நிறைவேற்று அதிகார ஜனாதிபதி முறைமையை, தொடர்ந்தும் நீடிக்க வேண்டும் - தயாசிறி

நிறைவேற்று அதிகார ஜனாதிபதி முறைமையை தொடர்ந்தும் நீடிக்க வேண்டுமென ஸ்ரீலங்கா சுதந்திர கட்சியின் உறுப்பினரும் விளையாட்டுத்துறை அமைச்சருமான தயாசிறி ஜெயசேகர தெரிவித்துள்ளார்.

ஸ்ரீலங்கா சுதந்திர கட்சியின் வாராந்த செய்தியாளர் சந்திப்பில் இன்று கலந்துகொண்டு கருத்து தெரிவிக்கும் போதே அவர் மேற்கண்டவாறு குறிப்பிட்டுள்ளார்.

இந்த ஊடகவியலாளர் சந்திப்பில் கருத்து வெளியிட்டுள்ள அவர்,

நிறைவேற்று அதிகாரமுள்ள ஜனாதிபதி முறைமை நீக்கப்பட வேண்டும் என்ற நிலைப்பாட்டில் ஸ்ரீலங்கா சுதந்திர கட்சி இல்லை. ஏனெனில், நிறைவேற்று ஜனாதிபதி முறைமையை நீக்கி மாகாணசபை அதிகாரங்கள் பலப்படுத்தப்பட்டால் நாட்டின் போக்கும் சிக்கலடையும். எனவே அந்த நிலைப்பாடு எமக்கு இல்லை.

மாகாணசபை அதிகாரங்கள் பலப்படுத்துவது தொடர்பிலும் கட்சி ஆதரவை தெரிவித்துள்ளது. எனினும் மாகாணசபை அதிகாரங்கள் பலப்படுத்தப்பட்டு ஆளுநர்களின் அதிகாரங்கள் நீக்கப்படும் நிலையில் நிறைவேற்று ஜனாதிபதி முறைமை நடைமுறையில் இருப்பது மிகவும் அவசியமான ஒன்றாகும்.

இதேவேளை, ஆளுநர்களின் அதிகாரங்கள் நீக்கப்பட்டு மாகாண சபைகளின் அதிகாரங்கள் பலப்படுத்தப்படுமாயின் நிறைவேற்று ஜனாதிபதி முறைமையினை பலப்படுத்தியாக வேண்டும் என்பதே ஸ்ரீலங்கா சுதந்திர கட்சியின் நிலைப்பாடாகும் என்றார்.