முஸ்லிம் என்பதால் இனவாதிகள் வைக்கும் பொறி, நாசகாரத்தை அரங்கேற்ற சதி, மொட்டுக்கும் தொடர்பு

சிங்களத்தில்: ரசிக குணவர்தன

தமிழில்: ஏ.எல்.எம்.சத்தார்

இபலோகம பிரதேசத்தில் தொல்பொருள் சின்னங்கள் அழித்து நாசமாக்கப்பட்டுள்ளதாகத் தெரிவிக்கப்படுகிறது. அப்பகுதி பிரதேச செயலாளராகக் கடமையாற்றும் ஸஜீதா பானு தனது இன, மத தீவிரவாதச் செயற்பாட்டினால் இவ்வாறு தொல்பொருட்களை அழித்து வருவதான கருத்தாடல் இப்போது பெரும் பரபரப்பை ஏற்படுத்தியுள்ளது. தொலைக்காட்சி ஊடகங்கள் மற்றும் ஒரு சில அரசியல்வாதிகள், காவியுடை தரித்த தீவிரவாத அமைப்புகளின் செயலாளர்கள் போன்றோர் பரப்புரை செய்வது போன்று குறித்த காணியில் தொல்பொருட்கள் அழிக்கப்பட்டுள்ளனவா என்பதைக் கண்டு வருவதற்கு நாம் ( ராவய ஊடகவியலாளர்) இபலோகமவுக்குச் சென்றோம்.

இபலோகம விடயம் இரண்டு ஊடக நிறுவனங்களாலே ஊதிப் பெருப்பிக்கப்பட்டு வருகின்றது. அவர்களால் சோடிக்கப்பட்ட அடிப்படைவாத கருத்துகள்தான் பலரதும் கவனத்தை ஈர்த்தன. அடிப்படை வாதிகள் எல்லா இடங்களிலும் காணப்படுகின்றனர். அவர்கள் எந்தவொரு விடயத்தையும் தம் இலக்கை அடைந்து கொள்வதற்காக திசைதிருப்பிக் கொள்வதில் சமர்த்தர்கள். இபலோகம விடயமும் மேற்படி இன, மத வாதிகளின் தேவையை நிறைவேற்றிக் கொள்வதால் எழுந்த பிரதிபலிப்பாகும். பிரதேச செயலாளர் ஒரு முஸ்லிம் பெண் என்பதால் அது இனவாதிகளின் வாய்களுக்கு அவலாகிவிட்டது.

பஸ் பயணியின் கூற்று

நாம் கெகிராவையிலிருந்து இபலோகமவுக்குச் செல்லும் பஸ் வண்டியில் பயணிக்கும்போது அருகே அமர்ந்திருந்த ஓர் ஊர்வாசியிடம் இது விடயமாகக் கதையைத் தொடுத்தோம். அவர் கூறியதாவது “மனிதர்களுக்கு வாய்க்கு வந்த கதைகளையெல்லாம் பரப்ப முடியும். இப்படிக் கிளப்பப்பட்ட கதையால் எல்லோரும் பிரதேச செயலாளர் மீதே வசைபாடுகின்றனர். செயலாளர் என்ற பதவியில் இருந்தபோதும் அவர் மாத்திரம் இதற்கு உடந்தை என்று எடுத்த எடுப்பிலேயே குற்றம் சுமத்த முடியாது. சில சமயம் புதையல் தோண்டும் முயற்சியாகவும் இருக்கலாம். எப்படியிருந்த போதிலும் தொலைக்காட்சியூடாகத்தான் நாம் ஒரு சில விடயங்களைக் கண்டறிந்து கொண்டோம்."

