முஸ்லிம்கள் பற்றி, ஜனாதிபதி கண்திறக்க மறுப்பது ஏன்..?

மைத்திபால சிறிசேன ஆகிய நான் கடந்த ஜனாதிபதித் தேர்தலில் தோல்வியடைந்திருந்தால் புதைகுழியில் புதைக்கப்பட்டிருப்பேன் அல்லது சிறை வைக்கப்பட்டிருப்பேன். இது ஜனாதிபதி மைத்திரிபால சிறிசேனா கூறிய பிரபல கூற்றுக்களாகும்.

ஜனாதிபதி மைத்திரி புதைக்குழிக்கு செல்லாமலும், சிறைவைக்கப்படாமலும் தடுப்பதில் முக்கிய பங்காற்றிய பெருமை முஸ்லிம்களையே சாரும். பெறுமதிமிக்க வாக்குகளை வாரிவாரி வழங்கி மைத்திரியை, முஸ்லிம்கள் ஜனாதிபதியாக்கினார்கள். அப்படிபட்ட ஜனாதிபதி தற்போதெல்லாம் முஸ்லிம் விவகாரங்களில் கண்களை திறக்க மறுப்பது ஏன், என முஸ்லிம் கவுன்சில் தலைவர் என்.எம். அமீனை ஜப்னா முஸ்லிம் இணையம் தொடர்புகொண்டு கேட்டபோது அவர் கூறிய ஒரு சம்பவத்தை இங்கு பகிர்ந்து கொள்கிறோம்..!

சில மாதங்களுக்கு முன் கிண்ணியாவில் டெங்குவுக்கு ஆட்பட்டு 14 முஸ்லிம்கள் வபாத்தாகினர். இது ஒரு பேரனர்த்தம். முஸ்லிம் ஊடகங்கள் மாத்திரமே இதற்கு முக்கியத்துவம் வழங்கி செய்திகளை வெளியிட்டன.

இந்நிலையில் நான் ஒருமுறை மவ்பிம என்ற சிங்கள பத்திரிகை ஆசிரியரை தொடர்புகொண்டு கிண்ணியாவில் டெங்குவினால் 14 முஸ்லிம்கள் வபாத்தாகியுள்ளனர். அங்குள்ள வைத்தியசாலையில் நிலவும் குறைபாடுகள் என பல விடயங்களை கவலையுடன் அவருடன் பகிர்ந்து கொண்டேன்.

அடுத்தநாள் மவ்பிம பத்திரிகை இதனை தலைப்புச் செய்தியாக வெளியிட்டது. 

ஜனாதிபதியின் கவனத்திற்கு இது எடுத்துச் செல்லப்பட்டுள்ளது.

ஜனாதிபதியின் கண்கள் திறந்தன, உத்தரவுகள் பறந்தன,  அதிகாரிகள் அங்கு ஓடினார்கள், இறுதியில் கிண்ணியாவுக்கு பறந்துசென்று நிலைமையை அவதானித்தார் ஜனாதிபதி. 

முஸ்லிம்கள் பெருமளவு டெங்குவுக்கு வபாத்தாகிய செய்தியை சிங்கள ஊடகம் வெளிக்கொண்டு வந்தமையே, ஜனாதிபதி இதில் தலையிட முதன்மை காரணமாக அமைந்தது.

முஸ்லிம் சமூகம் ஆட்சியாளர்களை மட்டும் குறை சொல்வதில் பயன் இல்லை. நமது பிரச்சினைகள் அவர்களை சென்றடையவில்லை. முஸ்லிம் சமூகம் ஆட்சியாளர்கள் மீது ஆத்திரம் கொண்டிருப்பதுகூட ஜனாதிபதிக்கு தெரியாது. இதுதான் யதார்த்தம். நிலைமை இப்படித்தான் இருக்கிறது.

பெரும்பாலான சிங்களவர்கள் இனவாதமற்றவர்கள். நாம் நாட்டுக்கு ஆற்றிய சேவைகள் சிங்களவர்களை சென்றடையவில்லை. நமது நிகழ்கால பிரச்சினைகள் பற்றி ஜனாதிபதிக்கும், பிரதமருக்கும் ஏன் சிங்கள மக்களுக்குக்கூட தெரியாது. இந்நிலை மாற்றியமைக்கப்பட வேண்டுமாக இருந்தால் நம்மைப்பற்றி, நமது பிரச்சினைகளை சிங்கள மொழியில், சிங்களவர்களுக்கு சொல்ல மிக பலமான ஒரு ஊடகம் தேவை.

நாட்டில் 3400 க்கும் அதிகமான அரபு மத்ரஸாக்கள் உள்ளன. ஆனால் சிங்கள மொழியில் முஸ்லிம்களுக்கு  என ஒரு ஊடகம் இல்லை. கொழும்பு சிலேஐலண்டில் 40 முஸ்லிம் குடும்பங்களுக்கு ஒரு மலசலகூடம்தான் உள்ளது. இதுதூன் நமது சமூகத்தின் நிலைமை என கவலையுடன்  கூறிமுடித்தார் என்.எம். அமீன்.