சோனி தொப்பி புரட்டுபவன் என, முஸ்லீம் அரசியல்வாதிகளே நிரூபித்துவிடாதீர்கள்

சோனி தொப்பி புரட்டுபவன். சுயனலக்காரன். நம்பிக்கைத் துரோகம் செய்பவன். பணத்தாசை பிடித்தவன்.துரோகம் என்பது அவனுக்கு கைவந்த கலை என்றெல்லாம் சிங்களப் பெரும்பான்மையினர் இலங்கை முஸ்லீம்களைப் பற்றி எண்ணிக் கொண்டிருப்பதற்கான மூல காரணம் நீங்கள்தான்.சமுகத்திற்காக நீங்கள் ஒருவரிடமும் விசுவாசமாக இருந்ததில்லை.

இன்று நடந்துகொண்டிருக்கும் அதிகாரப் போட்டியின் இறுதிக்காய் நகர்த்தலில் வெல்லப்போவது மஹிந்தவா ரணிலா என்பதைத் தீர்மானிக்கும் சக்தி சிறீலங்கா முஸ்லிம் காங்கிறசிடமும் அகில இலங்கை மக்கள் காங்கிறசிடமும் இறுதியில் வந்திருக்கிறது.தமிழ் தேசியக் கூட்டமைப்பு ரணிலுக்கு ஆதரவளிப்பதாகச் சொன்னதன் பின்னர் மஹிந்த அணிக்கு இருக்கும் ஒரே ஒரு நம்பிக்கை இலங்கை முஸ்லீம்கள்தான். மஹிந்தவை வெல்லவைப்பதா தோற்க வைப்பதா என்பதைத் தீர்மானிப்பவர்கள் இலங்கை முஸ்லீம் அரசியல்வாதிகள்தான். அதாவது முஸ்லீம் காங்கிறசினரும்,மக்கள் காங்கிறசினரும்தான்.தனியே ஒரு கட்சி போனால் ஆதரவு குறையும் என்பதால் இராண்டு கட்சிகளும் யார் முதலில் போவது என்று பார்த்துக் கொண்டும் பேசிக் கொண்டும் இருக்கிறார்கள்.

இலங்கையின் பிரஜை என்ற ரீதியிலும், முஸ்லிம் என்ற ரீதியிலும்,கிழக்கைச் சேர்ந்தவன் என்ற ரீதியிலும் ஒன்றைச் சொல்லிக் கொள்ள விரும்புகிறேன்.நன்றாகக் கேட்டுக் கொள்ளுங்கள்.

இன்று இலங்கையில் நடைபெற்றுக் கொண்டிருக்கும் அரசியல் நிலவரம் இலங்கையின் அரசியல் யாப்புக்கு முரணானது,மக்களாணைக்கு முரணானது,ஜனனாயகத்திற்கு முரணானது,சட்டவாட்சிக்கு முரணானது.இது உலகறிந்த உண்மை.

ஜூடாசையும், புரூட்டசையும்,எட்டப்பனையும் மிஞ்சிய ஒரு அரசியல் விபச்சாரி மைத்திரிபால சிரிசேன செய்திருக்கும் இந்த ஜனனாயக விரோத,பாசிஸ,சர்வதிகார செயலை முழு உலகும் கண்டித்துக் கொண்டிருக்கிறது.மஹிந்த வென்றால் நான் மண்ணுக்குள் எட்டடி கீழே கிடப்பேன் என்று சொன்ன மைத்திரி தன்னைக் கொத்த வந்த  ஒரு நச்சுப்பாம்பிற்கு மடியில் வைத்துப் பால் கொடுக்கிறார்.அது தன்னையும் கடிக்கும் என்று தெரியாத அறிவிலியாகிவிட்டார் அவர்.

பாராளுமன்றத்தை முடக்கிவிட்டு உறுப்பினர்களைப் பேரம் பேசுவது தெட்டத் தெளிவாகிவிட்டது. அமைச்சுப் பதவிக்கும் பணத்திற்கும் நாக்கைத் தொங்கப் போட்டுக் கொண்டு நாயாக அலைகிறார்கள் அரசியல்வாதிகள். சுதந்திரத்திற்குப் பின்னரான இலங்கை வரலாற்றில் இப்படி ஒரு கேவலமான செயலை மைத்திரியும் மஹிந்தவும் அரங்கேற்றியிருக்கிறார்கள்.

