கண்டி + அளுத்தகம வன்முறைகள் பற்றி, கோத்தபாய என்ன சொல்கிறார் தெரியுமா..??

டெய்லி மிரர் ஆங்கிலப் பத்திரிகைக்கு முன்னாள் பாதுகாப்புச் செயலாளர் வழங்கியுள்ள நேர்காணலின் முக்கிய பகுதிகள்-

-மீள்பார்வை-

சமீபத்தில் கண்டியில் நடந்த இன வன்முறைகள் குறித்து உங்களுடைய அபிப்பிராயம் என்ன?

கண்டியில் மட்டுமன்றி, நாட்டின் பல்வேறு பகுதிகளிலும் இடம்பெறும் சம்பவங்களைப் பார்த்தீர்களென்றால், இன்று கொலைகள், கொள்ளைகள் எல்லா இடங்களிலும் பரவியுள்ளன. சட்டத்தின் ஆட்சியில் ஒரு தெளிவான பின்னடைவு ஏற்பட்டுள்ளது. அதுதான் இன வன்முறைகளுக்கான பிரதான காரணம்.

கண்டி கலவரங்களைப் பொறுத்தவரை மிக விரைந்து செயற்பட்டிருந்தால் அவற்றைத் தடுத்திருக்கலாம். நான் அறிந்த வகையில் இப்பிரச்சினை இரண்டு தரப்பாருக்கிடையில் நடந்தது. முதல் சம்பவம் இடம்பெற்று ஒருவர் இறந்து அடுத்த சம்பவம் தொடங்குவதற்குள் ஒரு வார காலம் இடைவெளி இருந்தது. எனவே அரசாங்கம் முன்னெச்சரிக்கை நடவடிக்கைகளை எடுக்கவில்லை என்று நான் நினைக்கின்றேன். இவ்வாறான ஒரு சம்பவம் இடம்பெற்றால் முதல் தரப்பிலிருந்து எதிர்வினைகள் ஏற்படும் என்பதை யாருக்கும் எதிர்பார்க்கலாம். அரசாங்கம் அவற்றை நிறுத்துவதற்கு உடனடி நடவடிக்கைகள் மேற்கொள்ள வேண்டும்.

இந்த அனர்த்தம் குறித்து புலனாய்வுத் துறை அதிகாரிகள் செயல்படத் தவறிவிட்டனர் என்று சிலர் கூறுகின்றனர். அதைப் பற்றி என்ன நினைக்கிறீர்?

அவர்கள் பொலிஸ் புலனாய்வுப் பிரிவைத்தான் குறிப்பிடுகிறார்கள் என நினைக்கின்றேன். ஏனெனில், இது ஏனைய புலனாய்வுப் பிரிவுக்கு உட்பட்ட விடயமல்ல. எங்களது ஆட்சிக் காலத்தில் எங்களிடம் சிறந்த புலனாய்வுப் பிரிவு இருந்தது. இதுபோன்ற சூழ்நிலைகளை நாம் சிறப்பாகக் கையாண்டோம். இங்கு பொலிஸ் புலனாய்வுத் துறை அதிகாரிகள் செயற்படவில்லை என்றால் அரசாங்கமே அதற்காக குற்றம் சாட்டப்பட வேண்டும்.

இந்த அரசாங்கம் புலனாய்வுப் பிரிவின் பணிகளை குறைத்து மதிப்பிடுகின்றது. இது தொடர்பான பல சம்பவங்கள் நடந்துள்ளன. புலனாய்வுப் பிரிவின் செல்வாக்கு குறைத்து மதிப்பிடப்பட்டுள்ளது. அதனால்தான் அவர்கள் பலவீனமாக அல்லது பொடுபோக்காகச் செயல்படுகின்றனர்.

இதுபோன்ற வன்முறைகள் அளுத்கம மற்றும் பேருவளைப் பகுதிகளில் இடம்பெற்றன. அப்போது நீங்கள் பொது பல சேனாவுக்கு ஆதரவளிக்கிறீர்கள் என்று குற்றம் சாட்டப்பட்டதே?

இது உண்மையல்ல. வரலாற்றை நீங்கள் பார்த்தால் இன வன்முறைகள் நீண்டகாலமாக இடம்பெற்று வருகின்றன. முக்கியம் என்னவென்றால், அத்தனை நெருக்கடியான சம்பவங்களின் போது அரசாங்கம் போதுமானளவு செயல்படுகின்றது என்பதுதான். அளுத்கம சம்பவத்தின் போது நாம் விரைந்து செயல்பட்டோம். நிலைமையைக் கட்டுப்படுத்த எங்களால் முடிந்தது. எங்களது அரசாங்கம் BBS உடன் எந்த உறவையும் வைத்துக் கொள்ளவில்லை. அது எதிர்க்கட்சியின் உண்மைக்குப் புறம்பான வாதம். நான் எந்த வகையிலும் BBS உடன் தொடர்புபடவில்லை. இத்தகைய இயக்கங்களுக்குப் பின்னால் யார் இருக்கிறார்கள் என்பதை நீங்கள் இப்போது பார்க்கின்றீர்கள்.

முன்னைய அரசாங்கத்தில் இது போன்ற வன்முறைகளை முட்கூட்டியே தடுப்பதற்கு எந்த நடவடிக்கையும் மேற்கொள்ளப்படவில்லையே?

அப்போதிருந்த அரசாங்கத்தின் நிலைப்பாட்டை நீங்கள் விளங்கிக் கொள்ள வேண்டும். நாம் எந்த முன்னெச்சரிக்கை நடவடிக்கையும் மேற் கொள்ளவில்லை என்று உங்களால் கூற முடியாது. காரணமில்லாமல் நீங்கள் சென்று யாரையும் கைதுசெய்ய முடியாது. நாம் பல முன்னெச்சரிக்கை நடவடிக்கைகளை மேற்கொண்டோம். அப்படியான வன்முறைகளில் ஈடுபடுமாறு நாம் மக்களை ஊக்குவிக்கவில்லை.

முஸ்லிம் சமூகத்தின் பல்வேறு தரப்பினருடனும் பல்வேறு கூட்டங்களை நாங்கள் ஒழுங்கு செய்தோம். அவர்களுடைய மதகுருக்களையும் வர்த்தகர்களையும் சந்தித்தோம். BBS பிக்குகளை மட்டுமன்றி ஏனைய பிக்குகளையும் நான் சந்தித்தேன். அனைவரையும் ஒரே மேசைக்குக் கொண்டு வந்தேன். இவை சட்ட நடவடிக்கை எடுக்க வேண்டிய பிரச்சினையாக மட்டும் இருக்கவில்லை. நிலைமைகளைக் கட்டுப்படுத்துவதற்குத் தேவையான வழிமுறைகள் குறித்து நாம் கலந்துரையாடினோம். சமூகங்களுக்கிடையில் புரிந்துணர்வை ஏற்படுத்தவே நாம் முயன்றோம்.