மெசுட் ஓஸிலுக்கு, ஆதரவு பெருகுகிறது, எர்துகானும் தொலைபேசியில் பேச்சு

புலம்பெயர்ந்தவன் என அவமானப்படுத்தப்பட்டதால் ஓய்வு முடிவை அறிவித்த ஜேர்மன் கால்பந்து வீரர் மெசுட் ஒஸிலை, துருக்கி நாட்டு ஜனாதிபதி பாராட்டியுள்ளார்.

ஜேர்மனி கால்பந்து அணி வீரர் மெசுட் ஒஸில்(29), ரஷ்ய உலகக் கிண்ண கால்பந்து போட்டியில் விளையாடினார். ஆனால், இவரது பூர்வீகம் துருக்கியாகும்.

ரஷ்ய உலகக் கிண்ண கால்பந்து தொடருக்கு முன்பாக, இவர் துருக்கி நாட்டு ஜனாதிபதி எர்டோகனை சந்தித்திருந்தார். இந்த சந்திப்பின் போது எடுக்கப்பட்ட புகைப்படம் வெளியாகி, ஜேர்மனி அணிக்காக உண்மையில் அவர் விசுவாசமாக விளையாடினாரா என்று கேள்வி எழுப்பப்பட்டது.

அத்துடன், ஜேர்மனி அணியின் முதன்மை அதிகாரிகள் சிலர் அந்த சந்திப்பு குறித்து விளக்கம் கேட்டார்கள். மேலும், அவர் புலம்பெயர்ந்தவன் என்று தொடர்ந்து அவமானப்படுத்தப்பட்டதால் ஓய்வு பெறுவதாக அறிவித்தார்.

இந்நிலையில், துருக்கி நாட்டு ஜனாதிபதி எர்டோகன் இதுகுறித்து கூறுகையில் ‘நான் மெசுட் ஒஸிலுடன் தொலைபேசியில் பேசினேன். அவருடைய அறிக்கை முழுவதும் நாட்டுப்பற்றை போற்றும் வகையில் இருந்தது.

இது பாராட்டக்கூடிய நடத்தையாகும். நான் ஓஸிலின் கண்களில் முத்தமிட்டேன். ஜேர்மனி அணியின் வெற்றிக்கு பக்க பலமாக இருந்த ஒரு இளைஞருக்கு எதிரான இதுபோன்ற இனவெறியை ஏற்றுக் கொள்ள முடியாது’ என தெரிவித்துள்ளார்.

2

புலம்பெயர்ந்தவன் எனக்கூறி தொடர்ந்து அவமானப்படுத்தப்பட்டதால் சர்வதேச போட்டிகளிலிருந்து ஓய்வு பெறுவதாக அறிவித்துள்ள ஜேர்மன் கால்பந்து வீரரான மெசுட் ஓஸிலுக்கு உள்ளூரில் ஆதரவு பெருகி வருகிறது.

வெற்றி பெற்றால் தன்னை ஜேர்மன் வீரர் என்றும், தோல்வியடைந்தால் புலம்பெயர்ந்தவன் என்றும் விமர்சிப்பதாக அவர் வருத்தத்துடன் தெரிவித்திருந்தார்.

இந்நிலையில் அவர் ஓய்வு பெறுவதாக அறிவித்திருப்பது அவர் வளர்ந்த Gelsenkirchen பகுதி மக்களை அதிர்ச்சியடையச் செய்துள்ளது.

8 வயது Baranக்கு அப்போதுதான் மெசுட் ஓஸில் ஓய்வு பெற்ற செய்தி கிடைக்கிறது. என்ன?! அப்படியானால் மெசுட் ஓஸில் இனி எந்த நாட்டுக்காக விளையாடப் போகிறார் என்று அதிர்ச்சியுடன் கேட்கிறான் அவன்.

2009ஆம் ஆண்டு ஜேர்மனிக்காக விளையாட ஆரம்பித்ததிலிருந்து ஓஸில் 92 கேப்களையும் 23 கோல்களையும் பெற்றுள்ளார்.

2014ஆம் ஆண்டு பிரேசிலில் நடைபெற்ற உலகக் கோப்பை கால்பந்து போட்டியில் கோப்பையையும் அவர் வென்றார்.

இந்நிலையில் ஜூலை மாதம் 22ஆம் திகதி சர்வதேச போட்டிகளிலிருந்து ஓய்வு பெறுவதாக ஓஸில் அறிவித்தார்.

அவர் வளர்ந்த Gelsenkirchen பகுதி மக்கள் தொடர்ந்து அவரைப் புகழ்ந்தும் அவருக்கு தங்கள் ஆதரவைத் தெரிவித்தும் வருகிறார்கள்.

ஜேர்மானியர்கள் மோசமாக விளையாட அனுமதி இருக்கும் இந்த நாட்டில் தோல்வி அடைந்தால் மட்டும் புலம்பெயர்ந்த ஒரு ஜேர்மானியர் மீது பழியைப் போட்டு விடுவார்கள் என்கிறார் Gerd K என்பவர்.

துருக்கியில் நாங்கள் ஜேர்மானியர்கள், இங்கு நாங்கள் ஜேர்மன் துருக்கியர்கள் அல்லது ஏதோ ஒன்று, எங்களுக்கு அங்கும் அங்கீகாரம் கிடையாது, இங்கும் அங்கீகாரம் கிடையாது, நாங்கள் என்ன செய்வது என்கிறார், Ihsan Cukur என்னும் துருக்கிய பின்னணி கொண்ட ஜேர்மானியர்.