முஸ்லிம்களை மன்னிப்பு கோர, வைக்காமல் விடமாட்டேன் - சங்கரட்ண தேரர்

கல்முனை தமிழ் பிரதேச செயலகத்தை அரசாங்கம் தரம் உயர்த்தி தர வேண்டும் என்று கோரி அவரின் தலைமையில் முன்னெடுக்கப்பட்ட உண்ணாவிரத போராட்டத்துக்கு எதிராக சத்தியாக்கிரகம் மேற்கொண்ட முஸ்லிம் தரப்பினர் அவரிடம் பகிரங்க மன்னிப்பு கோரியே ஆக வேண்டும் என்று கல்முனை ஸ்ரீ சுபத்திரா ராமய விகாராதிபதி ரன்முத்துக்கல சங்கரட்ண தேரர் தெரிவித்தார்.

இன்று ஞாயிற்றுக்கிழமை -23- காலையில் பொலிஸ் தலையீடு காரணமாக உண்ணாவிரத போராட்டத்தை நிறைவு செய்த பிற்பாடு விகாரையில் வைத்து ஆதரவாளர்கள் மத்தியில் பேசியபோது இவர் இவ்வாறு தெரிவித்தார். இவர் இங்கு தெரிவித்தவை வருமாறு

நாம் கடந்த சுமார் 30 வருட காலமாக தரம் உயர்த்தி கொடுக்கப்படாமல் இருக்கும் தமிழ் பிரதேச செயலகத்தை தரம் உயர்த்தி பெறுவதற்காகவே நீதியான போராட்டத்தை முன்னெடுத்தோம். எல்லா மக்களும் கல்முனையில் எந்த பிரச்சினைகளும் இல்லாமல் சந்தோசமாக நிம்மதியாக வாழ வேண்டும் என்பதே எமது பெருவிருப்பம் ஆகும்

ஆயினும் முஸ்லிம் தரப்பினர் எமது போராட்டத்தின் இலட்சிய நோக்கத்தை குழப்புவதற்காக அநீதியான சத்தியாக்கிரக போராட்டத்தில் ஈடுபட்டனர். இதற்காக இவர்கள் எம்மிடம் பகிரங்க மன்னிப்பு கோரியே ஆதல் வேண்டும். மன்னிப்பு கோர வைக்க செய்யாமல் விடவே மாட்டோம். அதற்கான வழிமுறைகளும் எம்மிடம் உள்ளன. கல்முனை தமிழ் பிரதேச செயலகத்தை நிச்சயமாக தரம் உயர்த்தி தருவோம். அது வரை ஓயவே மாட்டோம் என்றார்

(தர்மேந்திரன்)