இபலோகம பிரதேசத்திலுள்ள குறைந்த வருமானம் பெறும் 48 குடும்பங்களுக்கு வீடுகளை நிர்மாணித்துக் கொடுப்பதற்காக காணியொன்றை ஒதுக்கித் தரும்படி வீடமைப்பு அபிவிருத்தி அதிகார சபையால் இபலோகம பிரதேச செயலாளரிடம் வேண்டுகோள் ஒன்று விடுக்கப்பட்டுள்ளது. அதன்போது புளியங்குளம் துலான கிராம சேவை அதிகாரியால் பரிந்துரைக்கப்பட்ட 10 ஏக்கர் காணியொன்று இபலோகம பதில் நிருவாக அதிகாரி மூலம் குறித்த காணியை சிபாரிசு செய்து வீடமைப்பு அபிவிருத்தி அதிகார சபை அநுராதபுர முகாமையாளருக்கு கடிதம் ஒன்று 2017.11.23 அன்று அனுப்பப்படுகிறது. அக்கடிதத்தில் பரிந்துரைக்கப்பட்ட காணியின் எல்லைகள் தெளிவாகக் குறிப்பிடப்பட்டுள்ளன. அதன்படி வடக்கே பூகொல்லாகம, தெற்கெ அலுத்புளியங்குளம் மேற்கேயும் பூகொல்லாகம கிழக்கே தொல்பொருள் பாதுகாப்பு வலயம் என்பன எல்லைகளாக குறிக்கப்பட்டுள்ளன. இதன் மூலம் இவர்களால் எல்லையிடப்பட்டுள்ள காணி தொல்பொருள் பாதுகாப்பு வலயத்திற்குட்படுத்தப்பட்டதல்ல என்பது நன்கு தெளிவாகிறது. அத்துடன் அக்கடிதத்தில் எந்த இடத்திலேனும் காணிக்கான அனுமதியோ பொறுப்புச் சாட்டலோ வழங்கப்பட்டிருக்கவில்லை. அதில் எல்லைகள் குறிக்கப்பட்டு கோரப்பட்டுள்ள கருத்திட்டத்திற்கு உகந்த காணி என்ற பரிந்துரை மாத்திரமே வழங்கப்பட்டுள்ளது என்பதும் நன்கு தெரியவருகிறது.

அத்துடன் கிராம சேவை அதிகாரியால் பரிந்துரை வழங்கப்பட்டுள்ள காணி தொடர்பான கடிதத்துக்கு பிரதேச செயலாளரின் அடிக்குறிப்பில் “இதற்காக இணைப்புக் குழுவின் இணைத் தலைவர்களின் இணக்கப்பாட்டுடன் இந்தப் பிரேரணையை வீடமைப்பு அபிவிருத்தி அதிகார சபைக்கு சமர்ப்பிக்கவும்” என்றே பிரதேச செயலாளர் சஜீதா பானு குறிப்பிட்டுள்ளார். ஆனால் குறித்த பரிந்துரைக் கடிதத்தை வீடமைப்பு அபிவிருத்தி அதிகார சபைக்கு அனுப்பும் போது பதில் நிருவாக அதிகாரி பிரதேச செயலாளரின் மேற்படி குறிப்பின் மீது எத்தகைய கவனமும் செலுத்தாமலே அனுப்பியுள்ளார். அதனால் பிரதேச செயலாளர் குறிப்பிட்டிருந்ததற்கிணங்க இணைப்புக் குழுவின் இணைத் தலைவர்களின் அங்கீகாரமின்றியே குறித்த கடிதம் உரிய வீடமைப்பு அபிவிருத்தி அதிகார சபையைச் சென்றடைகிறது.

