முஸ்லிம்களுக்கு எதிராக 30 நாட்களில் 15 வன்முறைகள் - நல்லாட்சி அரசு மௌனம்

இலங்கையில் முஸ்லிம்களுக்கு எதிரான இனவாத, மதவாத செயற்பாடுகள் மீண்டும் தலைதூக்கியுள்ளமையானது முஸ்லிம் சமூகத்தை கவலையில் ஆழ்த்தியுள்ளது. கடந்த ஒரு மாத காலப்பகுதிக்குள் மாத்திரம் இரண்டு பள்ளிவாசல்கள் மீதான தாக்குதல்கள் உட்பட முஸ்லிம்களுக்கு எதிரான 15 முக்கிய சம்பவங்கள் பதிவாகியுள்ள நிலையில், அவற்றைக் கட்டுப்படுத்துவதற்குத் தேவையான நடவடிக்கைகளை அரசாங்கம் மேற்கொள்ளவில்லை என முஸ்லிம்கள் கவலை தெரிவிக்கின்றனர்.

கடந்த காலங்களில் நாட்டில் இனவாத கருத்துக்களைப் பரப்பிய பொது பல சேனா மற்றும் சிங்கள ராவய போன்ற அமைப்புகளின் செயற்பாடுகள் மீண்டும் வீரியம் பெற்றுள்ளதுடன் ஞானசார தேரர் மீண்டும் இனவாத கருத்துக்களைப் பரப்பும் தனது வேலைத்திட்டத்தை ஆரம்பித்துள்ளார்.

16.04.2017:

தென் மாகாணத்திலுள்ள கொடபிட்டிய, போர்வை நகரில் அமைந்துள்ள முஸ்லிம்களுக்குச் சொந்தமான 4 கடைகள் மீது அதிகாலையில் பெற்றோல் குண்டுத் தாக்குதல் நடத்தப்பட்டது.

17.04.2017 :

காலி கோட்டை இராணுவ முகாம் பாதுகாப்பு வலயத்தில் அமைந்துள்ள ஷெய்ஹ் சாலிஹ் வலியுல்லாஹ் ஸியாரத்தின் பாதுகாப்பு மதில்கள் இனந்தெரியாத நபர்களால் உடைக்கப்பட்டன.

20.04.2017 :

அம்பாறை, இறக்காமம், மாயக்கல்லி மலையடிவாரத்திலுள்ள முஸ்லிம்களுக்குச் சொந்தமான இரண்டரை ஏக்கர் காணியை ஆக்கிரமித்து அதில் பௌத்த விகாரையை நிர்மாணிப்பதற்கான ஆரம்பப் பணிகளை பிக்குகள் தலைமையிலான குழுவினர் முன்னெடுத்தனர். இதனால் அப் பகுதியில் பதற்ற நிலை ஏற்பட்டது.

25.04.2017 :

அம்பாறை, இறக்காமம், மாயக்கல்லி மலையடிவாரத்திலுள்ள முஸ்லிம்களுக்குச் சொந்தமான இரண்டரை ஏக்கர் காணியை ஆக்கிரமித்து அதில் விகாரை நிர்மாணிக்கும் பணிகளை பார்வையிட பொது பல சேனாவின் பொதுச் செயலாளர் ஞானசார தேரர் அப் பகுதிக்கு விஜயம் செய்தார். அத்துடன் அம்பாறை மாவட்ட செயலகத்தில் இடம்பெற்ற கூட்டத்திலும் கலந்து கொண்டதுடன் முஸ்லிம்களுக்கு எதிரான வெறுப்பூட்டும் கருத்துக்களையும் அக் கூட்டத்தில் வெளியிட்டார். நாட்டில் மேலும் 10 ஆயிரம் பௌத்த விகாரைகளை அமைக்கத் திட்டமிட்டுள்ளதாகவும் அவர் குறிப்பிட்டார்.

03.05.2017 :

இறக்காமம் பகுதியில் அத்துமீறிப் பிரவேசித்து இன முரண்பாட்டைத் தோற்றுவிக்க முனையும் ஞானசார தேரரையும் சிங்கள ராவய பிக்குகளையும் கைது செய்ய வேண்டும் என அம்பாறை மாவட்ட பாராளுமன்ற உறுப்பினரும் பிரதியமைச்சருமான எச்.எம்.எம்.ஹரீஸ் பாராளுமன்றத்தில் வேண்டுகோள் விடுத்தார்.

08.05.2017 :

இலங்கை கடற்பரப்பில் கைது செய்யப்பட்டு தடுத்து வைக்கப்பட்டுள்ள மியன்மார் அகதிகளை மீண்டும் அவர்களது நாட்டுக்கே திருப்பியனுப்ப வேண்டும் எனவும் அகதிகள் எனும் போர்வையில் முஸ்லிம்கள் இலங்கையை ஆக்கிரமிக்க முயற்சிப்பதாகவும் கொழும்பில் நடைபெற்ற பத்திரிகையாளர் மாநாட்டில் பொது பல சேனாவின் செயலாளர் ஞானசார தேரர் தெரிவித்தார்.

