இரகசிய சட் ரூம்களை, பயன்படுத்திய சஹ்ரான் - அப்துல் ராசிக் முறையிட்டும் பயனில்லையாம்...!

உயிர்த்தஞாயிறு தாக்குதல்களின் முக்கிய சூத்திரதாரி என கருதப்படும் ஜஹ்ரான் ஹாசிம் தற்கொலை குண்டுதாக்குதல்களை மேற்கொண்ட  ஆறு இளைஞர்களை சேர்ப்பதற்காக இரகசியமான சட்ரூம்களை பயன்படுத்தினார் என விசாரணையில் ஈடுபட்டுள்ளவர்களும் முஸ்லீம் சமூகத்தவர்களும் தெரிவித்துள்ளனர்.

ஜஹ்ரான் ஹாசிம் செல்வந்த சகோதரர்களான இகாம் இப்ராஹிம், இன்சாவ் இப்ராஹிமை தன்னுடன் இணைந்து செயற்பட்டு தனது தாக்குதலிற்கு நிதி உதவி வழங்குமாறு கோரினார் என  பொலிஸாரும் முஸ்லீம் சமூகத்தை சேர்ந்தவர்களும் தெரிவித்துள்ளனர்.

இரு சகோரர்களும் தங்கள் வர்த்தகத்தின் மூலம் கிடைத்த பணத்தை குண்டுவெடிப்பிற்காக பயன்படுத்தியிருக்கலாம் என விசாரணைகளுடன் தொடர்புபட்டுள்ள  பொலிஸ் அதிகாரியொருவர் தெரிவித்துள்ளார்.

முகநூல் யூடியுப் போன்றவற்றை பயன்படுத்தியே போதனைகள் இடம்பெற்றுள்ளன என அவர் மேலும் தெரிவித்துள்ளார்.

இப்ராஹிம் சகோதரர்கள் மார்க்கப்பற்றுள்ள முஸ்லீம்கள், ஆனால் அவர்கள்இரகசியதன்மை மிக்கவர்களாக காணப்பட்டனர் என அயலவர்கள் தெரிவித்துள்ளனர்.

முகநூலை பயன்படுத்தியே ஜஹ்ரான் இவர்களை தீவிரவாதமயப்படுத்தியுள்ளார் என கருதுகின்றோம் என மிதவாத சிலோன் தவ்ஹீத் ஜமாத் அமைப்பின் தலைவர் அப்துல் ராசிக் தெரிவித்துள்ளார்.

கடந்த சில வருடங்களாக அவர் முஸ்லீம்கள் அல்லாதவர்களை கொலை செய்யுங்கள் என வெளிப்படையாக கருத்து தெரிவித்து வந்துள்ளதை அவதானித்துள்ளோம் எனவும் அப்துல்ராசிக் தெரிவித்துள்ளார்.

அதிகாரிகளின் பார்வையிலிருந்து தப்புவதற்காக சமூக ஊடகங்களில் இரகசியமாக உரையாடுவதற்கான வழிமுறைகளை இவர்கள் பயன்படுத்தியுள்ளனர் விசாரணைகளுடன் தொடாபுபட்டுள்ளவர்களும் சமூக தலைவர்களும் தெரிவித்துள்ளனர்.

ஜஹ்ரான் இலங்கை முஸ்லீம்களின் மனங்களில் நஞ்சை விதைப்பதால் அவரின் முகநூலை அகற்றுமாறு நாங்கள் புலனாய்வு அமைப்புகளை கேட்டிருந்தோம் எனவும் அப்துல் ராசிக் தெரிவித்துள்ளார்.

எனினும் அவர் அந்த முகநூலை பயன்படுத்தட்டும் அதன் மூலம் அவரை கண்காணிக்க முடியும் என அதிகாரிகள் தெரிவித்தனர் எனவும் ராசிக் குறிப்பிட்டுள்ளார்.

ஜஹ்ரான் சமூக ஊடகங்களை பயன்படுத்தி மக்களின் மனதில் தனது கருத்துக்களை திணித்தார் என தெரிவித்துள்ள சிலோன் தவ்ஹீத் ஜமாத் அமைப்பின் பேச்சாளர் தவ்சீவ் அகமட் அவர் ஐஎஸ் பாணியிலான பிரச்சாரத்தை மேற்கொண்டார் , தற்கொலை குண்டுதாரிகள் அதனால் ஈர்க்கப்பட்டனர் எனவும் தெரிவித்துள்ளார்.