இது இவ்வாறிருக்கையில் 2017 டிசம்பர் 19 ஆம் திகதி பொது மாகாண தின கூட்டத்தின்போது பிரதேச செயலாளரினால் இலக்கம் 516 புளியங்குளம் துலானயில் உள்ள, அதாவது வீடமைப்பு அபிவிருத்தி அதிகார சபைக்குச் சிபாரிசு செய்யப்பட்டுள்ள காணி தொடர்பாக செயலாளர் கேள்வி எழுப்பினார். அதன்போது இக்காணி விடயமாக எவரும் எத்தகைய எதிர்ப்பையும் வெளியிடவில்லை. பின்னர் அப்போது கமத்தொழில் அமைச்சராகவிருந்த துமிந்த திஸாநாயக்க மூலம் பிரதேச செயலாளருக்கு 2018 மார்ச் 12 ஆம் திகதி கடிதம் ஒன்று அனுப்பப்படுகிறது. குறித்த காணி பகிர்ந்தளிப்பதில் பாரபட்சம் நிகழ்வதாகவும் அதனால் உரிய பணியை இடைநிறுத்தும் படியும் அக்கடிதத்தில் கேட்கப்பட்டிருந்தது. இக்கடிதம் பிரதேச செயலகத்தில் வந்தடைந்த திகதியாக ஏப்ரல் 4ஆம் திகதி என்று குறிக்கப்பட்டுள்ளது. உடனே மறுநாள் ஏப்ரல் 5 ஆம் திகதி மேற்படி விடயம் குறித்து பிரதேச செயலாளரால் வீடமைப்பு அதிகார சபை மாவட்ட முகாமையாளருக்கு கடிதம் அனுப்பப்படுகிறது. ஆனால் அக்கடிதம் கிடைக்கவில்லையென்று இப்போது தெரிவிக்கப்படுகிறது.

இந்த நிலையில்தான் வீடமைப்பு அபிவிருத்தி அதிகார சபையால் பரிந்துரைக்கப்பட்ட காணியில் 2018 இல் நிர்மாணப் பணிகள் ஆரம்பிக்கப்பட்டன. இவர்களது கைகளிலே எத்தகைய அனுமதியும் வைத்துக்கொள்ளாத நிலையிலே வேலைகள் முடுக்கிவிடப்பட்டன. காணியின் எல்லைகள் அளவிடவோ அல்லது பொறுப்பேற்றலோ இன்றியே காரியங்கள் நடந்துள்ளன. இது அரசின் கருத்திட்டம் என்பதால் பிரதேச செயலாளரும் இதனைத் தடுத்து நிறுத்துவதில் கரிசனை காட்டவில்லை.

அரசியல்வாதியும் அடிக்கல் நடலும்

வீடமைப்பு கருத்திட்டத்தை முன்னெடுப்பதற்காக 2018 ஏப்ரல் 9 ஆம் திகதி அடிக்கல் நடும் வைபவம் நடைபெற்றது. ஐ.தே.கட்சி பாராளுமன்ற உறுப்பினர் சந்திம மஹிந்தசோமவின் தலைமையில் இந்த வைபவம் நடந்தேறியது. இதற்கு பிரதேச செயலாளரும் அழைக்கப்பட்டிருந்தார். ஆனால் அவரால் அதில் கலந்து கொள்ள இயலாது போனது. அடிக்கல் நடப்பட்ட கையோடு புல்டோஸர் இயந்திரத்துடன் காணி துப்பரவு பண்ணும் வேலைகள் துரிதமாக நடைபெற்றன. அத்துடன் குறிக்கப்பட்ட எல்லையையும் தாண்டி நடவடிக்கைகள் முன்னகர்ந்தன. இது தொல்பொருள் நிலப்பரப்பையும் ஊடுருவவே செய்தது. அவ்விடத்தில் அரசியல்வாதி சந்திம மஹிந்தசோமவும் இருந்துள்ளார். இச்செயற்பாட்டைக் கண்ட ஊர்வாசிகள் எதிர்ப்பை வெளியிட்டுள்ளனர். அரசியல் வாதி இம்மக்களைத் திட்டி அச்சுறுத்தியதாக பிரதேசவாசிகள் கூறுகின்றனர்.குறித்த இடத்திற்கு நாம் சென்று அவதானித்தபோது காணி துப்புரவு பண்ணும் வேலைதான் மேற்கொள்ளப்பட்டிருப்பதை உணர முடிந்தது. அங்கு தொல்பொருள் சின்னங்களை சேதப்படுத்தும் எண்ணத்துடன் வேலைகள் நடைபெற்றதற்குரிய சாத்தியக்கூறுகள் எதனையும் எங்களால் காணமுடியவில்லை.

