இஸ்ரேல் பெண் கத்தியால் குத்திக் கொலை: ஐ.எஸ். பொறுப்பேற்பு - ஹமாஸ் மறுப்பு

ஜெருசலேம் நகரில் இஸ்ரேலிய பெண் காவலர் ஒருவர் கத்தியால் குத்திக் கொல்லப்பட்டார். இந்தத் தாக்குதலில் ஈடுபட்ட 3 பாலஸ்தீனர் பாதுகாப்புப் படையினர் சுட்டுக் கொன்றனர்.

இந்தத் தாக்குதலுக்கு இஸ்லாமிய தேச (ஐ.எஸ்.) பயங்கரவாதிகள் பொறுப்பேற்றனர். இஸ்ரேலில் நடைபெற்ற தாக்குதலுக்கு ஐ.எஸ். பயங்கரவாதிகள் பொறுப்பேற்பது இதுவே முதல் முறை என்பது குறிப்பிடத்தக்கது.

எனினும், இஸ்ரேலியப் படையினரால் சுட்டுக் கொல்லப்பட்ட மூவரும், உள்ளூர் மதவாத மற்றும் இடதுசாரி அமைப்பைச் சேர்ந்தவர்கள் என்று ஹமாஸ் அமைப்பு தெரிவித்துள்ளது.

இதுகுறித்து இஸ்ரேல் காவல்துறை செய்தித் தொடர்பாளர் மிக்கி ரோஸன்ஃபெல்ட் கூறியதாவது: 

பழைய ஜெருசலேம் நகரப் பகுதியில் பாதுகாப்புப் பணியில் ஈடுபட்டிருந்த காவல்துறை பெண் அதிகாரி மீது வெள்ளிக்கிழமை இரவு கத்திக் குத்துத் தாக்குதல் நிகழ்த்தப்பட்டது. இந்தத் தாக்குதலில் ஈடுபட்ட 3 பாலஸ்தீனர் அங்கிருந்த காவல் படையினரால் சுடப்பட்டனர் என்றார் அவர்.

சுடப்பட்ட மூவரும் உயிரிழந்ததாக போலீஸார் தெரிவித்தனர். மேலும், கத்திக் குத்துக் காயங்களுடன் மருத்துவமனையில் அனுமதிக்கப்பட்ட பெண் காவலர் ஹதாஸ் மால்கா (23), சிகிச்சைப் பலனின்றி உயிரிழந்ததாகவும் அவர்கள் கூறினர்.