர் விடயத்தை அவர் குறிப்பிட்டுள்ளதாகவும் உதய கம்மன்பில தெரிவித்துள்ளார்.

இதன் மூலம் இராணுவத் தளபதி பொய்யுரைப்பது உறுதியாகின்றது என்பதுடன் அவர் மீது தேவையற்ற அழுத்தங்கள் பிரயோகிக்கப்படுவதும் உறுதியாகியுள்ளது எனவும் அவர் குறிப்பிட்டுள்ளார்.