தவறாகப் புரிந்துகொண்ட பரிந்துரையும் அனுமதியும்

வீடமைப்பு அபிவிருத்தி அதிகார சபையின் தலைவரிடம் இதுவிடயமாக வினவியபோது பிரதேச செயலாளரின் அனுமதியுடனேதான் நாம் பணியை ஆரம்பித்தோம் என்று அவர் கூறினார். அதற்கான அனுமதிக் கடிதத்தை நாம் எடுத்துப் பார்த்தோம் அது பிரதேச செயலாளரால் வழங்கப்பட்ட பரிந்துரைக் கடிதமாகவே உள்ளதை நாம் கண்டு கொண்டோம். இதுதான் சிக்கலுக்குக் காரணம் என்பதனையும் உணர்ந்தோம். ‘பரிந்துரை’ யை ‘அனுமதி’ என்று புரிந்து கொண்டதன் விபரீதம் நன்கு புலனாகியது. பிரதேச செயலாளரின் பரிந்துரைக் குறிப்பிலுள்ள விடயங்களை கருத்திற்கொள்ளாது வீடமைப்பு அபிவிருத்தி அதிகார சபை எத்தகைய பொறுப்பெடுப்புமின்றி காணியைப் பெற்றுக்கொண்டு செயலில் இறங்கியதன் விளைவென்பதையும் உணரமுடிகிறது. என்றாலும் அவர்கள் பரிந்துரையை அனுமதியென்றே இன்னும் கருதிக் கொண்டிருக்கிறார்கள்.

2001 ஆம் ஆண்டு நடந்ததென்ன

2001 ஆம் ஆண்டும் இதே போன்றதொரு நிகழ்வு இதே இடத்தில் இடம்பெற்றுள்ளது. அப்போது இபலோகம பிரதேச செயலாளராக ஆர்.எம்.ஆர். சோமரத்ன என்பவர் பதவியில் இருந்துள்ளார். அப்போது இதே காணியில் பாதையொன்று அமைப்பதற்கான திட்டம் ஒன்று மேற்கொள்ளப்படவிருந்தது. அது பாரிய எலகண்டியிலிருந்து நவவிய ஆறு வரையான நீண்ட பாதையமைப்பாகும். இதன் நிர்மாணிப்புப்பணிகள் நடைபெற்றுக்கொண்டிருந்தபோது இப்போது கண்டெடுக்கப் பட்டது போன்று தொல்பொருள் சின்னங்கள் அங்கு வெளியாகின. இதனால் இன்று ஏற்பட்டது போன்ற குழப்பநிலையொன்றும் அப்போது உருவானது. உடனே தொல்லியல் திணைக்கள அதிகாரிகள் வந்து ஆராய்ந்த பின்னர் இங்கு குறிப்பிடத்தக்க தொல்லியல் பெறுமதி வாய்ந்த எதுவும் இல்லை என்று உறுதிப்படுத்தி இவ்விடம் பேணப்பட வேண்டியதில்லை என்றும் கூறி அவ்விடத்தை தொல்லியல் இடமாக ஏற்க மறுத்து விட்டார்கள். ஆனால் அரசியல் மாற்றம் மற்றும் காரணிகளால் பாதை நிர்மாணிப்பு முயற்சி கைவிடப்பட்டது. இன்றுவரையும் தொல்லியல் திணைக்களம் இப்பகுதி மீது விஷேட கவனம் செலுத்தவில்லை. இது தொல்லியல் முக்கியத்துவம் வாய்ந்த இடமென்றால் குறித்த திணைக்களம் தகுந்த பாதுகாப்பு வழங்கியிருக்கும். குறைந்த பட்சம் பெயர்ப்பலகை யொன்றையாவது வைத்திருப்பார்கள். இத்தகைய எதனையும் நாம் அங்கு கண்டுகொள்ளவுமில்லை. பிரதேச செயலாளர் ஒரு முஸ்லிம் பெண் என்ற இன, மதவாத நோக்கத்துடனே இதனைப் பிரச்சினைப் படுத்திக்கொண்டிருப்பதே உண்மையாகும்.

