தூதரகங்களில் பணம்பெற்று, ஷரிஆ சட்டத்தில் கைவைக்க வஞ்சகத் திட்டம் - சிராஸ் பரபரப்பு குற்றச்சாட்டு

கொழும்பில் செயற்படும் வெளிநாட்டு தூதரகங்களில் பணத்தை பெற்றுக்கொண்டு, முஸ்லிம் தனியார் சட்டத்தில் திருத்தம் மேற்கொள்ள வேண்டுமென சில முஸ்லிம் பெயர் தாங்கிகள் முயன்று வருவதாக பிரபல சட்டத்தரணி சிராஸ் நூர்தீன் பரபரப்பு குற்றச்சாட்டை சுமத்திள்ளார்.

இதுதொடர்பில் ஜப்னா முஸ்லிம் இணையத்திடம் பேசிய சிராஸ் நூர்தீன் மேலும் குறிப்பிட்டதாவது,

முஸ்லிம் தனியார்  ஷரீஆ சட்டத்தில் கைவைக்க வேண்டுமென முஸ்லிம் தரப்பு ஒன்றும் வலியுறுத்துகிறது. அவர்கள் யாரென நோக்கினால் அவர்கள் கொழும்பிலுள்ள வெளிநாட்டு தூதரகங்களில் பணம் பெறுபவர்களாவர். இவர்களில் சில முஸ்லிம் சட்டத்தரணிகளும் உள்ளனர். அரச சார்பற்ற நிறுவனங்களில் பணிபுரியும் சில முஸ்லிம்களும் உள்ளடக்கம். வடமாகாணத்தைச் சேர்ந்த முஸ்லிம் சகோதரியும் உள்ளடக்கம்.

முஸ்லிம்களுக்கு எதிரான சக்திகளை எதிர்கொள்வதைவிட, முஸ்லிம்களிடையே உள்ள துரோகிகளை இனங்காண்பதுதான் சிரமமானது.

வெளிநாட்டுச் சலுகைகளை பெற்றுக்கொள்ளும் நோக்குடன் அரசு ஷரீஆ சட்டத்தில் கைவைக்க முயலுகிறது. திறைமறைவில் மிகப்பெரும் சதி நடைபெறுவதை உணர்கிறோம். இதுவிடயத்தில் அரசாங்கத்திற்கு அழுத்தம் கொடுக்கும் நோக்குடனே கொழும்பு பள்ளிவாசல்கள் மூலம் கையெழுத்து பெறும் நடவடிக்கை ஆரம்பிக்கப்பட்டுள்ளது எனவும் சிராஸ் மேலும் சுட்டிக்காட்டினார்.

அத்துடன் முஸ்லிம் விவாக விவா­கரத்துச் சட்­டத்தில் திருத்­தங்­களை சிபா­ரிசு செய்­வ­தற்­காக அமைக்கப்பட்ட உயர்­நீ­தி­மன்ற நீதி­ய­ரசர் சலீம் மர்சூப் தலை­மை­யி­லான குழு மீதும், அதில் உள்ளடங்கியுள்ளவர்கள் மீதும் தமக்கு நம்பிக்கையிருப்பதாகவும் கோடிட்டுக் காட்சிய சிராஸ் நூர்தீன், இவர்கள் முஸ்லிம் சமூகத்திற்காக கடந்த காலங்களில் பணியாற்றியவர்கள் எனவும் அவர்கள் மீதான தனது நம்பிக்கை வீண் போகாது எனவும் பல மூத்த முஸ்லிம் சட்டத்தரணிகள் மீது தாம், மரியாதை வைத்திருப்பதாகவும்,  நீதி­ய­ரசர் சலீம் மர்சூப் மீது தாம் மரியாதை கலந்த நம்பிக்கை கொண்டிருப்பதாகவும் சுட்டிக்காட்டினார்.