தூக்குத் தண்டனை குறித்து, வெளியாகியுள்ள தகவல்கள்

ஸ்ரீலங்கா ஜனாதிபதி மைத்திரிபால சிறிசேன சர்வதேச எதிர்ப்புக்களையும் மீறி நாட்டில் மீண்டும் மரணதண்டனையை நிறைவேற்ற வேண்டும் என பிடிவாதமாக உள்ளார். இருப்பினும் மைத்திரியின் இவ்வாறான எண்ணம் நிறைவேற்றப்படுமாயின் கடும் விளைவுகளை சந்திக்க நேரும் என பிரிட்டன் உட்பட ஏனைய நாடுகள் எச்சரிக்கை விடுத்திருந்தன.

இந்நிலையில் தற்போது மரண தண்டனை விதிக்கப்பட்ட நான்கு போதைப்பொருள் குற்றவாளிகளைத் தூக்கிலிடுவது தொடர்பான மைத்திரிபால சிறிசேனவின் உத்தரவு இன்னமும் நீதி அமைச்சுக்கு அனுப்பப்படவில்லை எனத் தகவல் ஒன்று வெளியாகியுள்ளது.

எனினும், மரண தண்டனையை நிறைவேற்றுவது தொடர்பில் மைத்திரி கையெழுத்திட்ட ஆணை எதுவும், நீதியமைச்சுக்கு இன்னமும் கிடைக்கவில்லை என்று நீதியமைச்சின் செயலர் ஆர்.எம்.டி.பி. மீகஸ்முல்ல தெரிவித்துள்ளார்.

நான்கு குற்றவாளிகளுக்கு மரண தண்டனையை நிறைவேற்றும் ஆணையில் தான் கை ஒப்பமிட்டு விட்டதாக ஜனாதிபதி மைத்திரிபால சிறிசேன கடந்த வாரம் கூறியிருந்தார் என்பதும் குறிப்பிடத்தக்கது.

அத்துடன், தூக்குத் தண்டனையை நிறைவேற்றுபவர் பணிக்கு விண்ணப்பித்தவர்களின் பட்டியலில் இருந்து தெரிவு செய்யப்பட்ட ஒரு தொகுதியினருக்கு பயிற்சிகள் அளிக்கப்பட்டுள்ளன.

எனினும், தூக்குத்தண்டனையை நிறைவேற்றுபவர் பணிக்கு இன்னமும் எவரும் தெரிவு செய்யப்படவில்லை என்றும் அவர் உறுதிப்படுத்தியுள்ளார்.

அதேவேளை, அலுகோசு பணிக்கு இரண்டு பேர் நியமிக்கப்பட்டுள்ளதாக அனைத்துலக ஊடகங்கள் பலவும் செய்திகளை வெளியிட்டுள்ளன எனினும் அவ்வாறு இதுவரை நியமிக்கவில்லை எனவும் தெரிவிக்கப்படுகின்றது.