தமிழர் பிரச்சினை தொடர்பில், முஸ்லிம் அரசியல்வாதிகள் குரல்கொடுப்பது இல்லை

தற்போதைய ஆட்சியில் தமிழர்களுக்கு இதுவரையில் தீர்வுகள் வழங்கப்படாவிட்டாலும் தமிழ் மக்கள் நிம்மதியாக வாழும் நிலையுள்ளதாகவும், இந்த நிலைமையினை மகிந்த ராஜபக்ஸ குழுவினர் ஆட்சிக்கு வந்தால் தமிழ் பேசும் மக்கள் எதிர்பார்க்க முடியாது எனவும் மட்டக்களப்பு மாவட்ட தமிழ் தேசிய கூட்டமைப்பின் நாடாளுமன்ற உறுப்பினர் எஸ்.வியாழேந்திரன் தெரிவித்தார்.

மட்டக்களப்பில் உள்ள அவரது அலுவலத்தில் இன்று மாலை நடைபெற்ற செய்தியாளர் சந்திப்பிலேயே அவர் இதனை தெரிவித்தார்.

நல்லாட்சி அரசாங்கம் தன்னிடம் உள்ள குறைபாடுகளை திருத்திக்கொண்டு முன்னோக்கி செல்வதற்கான நடவடிக்கையினை முன்னெடுக்காவிட்டால் அது பெரும் சரிவினை ஏற்படுத்தும் நிலையேற்படும் எனவும் அவர் தெரிவித்தார்.

தற்போதுள்ள அரசாங்கத்தின் பலவீனங்களை காட்டிக்கொண்டு மீண்டும் ஆட்சியை கைப்பற்ற நினைப்போருக்கு அந்த சந்தர்ப்பத்தினை வழங்காமல் தமது பலவீனங்களை திருத்திக் கொள்ள வேண்டும் எனவும் அவர் தெரிவித்தார்.

முஸ்லிம் சமூகம் மீது என்றும் இனவாதத்தினைக் கொண்டிருக்கவில்லையெனவும் அச்சமூகத்தில் உள்ள சில அரசியல்வாதிகளே தன்னை இனவாதியாக காட்டமுற்படுவதாகவும் அவர் குற்றஞ்சாட்டினார்.

தமிழ் மக்களின் வாக்குகளைப்பெற்று நாடாளுமன்ற உறுப்பினர்களாகவும் அமைச்சர்களாகவும் வரும் சில முஸ்லிம் அரசியல்வாதிகள் தமிழ் மக்களின் பிரச்சினை தொடர்பில் குரல்கொடுப்பது இல்லையெனவும் அவர் குற்றஞ்சாட்டினார்.

நல்லாட்சியை ஏற்படுத்துவதில் தமிழ் ஊடகங்கள் பாரிய பங்காற்றிய நிலையில் இன்று தமிழ் ஊடகத்துறையினை அச்சுறுத்தும் செயற்பாடுகள் முன்னெடுக்கப்பட்டுள்ளதாகவும் இது தொடர்பில் ஜனாதிபதி தலையிட வேண்டும் எனவும் இதன்போது பாராளுமன்ற உறுப்பினர் வியாழேந்திரன் கோரிக்கை விடுத்தார்.