இது ரணிலா மஹிந்தவா என்ற பிரச்சினை அல்ல.முதலில் அதைப் புரிந்து கொள்ளுங்கள். இவர்கள் இருவரும் முஸ்லிம்களுக்கு ஆபத்தானவர்கள்தான். ஆனால் இப்பொழுதைய பிரச்சினை மஹிந்தவா ரணிலா என்பது அல்லவே அல்ல.இலங்கையின் யாப்பைக் குப்பைத் தொட்டியில் வீசி எறிந்து விட்டு,நம்பிக்கைத் துரோகம் செய்துவிட்டு பின்கதவு வழியாக ஆட்சியைப் பிடிக்கும் பதவி வெறி கொண்ட ஓ நாய்களின் ஊளைச் சத்தத்தை நிறுத்தி ஜனனாயகத்தையும் சட்டத்தையும் நிலை நிறுத்தும் தருணம் இது.

இந்த நாட்டின் யாப்பை மீறி,மக்கள் கொடுத்த ஆணையை வீசி எறிந்துவிட்டு,அதிகாரத்தை விரும்பிய மாதிரிக் கையாள நினைக்கும் அரசியல்வாதிகளுக்கு எதிராக மக்கள் தங்கள் எதிர்ப்பைத் தெரிவிக்கிறார்கள்.மஹிந்தவை ஆதரிப்பவர்கள் கூட அவர் அதிகாரத்தைப் பெற்ற முறையைத் தவறென்கிறார்கள்.தமிழ்த் தேசியக் கூட்டமைப்பும் ,ஜேவிபியும் கூட இந்த யாப்பு மீறலுக்கு எதிராக ஒன்றுபட்டு நிற்கிறார்கள்.

இது ரணில் மஹிந்த போராட்டம் அல்ல.இது ஜனனாயகத்திற்கும் சர்வதிகாரத்திற்கும் எதிரான போராட்டம்.மஹிந்த பிரதமராக இருந்து ரணில் இப்படிச் செய்திருந்தால் ரணிலை எதிர்த்து மஹிந்தவை ஆதரிக்க வேண்டியிருந்திருக்கும்.ரணில் அரசியலுக்குப் பொருத்தமற்றவர்.அவரை சட்ட ரீதியாகப் பதவி விலக்க வேண்டும்.நம்பிக்கை இல்லாப் பிரேரணையைக் கொண்டு வந்து அவரை பதவி விலக்கி விட்டு மஹிந்த பெரும்பான்மை காட்டி ஆட்சிக்கு வந்திருந்தால் அது சரியானது.ரணில் பிழையானவர் என்றால் அவரை சட்ட ரீதியாக விலக்குவதற்கு துணை போங்கள் அது பிரச்சினை அல்ல.யாப்பை மீறி இலங்கையை சர்வதிகார ஆட்சிக்கு கொண்டு செல்லும் முனைப்புகளுக்கு துணை போகாதீர்கள்.

இந்த அதிகாரத் துஷ்பிரயோகத்திற்கு எதிராக முழு நாடும் ஒருபக்கமும் மஹிந்த அணியினர் ஒரு பக்கமும் நிற்கிறார்கள்.

முஸ்லீம் அரசியல்வாதிகளாகிய நீங்கள் தப்பித் தவறி மஹிந்தவிடம் போய் ஒட்டிக் கொண்டு அவருக்கு எதிராகக் கொண்டுவரப்படும் நம்பிக்கை இல்லாத் தீர்மானத்தை தோற்கடித்து மஹிந்தவை வெற்றி பெற வைப்பீர்களாக இருந்தால் இலங்கை வரலாற்றில் கரி எழுத்துக்களால் எழுதப்படும் துரோகிகளாக இலங்கை முஸ்லீம்கள் அடையாளப்படுத்தப்பட்டுவிடுவார்கள்.இலங்கை முஸ்லீம்களும் அரசியல் யாப்பை மீறுபவர்களோடு உடன்படுபவர்கள் என்று வரலாறு உங்களைப் பழி சொல்லும்.ஐம்பது கோடிக்கு சோரம் போனவன் சோனி என்று எம்மை வரலாறு பழிக்கும்.சோனி தொப்பி புரட்டிதான் என்பது ஊர்ஜிதமாகிவிடும். ஒவ்வொரு முஸ்லிமும் வெட்கித் தலை குனிய வரும்.

இந்த வரலாற்றுத் துரோகத்தை இழைத்து விடாதீர்கள்.சுயனலத்திற்கப்பால் சரியோடு நில்லுங்கள்.இலங்கை முஸ்லிம்கள் உண்மையின் பக்கம் நின்றார்கள்,இலங்கை யாப்பை மதித்தார்கள் என்று நாம் பெருமைப்படலாம்.

முஸ்லீம் அரசியல்வாதிகளே ஒரு வரலாற்றுத் துரோகத்தின் பங்காளியாகாதீர்கள்.

Raazi Muhammeth Jabir