10.05.2017 :

இறக்காமம் மாயக்கல்லி மலையில் வெசாக் தினத்தை முன்னிட்டு பொலிஸ் பாதுகாப்புடன் விசேட பௌத்த வழிபாடுகள் இடம்பெற்றன.

14.05.2017 :

பொலன்னறுவை, ஓனேகம பகுதிக்கு விஜயம் செய்த பொதுபல சேனாவின் செயலாளர் ஞானசார தேரர் தலைமையிலான குழுவினர் அப் பகுதியில் வசிக்கும் முஸ்லிம்களுக்கு அச்சுறுத்தல் விடுத்ததுடன் மாட்டுக் கொட்டில்களையும் கழற்றி எறிந்தனர். இதன்போது 'அல்லாஹ்'வை அவமதிக்கும் வகையிலான வெறுப்புப் பேச்சுக்களை ஞானசார தேரர் பேசினார்.

15.05.2017 :

தோப்பூர் நீணாக்கேணி பிரதேசத்தில் முஸ்லிம்கள் பூர்வீகமாக பயிர்ச் செய்கையில் ஈடுபட்டுவரும் குடியிருப்புக் காணியில் பௌத்த பிக்குகள் அத்துமீறிப் பிரவேசித்து வேலிகளை உடைத்தெறிந்தனர்.

15.05.2017 : பாணந்துறை பழைய பஸார் பகுதியில் அமைந்துள்ள பள்ளிவாசல் மீது அதிகாலை 3 மணியளவில் பெற்றோல் குண்டுத் தாக்குதல் நடத்தப்பட்டது. இதில் பள்ளிவாசலின் உட்பகுதிகள் சேதமுற்றன. சந்தேக நபர்கள் எவரும் கைது செய்யப்படவில்லை.

16.05.2017 :

கொழும்பு, வெல்லம்பிட்டி, கொஹிலவத்தை அல் இப்ராஹீமிய்யா ஜும்ஆ பள்ளிவாசல் மீது அதிகாலை 1.45 மணியளவில் சுமார் 8 பேர் அடங்கிய குழுவினர் தாக்குதல் நடத்தினர். இதில் பள்ளிவாசலுக்கு சேதம் ஏற்பட்டது. இதுவரை எவரும் கைது செய்யப்படவில்லை.

16.05.2017 :

பொது பல சேனா அலுவலகத்தில் இடம்பெற்ற ஊடகவியலாளர் மாநாட்டில் உரையாற்றி ஞானசார தேரர், முஸ்லிம்களுக்கு எதிராகவும் இஸ்லாத்துக்கு எதிராகவும் வெறுப்பூட்டும் கருத்துக்களை முன்வைத்ததுடன் 'அல்லாஹ்'வை அவமதிக்கும் கருத்துக்களை மீண்டும் வெளியிட்டார்.

16.05.2017 :

செல்வநகர், நீணாக்கேணி பிரதேசத்திற்குள் கூரிய ஆயுதங்கள் மற்றும் தடிகளுடன் நுழைந்த சுமார் 200 பேருக்கும் மேற்பட்ட கும்பல் அப் பகுதியில் வாழும் முஸ்லிம்களின் வீடுகள் மீது தாக்குதல் நடத்தினர். இதில் சிலர் காயமடைந்ததுடன் 16 வீடுகள் சேதமடைந்தன. அன்றிரவு அக் கிராம முஸ்லிம்கள் அச்சம் காரணமாக அங்கிருந்து வெளியேறி பள்ளிவாசலிலும் உறவினர் வீடுகளிலும் தஞ்சமடைந்தனர்.

17.05.2017 :

பாணந்துறை, எலுவில பிரதேசத்தில் அமைந்துள்ள முஸ்லிம்களுக்குச் சொந்தமான பேக்கரி ஒன்றும் தொலைத்தொடர்பு நிலையம் ஒன்றும் பெற்றோல் குண்டுத் தாக்குதலுக்கு இலக்காகின. இது தொடர்பில் சம்பந்தப்பட்ட அதிகாரிகள் எந்தவித நடவடிக்கைகளையும் முன்னெடுக்கவில்லை.

18.05.2017 :

வென்னப்புவவில் அமைந்துள்ள முஸ்லிம் வர்த்தகர் ஒருவருக்குச் சொந்தமான லாஸ்ட் சான்ஸ் எனப்படும் வர்த்தக நிலையம் அதிகாலை 2 மணியளவில் தீக்கிரையாக்கப்பட்டது. விடிவெள்ளி