அரைக் காற்சட்டை அணிய, ஞானசாரர் மறுப்பு - சிறையிலும் பிரச்சாரத்தை தொடர்கிறார்
சந்தியா எக்னெலிகொடவை, நீதிமன்றத்துக்குள் வைத்து அச்சுறுத்திய குற்றச்சாட்டில், ஞானசார தேரருக்கு நேற்றுமுன்தினம், ஆறு மாதங்கள் அனுபவிக்கும் வகையில் ஒரு ஆண்டு கடூழியச் சிறைத்தண்டனையை ஹோமகம நீதிமன்றம் வழங்கியது.
இதையடுத்து, அவர் வெலிக்கடைச் சிறைச்சாலையில் அடைக்கப்பட்டார்.
சிறைச்சாலையில் தண்டனைக் கைதிகள் வழக்கமாக அணியும் அரைக் காற்சட்டையை ஞானசார தேரர் அணியவில்லை. தொடர்ந்தும் அவர் காவி உடையுடனேயே இருந்து வருகிறார்.
அவர் சிறைக் கைதிகள் அணியும், அரைக்காற்சட்டையை அணிவதில் இருந்து விலக்கு அளிக்குமாறு விண்ணப்பித்துள்ளதாக கூறப்படுகிறது.
சிறைச்சாலையில் நேற்று ஞானசார தேரரைச் சந்திக்க யாரும் அனுமதிக்கப்படவில்லை.
அவரை மருத்துவர் ஒருவர் பரிசோதித்து, பாதத்தில் இருந்த காயங்களுக்கு சிகிச்சை அளித்தார்.
ஞானசார தேரருடன், 14 சிறைக்கைதிகள் ஒரே அறையில் அடைக்கப்பட்டுள்ளனர்.
அதேவேளை, ஞானசார தேரர் சிறைச்சாலையில், காவி உடையை அணிவதற்கு அனுமதி அளிக்குமாறு சிறைச்சாலை அதிகாரிகளுக்கு உத்தரவிடக் கோரி, சிறிலங்கா அதிபர் மைத்திரிபால சிறிசேனவுக்கு, நாடாளுமன்ற உறுப்பினர் விமல் வீரவன்ச கடிதம் எழுதியுள்ளார்.
இதனிடையே, ஹோமகம நீதிமன்றத்தினால் அளிக்கப்பட்ட தீர்ப்புக்கு எதிராக, ஞானசார தேரரின் சட்டவாளர்கள், மேல்முறையீட்டு நீதிமன்றத்தில் மனுத் தாக்கல் செய்துள்ளனர் என்பது குறிப்பிடத்தக்கது.
சிறைத்தண்டனை விதிக்கப்பட்டுள்ள கலகொட அத்தே ஞானசார தேரர், வெலிக்கடை சிறைச்சாலையின் ஆர் விடுதியில், மத அனுஸ்டான சடங்குகளில் ஈடுபட்டு வருவதாக தெரிவிக்கப்படுகின்றது.
அந்த விடுதியில் தடுத்துவைக்கப்பட்டுள்ள ஏனைய சிறைக்கைதிகளுக்கும் தேரர், நேற்று இரவு பிரசங்கம் செய்துள்ளதாக, சிறைச்சாலை வட்டாரத் தகவல்கள் தெரிவிக்கின்றன.
அதன்பிறகு, தேரர் அவர்களுக்காக ஒரு தியான நிகழ்ச்சியை நடத்தியுள்ளதாகவும் தெரிவிக்கப்படுகின்றது.
Post a Comment