அரசியல் அசிங்கம்

இன, மத வாதத்துடன் அரசியல் இலாபம் கருதியுமே இதனை ஊதிப் பெருப்பித்துக் கொண்டு போகிறார்கள். தாமரை மொட்டுக் கட்சியின் இரண்டு அரசியல்வாதிகளின் கரங்கள் இதன் பின்னே உள்ளதைக் காணமுடிகிறது. ஒருவர் பிரதேச சபையின் தவிசாளர் நிஹால், மற்றவர் உப தவிசாளர் ஹேமந்த இவர்கள் இருவருமே ஆரம்பத்தில் இனவாதத்துக்கு துணைபோகும் ஊடகவியலாளர் இருவரையும் அழைத்து வந்து பிரசாரத்தை முன்னெடுக்கச் செய்தனர். இவர்கள் முஸ்லிம் பிரதேச செயலாளர் மீது குற்றங்களைச் சுமத்தி மீண்டுமொரு இனக்கலவரத்தைத் தூண்டிக் கொண்டிருக்கிறார்கள். மேலும் இந்த இடத்தைக் கண்காணிக்க வந்து விமர்சனங்களை முன்வைத்தவர்கள் யார்-? என்று உற்று நோக்கினால் இதனைப் பிரச்சினைப்படுத்துவோரின் தேவை என்ன என்பது நன்கு துலாம்பரமாகிறது. வந்தவர்களில் முதலாமவர் ஞானசார தேரர். இரண்டாமவர் இத்தேகந்த சத்தாதிஸ்ஸ தேரர் இவர்களை வரவழைத்தது, முன்னர் சுட்டிக்காட்டிய இரண்டு அரசியல்வாதிகளும் இனவாத ஊடகமொன்றின் ஊடகவியலாளருமாவார்கள். இவர்கள் தொடர்ந்தும் தம் முயற்சியை முன்னெடுத்துக்கொண்டே இருக்கிறார்கள்.

இவர்களது மற்றொரு தந்திரோபாயமாக பிரதேச செயலாளருக்கு இக்கருத்திட்டத்தை தடைசெய்யும்படி அழுத்தம் கொடுத்துள்ளனர். இது இவர்களது நரித்தந்திரமாகும். பிரதேச செயலாளர் கருத்திட்டத்தை இடை நிறுத்தியதன் விளைவாக அவர் கருத்திட்டத்தை முன்னெடுக்கும் அரசியல்வாதியான சந்திம மஹிந்த சோமாவின் எரிச்சலுக்குள்ளானார். இரு புறத்தாலும் இவருக்கு இடி விழுந்ததில் தந்திர அரசியல் இனவாதிகளுக்கு திருப்பிதான். அரசியல் போட்டி பொறாமையும் இதில் புகுந்து விளையாடிக் கொண்டிருக்கிறது.

சஜிதாபானுவும் முஸ்லிம் குடியேற்றமும்

இபலோகம பிரதேச செயலாளர் ஒரு முஸ்லிம் பெண் என்பதால் அரசியல் வாதிகளுக்குகிடையேயான குத்து வெட்டுக்களோடு இனவாதத்தீயும் சேர்ந்து இவர் பலிக்கடாவாக்கப்பட்டுள்ளார். இதற்காக இவர் முஸ்லிம் என்ற நிலையில் சிங்கள, பெளத்த உரிமைச் சின்னங்களை அழித்து வருகிறார் என்ற கதையையும் இனவாதிகள் பரப்பி வருகின்றனர். இப்படி ஒரு புறத்தில் தீ மூட்ட மறுபுறத்தில் நிர்மாணிக்கப்படும் புதிய குடியேற்றத்திட்டத்தில் முஸ்லிம் குடியேற்றம் ஒன்றை ஏற்படுத்தவே இவர் முயற்சிக்கிறார் என்ற மற்றோரு நெருப்பையும் மூட்டி வருகின்றனர். இந்த எந்தக் கூற்றிலும்கூட உண்மை யில்லை என்பது தெளிவு. ஏனெனில் வீடமைப்பு அபிவிருத்தி அதிகார சபை நடாத்தும் நேர்முகப் பரீட்சையின் மூலமே வீடுகள் வழங்க பயனாளிகள் தேர்தெடுக்கப்படுகின்றனர். இப் பரீட்சையின்போது பிரதேச செயலாளரின் எத்தகைய தலையீடோ பங்களிப்போ இருக்கப் போவதில்லை.

