மைத்திரியுடனான சந்திப்பில் றிசாத்தும், ஹக்கீமும் பேசியது என்ன..?

-அன்ஸிர்-

ஜனாதிபதி மைத்திரிபால சிறிசேனவின் அழைப்பின் பேரில் ரவூப் ஹக்கீமும், றிசாத் பதியுதீனும் ஜனாதிபதியை சந்தித்து பேசியுள்ளனர்.

இதன்போது பாராளுமன்றத்தில் மகிந்த ராஜபக்ஸ பெரும்பான்மையை நிரூபிக்க ஆதரவு நல்குமாறு, ஜனாதிபதி மைத்திரிபால சிறிசேன குறிப்பிட்டுள்ளார்.

தாம் மகிந்தவை பிரதமராக்கியதன் நோக்கத்தையும், மைத்திரிபால  2 முஸ்லிம் கட்சித் தலைவர்களிடத்திலும்  தெளிவுபடுத்தியுள்ளார்.

இதையடுத்து மைத்திரியிடம் ஹக்கீமும், றிசாத்தும் தமது கருத்துக்களை முன்வைத்துள்ளனர்.

குறிப்பாக இந்த 2 முஸ்லிம் கட்சித் தலைவர்களும் தமக்கு அமைச்சுப் பதவி முக்கியமல்ல என வலியுறுத்தியுள்ளதுடன், தமக்கு முஸ்லிம் சமூகத்தின் நலன்களும், நாட்டு நலனுமே முக்கியம் என ஜனாதிபதியிடம் சுட்டிக்காட்டியுள்ளனர்.

கடந்த காலங்களில் தாம் மைத்திரிபால சிறிசேனவுக்கு ஆதரவளித்தமை, முஸ்லிம் சமூகத்தின் வாக்குகளை அவருக்கு பெற்றுத்தந்தமை, அவரது அமைச்சரவையில் செயற்பட்டமை போன்றவற்றையும் தெளிவுபடுத்தினர்.

அத்துடன் எந்தவொரு  தீர்மானத்தையும், தம்மால் தனித்து மேற்கொள்ள முடியாதெனவும் தமது சமூகத்துடன் இதுகுறித்து கலந்துரையாட வேண்டுமெனவும், முஸ்லிம் அமைப்புகளிடம் பேச வேண்டுமெனவும் சுட்டிக்காட்டியுள்ளனர்.

மேலும் நடைபெறவுள்ள மாகாண சபைத் தேர்தலில் பழைய முறையில் நடத்தப்பட வேண்டுமெனவும் வலியுறுத்தியுள்ளனர்.

அத்துடன் தற்போதுள்ள அரசியல் நெருக்கடி உடனடியாக தீர்க்கப்பட பாராளுமன்றம் கூட்டப்படுவதுடன், இந்த நெருக்கடி நிலையானது எந்தவைகயிலும் சமூகங்களுக்கிடையில் பிளவுகளை ஏற்படுத்தக்கூடாதெனவும், நாட்டில் நிலையான சமாதானமே தமது இலக்கு எனவும் குறிப்பிட்டுள்ளனர்