"ஜாமிஆ நளீமிய்யா பற்றி, ஜப்னா முஸ்லிம் இணையத்தின் பொறுப்பு துறத்தல்..."

அஸ்ஸலாமு அலைக்கும்...!

ஜப்னா முஸ்லிம் இணையத்தில் கடந்த 10.08.2018 அன்று ஷைக் பட்டதாரிகளா..?  அரபு சேர் பட்டதாரிகளா..?? என்ற தலைப்பில் http://www.jaffnamuslim.com/2018/08/blog-post_153.html சகோதரர் ஸாஹிர் ஹுஸைன் கட்டுரை ஒன்றை எழுதியிருந்தார்.

குறித்த கட்டுரை, முஸ்லிம் சமூகத்தில் பல வாதப்பிரதி வாதங்களை ஏற்படுத்தியதை நாம் அறிவோம்.

ஜப்னா முஸ்லிம் இணையம் ஆரம்பிக்கப்பட்ட காலத்திலிருந்து அது, ஜாமீஆ நளீமிய்யா பற்றிய பல செய்திகளை, கட்டுரைகளை வெளியிட்டுள்ளது. அதன் விரிவுரையாளர்களின் கட்டுரைகளை தாராளமாக பிரசுரித்துள்ளது. பல நளீமிக்களுடன் மிக சுமூக உறவும் இன்றுவரை ஜப்னா முஸ்லிம் இணையத்திற்கு தொடருகிறது.

மேலும் நளீமிய்யா பற்றியும், அங்கு படித்த, படிக்கின்றவர்கள் மற்றும் படித்துக் கொடுக்கின்றவர்கள் குறித்தும் இதுவரை ஜப்னா முஸ்லிம் இணையத்திற்கு மிகுந்த மரியாதையும், மதிப்பும் இருந்து வருகிறது.

எனினும் தற்போது மேற்சொன்ன கட்டுரையை பதிவேற்றி 3 நாட்கள் ஆகிவிட்ட நிலையில்,  ஜப்னா முஸ்லிம் இணையத்திற்கு இன்று 12.08.2018 சட்டத்தரணி ஒருவரிடமிருந்து ஈமெயில் மூலமாக கடிதம் அனுப்பப்பட்டுள்ளது.

அதாவது மேற்குறித்த அந்தக் கட்டுரையை ஜப்னா முஸ்லிம் இணையத்திலிருந்து முற்றாக அகற்ற வேண்டும் என்பதாகும்.

முதலில் அந்த சட்டத்தரணிக்கும், வாசகர்களுக்கும் ஒரு விடயத்தை மிகத்தெளிவாக சுட்டிக்காட்ட விரும்புகிறோம்.

அதாவது ஜப்னா முஸ்லிம் இணையம் என்பது, தொழில்சார் ஊடகத் தகைமைகளுடன், ஊடகநெறிகளை கடைபிடித்து, சுயாதீனமாக செயற்படும் முஸ்லிம் சமூகம் சார் ஒரு இணையத்தளமாகும்.

ஜப்னா  முஸ்லிம் இணையம் பதிவேற்றும் கட்டுரையிலோ அல்லது செய்தியிலோ உங்களுக்கு உடன்பாடு இல்லையாயின், அதனை நீங்கள் வாசகர் உரிமையின் கீழ் மறுக்கலாம் அல்லது நிராகரிக்கலாம். 

அத்துடன் உங்கள் மறுப்பையும், நிராகரிப்பையும் நீங்கள் உத்தியோகபூர்வமாக ஜப்னா முஸ்லிம் இணையத்திற்கு அனுப்பி வைப்பீர்களாயின் அதனை முன்னுரிமை அடிப்படையில் பதிவேற்றவும் நாங்கள் தயாராகவுள்ளோம்.

பிழையும், தவறும் எமது பக்கமாயின் பகிரங்க மன்னிப்புக் கேட்கவும் நாம் தயாராக இருக்கிறோம்.

இதற்கு மேலதிகமாக ஜப்னா முஸ்லிம் இணையத்தின் கீழ் பகுதியில் முக்கிய குறிப்பு என்ற தலைப்பிட்டு jaffna muslim இணையத்தில் வெளியாகும் கட்டுரைகளுக்கு அவற்றை எழுதியவர்களும், செய்திகளுக்கு அவற்றை அனுப்பியவர்களும், விளம்பரங்களின் நம்பக தன்மைக்கு அந்த விளம்பர நிறுவனங்களும், பேஸ்புக்கில் தெரிவிக்கும் கருத்துக்களுக்கு அவற்றை பதிவிட்டவர்களுமே பொறுப்பு. என்றும் சுட்டிக்காட்டியுள்ளோம்.

www.jaffnamuslim.com

அத்துடன் குறித்த கட்டுரை சரியா பிழையா என்று தீர்மானிக்க ஜப்னா முஸ்லிம் இணையம் நீதிமன்றமோ அல்லது அதன் ஆசிரியர் நீதிபதியோ அல்ல.

இதுவே இலங்கை முஸ்லிம் சமூகத்தின் அதீத நம்பிக்கையைப் பெற்ற, ஜப்னா முஸ்லிம்  இணையத்தின் நிலைப்பாடு ஆகும்.

பிரதம ஆசிரியர்

ஜப்னா முஸ்லிம் இணையம்

12.08.2018