அத்துடன் வீடுகள் கையளிக்கவுள்ளோரின்பெயர் பட்டியலை அவதானிப்பதன் மூலம் இக்குற்றசாட்டிலும் உண்மையில்லை என்பது மேலும் ஊர்ஜிதமாகிறது. வீடுகள் கையளிக்கவுள்ள 48 பேரில் இரண்டே இரண்டு பேர்தான் முஸ்லிம்கள் ஏ.ஏ.எம்.ரஜிக், எம்.ஹஸன் அல்லாபிச்சே என்ற இரு முஸ்லிம்களுக்கு வீடுகள் வழங்கப்படவுள்ளன. ஏனைய 46 பேரும் சிங்களவர்களாவர்.

ஊர் மக்களும் பிரதேச தேரரும்

பிரதேச செயலாளரின் செயற்பாடுகள், பண்புகள் குறித்து அப்பிரதேச மக்களே நன்கறிவர். அதனால் அம்மக்களை அணுகி இது விடயமாக வினவினோம். அவரது நேர்மையான பணி குறித்தே அனைவரும் விதந்துரைத்தனர். அவர் இன, மத பேதத்துக்கப்பால் நின்று கருமமாற்றுபவர் என்றும் அவரது முஸ்லிம் சமூகத்துக்கு விசேட சலுகைகள் கூட வழங்குபவரல்லர் என்றுமே எல்லோரும் கருத்துகளை முன்வைத்தனர். அங்கு உருவாகியுள்ள அசகாய நிலை காரணமாக இவர்களில் எவரும் ஊடகங்களுக்கு வந்து தம்மை இனம்காட்டி பகிரங்கமாகக் கருத்து வெளியிடத் தயக்கம் காட்டுகின்றனர். ஆனால் கலாகரடேவ விகாரையின் தம்மகீர்த்தி தேரர், மேற்படி பிரதேச செயலாளரின் பண்புகள் குறித்து நற்சான்றுரையொன்றை இபலோகம விவகாரத்தை கிண்டிக் கிளறிக் கொண்டிருக்கும் இரு ஊடகங்களுக்கும் வழங்கியுள்ளார். ஆனால் அவை தேரரின் கூற்றை மூடி மறைத்து விட்டன. வெளியிடவேயில்லை. ஆனாலும் நாம் விடவில்லை. தம்மகீர்த்தி தேரரைத் தேடிச் சென்றோம். துரதிஷ்டவசமாக அவர் நோய்வாய்ப்பட்டு வைத்தியசாலையில் அனுமதிக்கப்பட்டிருந்தார். எமது முயற்சி கைகூடவில்லை.

தாமரை மொட்டுக்கட்சியின் அரசியல்வாதிகளோ காணி விவகாரத்தை வைத்துக்கொண்டு அடிப்படைவாதிகளை உசுப்பேற்றும் தம் நாச வேலையைத்தொடர்ந்து கொண்டே வருகின்றனர். பொதுபல சேனாவின் ஞானசாராக்கள், இத்தேகந்த சத்தாதிஸ்ஸாக்கள் ஊடக ஒத்தாசையாளர்கள் தம் சுயநல அடிப்படைவாத நடவடிக்கைகளுக்காக இச்சம்பவத்துக்கு மேலும் எண்ணெய் வார்த்துக் கொண்டிருகிறார்கள். இதனை மற்றொரு கண்டி– திகனயாக பற்றியெரியவே வழிவகுத்துக் கொண்டிருக்கிறார்கள். சந்திம மஹிந்த சோமாவின் நடவடிக்கையைக் கண்டு கொள்ளாது சஜீதா பானுவை தூக்கிப் பிடித்துக்கொண்டு களத்தில் குதித்துக் கொண்டிருப்பது தம் நாசகாரத்தை அரங்கேற்றுவதற்கேயாகும்.

-Vidivelli