திமிர் பிடித்த, முஸ்லிம் வர்த்தகர்கள், பாடம் கற்க மறுப்பது ஏன்..?

(கலாபூசணம் ஜே.எம்.ஹாபீஸ்)

கடந்த ஏப்ரல் மாதம் சித்திரை புத்தாண்டு பருவத்தின் போது கண்டி நகர ஜவுளிக்கடைகள் வெறிச்சோடி இருந்ததுடன் சில முஸ்லிம் வர்த்தகர்கள் தலையில் கையை வைத்துக் கொண்டிருந்த சம்பவங்கள் தொடர்பாக சமுக வளைத்தளங்கள்  கச்சிதமாக எழுதி இருந்தன. அதேநேரம் அதே காலப்பகுதியில் புதிதாக கண்டி நகரில் திறக்கப்பட்ட பெரும்பான்மை இனத்திற்குச் சொந்தமான பிரபல ஆடை விற்பனை நிறுவனம் ஒன்று ஒரு நாளைக்கு 4 கோடி முதல் ஐந்து கோடி ரூபாய் வரை விற்பனையை மேற்கொண்டதாகவும் இணையங்களில் காணமுடிந்தது. பெரஹரா ஊர்வலம் போல் மக்கள் கூட்டம் அங்கு சென்று கொள்வனவு செய்ததையும் சமூக ஊடகங்கள் அழகாக சித்தரித்தன. 

அன்று பாடம் கற்காத முஸ்லிம் வர்த்தகர்கள் இன்னமும் பாடம் கற்காத ஒரு நிலை காணப்படுகிறது. முஸ்லிம் வர்த்தகர்கள் தங்கள் நிலையை மாற்றிக் கொள்ளாவிட்டால் எதிர் வரும் றமலானில் இதே நிலையை அனுபவிக்க வேண்டி வரும்; என அன்றே சமூக வளைத் தளங்களில் குறிப்பிடப்பட்டு எச்சரிக்கப்பட்டும்; இருந்தன. 

 நோன்புப் பெருநாளைக் கொண்டாட றமழானில் இறுதிக்கட்டத்தில் முஸ்லிம் பெண்கள் கண்டி நகர வீதிகளில் திரிவதை அவதானிக்க முடிகிறது. குறிப்பாக பேரினவாத வர்தகர் என்று முஸ்லிம்களால் சீல் குத்தப்பட்ட  முன்சொன்ன புதிய ஆடை நிறுவனத்தில் நிறைய முஸ்லிம்கள் ஆடைகளைக் கொள்வனவு செய்வதைக்காண முடிகிறது. வாகனங்களில் குடும்பம் சகிதம் வந்து கொள்வனவு செய்கிறார்கள். இது பற்றி யாரும் தவறாகப் புரிந்து கொள்ள வேண்டாம். 

ஏனெனில் எங்கு இலாபத்திற்கு, தரமான பொருள், தமது ரசனைக்கு(பெஷன் அல்லது டிசைன்) கிடைக்கிறதோ அங்கு இயல்பாக மக்கள் செல்வது தவிர்க்க முடியாது. ஆனால் திமிர் பிடித்த ஒரு சில வர்த்தகர்கள் தமது நிலையை மாற்றிக் கொள்ளா விட்டால் இம்முறையும் கடந்த ஏப்ரல் சீசன் நிலைமை உருவாகலாம் என்பதை நினைவூட்ட விரும்புகிறோம்.

அதாவது காலகாலமாக ஆதிக்கம் செலுத்திய கடைகளை விட குறிப்பிட்ட ஆடை நிறுவனத்தின் விலை குறைவு என்தனால் அநேகர் அதனை நாடுவதாகத் தெரிகிறது. இது நுகர்வோன் தெரிவு மட்டுமல்ல இன நல்லுறவின் மற்றொரு வடிவமாகவும் இருக்கலாம். ஆனால் சற்று கீழ் இறங்கி வந்து முஸ்லிம் வர்த்தகர்கள் விலைகளை கட்டுப் படுத்தாவிட்டால் எதிர் காலத்தில் கண்டி முஸ்லிம் ஜவுளி வர்த்தகர்கள் சவால்களை எதிர்கொள்ள வேண்டிவரும்.

இது பற்றி முன்னர் 'தங்க இழையால் தைக்கப்பட்ட ஆடைகள்' என்ற தலைப்பில் ஒரு ஆக்கம் தரப்பட்டது வாசகர்கள் மறந்திருக்க முடியாது. இருப்பனும் அதனை சுருக்கமாக நினைவூட்டலாம். அதாவது தங்கத்தினால் ஆனா நூலைக்கொண்டு தைக்கப்ட்டது போல் தங்கத்தை விடவும் அதிக விலையில் ஆடைகளை விற்பது பற்றி விரிவாக எழுதி இருந்தோம். மிகுதமுள்ள சில நாட்களிலாவது நிலைமையை சீராக்கிக் கொள்னுங்கள். வரும் முன் காப்போனாக இருந்து வாடிக்கையாளர்களை கை நழுவ விட்டு விடவேண்டாம்.