முஜிபுர் ரஹ்மானுக்கு, ரதன தேரர் பதில்

புலம்பெயர் தமிழர்களின் தேவையை தான் நிறைவேற்றி வருவதாக ஐக்கிய தேசியக் கட்சியின் நாடாளுமன்ற உறுப்பினர் முஜிபுர் ரஹ்மான் சுமத்தியுள்ள குற்றச்சாட்டை நிராகரிப்பதாக நாடாளுமன்ற உறுப்பினர் அத்துரலியே ரதன தேரர் தெரிவித்துள்ளார்.

குருணாகல் போதனா வைத்தியசாலையின் மருத்துவர் சிஹாப்தீன் ஷாபி சம்பந்தமாக அத்துரலியே ரதன தேரர் மேற்கொண்டு வரும் நடவடிக்கைகள் புலம்பெயர் புலிகளின் நோக்கத்தை நிறைவேற்றுவதாக அமைந்துள்ளது என முஜிபுர் ரஹ்மான் குற்றம் சுமத்தியிருந்தார்.

கொழும்பில் நேற்று நடைபெற்ற செய்தியாளர் சந்திப்பில் அவர் இந்த குற்றச்சாட்டை முன்வைத்திருந்தார். மேலும் முஜிபுர் ரஹ்மான்,

அத்துரலியே ரதன தேரர் புலம்பெயர்ந்தோருக்கு தேவையானவற்றை செய்து வருகிறார். நாட்டில் உள்ள எதிலும் அவருக்கு நம்பிக்கையில்லை.

புலனாய்வு பிரிவினர் மீது நம்பிக்கையில்லை. மருத்துவர்கள் மீது நம்பிக்கையில்லை, நீதிமன்றத்தின் மீது நம்பிக்கையில்லை. புலம்பெயர்ந்தோரும் இதனையே கூறுகின்றனர்.

ரதன தேரர், புலம்பெயர் தமிழர்களுடன் கூட்டணியை அமைந்துள்ளதாக தெரிகிறது. இந்த கூட்டணி நாட்டுக்கு எதிரான கூட்டணி. தேசப்பற்றாளர்கள் எனக் கூறிக்கொண்டு, தேசப்பற்று என்ற ஆடையை அணிந்துக்கொண்டு, சிங்கள, தமிழ் அமைப்பு என்று அமைப்பை ஆரம்பித்து மக்களை ஏமாற்றி வருகின்றனர்.

புலம் பெயர் தமிழர்களுடன் இணைந்து கூட்டணியை அமைத்து, நாட்டின் நீதித்துறை, பொலிஸார் மற்றும் மருத்துவர்களுக்கு சவால் விடுத்து வருகிறார். இதன் மூலம் நாடு சர்வதேச ரீதியில் பெற்ற வெற்றியை மறுபக்கம் திரும்பும் வகையிலேயே ரதன தேரர் செயற்பட்டு வருகிறார் என முஜிபுர் ரஹ்மான் குறிப்பிட்டிருந்தார்.

முஜிபுர் ரஹ்மானின் இந்த குற்றச்சாட்டுக்கு பதிலளித்துள்ள அத்துரலியே ரதன தேரர், தான் இஸ்லாமிய அடிப்படைவாதத்திற்கு எதிராக போராடி வருவதாக கூறியுள்ளார்.

புலம்பெயர் தமிழர்களுடன் கூட்டணி வைத்திருப்பதாக முஜிபுர் ரஹ்மான் கூறுகிறார். முஸ்லிம் அடிப்படைவாதம் காரணமாக சிங்களவர்களை விட தமிழர்களே அதிகம் பாதிக்கப்பட்டுள்ளனர். மட்டக்களப்பு, திருகோணமலை, அம்பறை, வவுனியா போன்ற இடங்களில் உள்ள தமிழ் மக்களே பாதிக்கப்பட்டுள்ளனர்.

நாங்கள் பொதுவான முஸ்லிம் மக்களுக்கு எதிராக போராடவில்லை. முஸ்லிம் அடிப்படைவாதிகளினால் பாதிக்கப்பட்டுள் சகல தமிழ் மக்களுக்கு ஆதரவாக நாங்கள் போராடி வருகிறோம். இந்து மற்றும் பௌத்த மக்கள் ஒரு முன்னணிக்கு வந்துள்ளனர் என்பதை நான் மிகவும் தெளிவாக கூறி வைக்க விரும்புகிறேன்.

நான் யாழ்ப்பாணத்தில் 10 ஆண்டுகள் 14,000 தமிழ் மாணவர்களுக்கு சிங்களம் கற்பித்துள்ளேன். இதன் மூலம் கிடைத்த சக்தியை பயன்படுத்தி சிங்கள, தமிழ் ஒற்றுமையை கட்டியெழுப்புவது என தேசிய கடமை. வஹாபிசம் இலங்கையில் செயற்பட்டு வருகிறது.

குடும்ப கட்டுப்பாடு மற்றும் சிங்களவர்களின் காணிகளை கைப்பற்றும் நடவடிக்கைகள் நாட்டில் நடந்து வருகிறது. இதனால், இஸ்லாமிய அடிப்பவாதத்தை தோற்கடிக்க சிங்களம் மற்றும் தமிழ் மக்கள் இணைந்த ஒரு முன்னணியை உருவாக்குவேன் என அத்துரலியே ரதன தேரர் குறிப்பிட்டுள்ளார்.