பள்ளிவாசலுக்கு காணி வழங்குகிறார் சம்பிக்க

-ARA.Fareel-

சவால்களுக்குள்ளாகியிருக்கும் தம்புள்ளை ஹைரியா ஜும்ஆப் பள்ளிவாசலை இடம்மாற்றுவதற்கு தேவையான காணியை தம்புள்ளையில் வழங்குவதற்கு மேல் மாகாண மாநகர அபிவிருத்தி மற்றும் பாரிய நகர திட்டமிடல் அமைச்சர் சம்பிக்க ரணவக்க இணக்கம் தெரிவித்துள்ளார்.

தேசிய ஐக்கிய முன்னணியின் தலைவரும் முன்னாள் மத்திய மாகாண சபை உறுப்பினருமான அசாத்சாலி அமைச்சர் சம்பிக்க ரணவக்கவுடன் நேற்று முன்தினம் நடத்திய பேச்சுவார்த்தையினையடுத்தே இவ் இணக்கப்பாடு எட்டப்பட்டுள்ளது.

தம்புள்ளை பள்ளிவாசலுக்கு 23.6 பேர்ச் உரிமைக்கான காணி உறுதியிருப்பினும் பள்ளிவாசலுக்கு 41 பேர்ச் காணி வக்பு செய்யப்பட்டுள்ளது. எனவே பள்ளிவாசலுக்குரிய 41 பேர்ச் காணியினதும் ஆவணங்களை அமைச்சர் சம்பிக்க ரணவக்க கோரியுள்ளதாக அசாத்சாலி தெரிவித்தார்.

அவர் தொடர்ந்தும் இவ்விவகாரம் தொடர்பில் கருத்து தெரிவிக்கையில்,

“தம்புள்ளை பள்ளிவாசலுக்கென நகர அபிவிருத்தி அதிகாரசபை தற்போது ஒதுக்கியுள்ள காணி மதுபானசாலைக்கு எதிரே அமைந்துள்ளதால் அதைத் தவிர்த்து மதுபானசாலையிலிருந்தும் சுமார் 30 மீற்றர் தூரத்தில் காணியொன்றினை ஒதுக்கித் தருமாறு பள்ளிவாசல் நிர்வாகம் கோரிக்கை விடுத்துள்ளது.

அமைச்சர் சம்பிக்க ரணவக்கவுடனான கலந்துரையாடலில் இவ்விடயமும் ஆராயப்பட்டது.

தற்போது பள்ளிவாசலைச் சூழ வாழ்ந்து வரும் சுமார் 20 தமிழ், முஸ்லிம், சிங்கள குடும்பங்களுக்கும் பள்ளிவாசலுக்கென ஒதுக்கப்படும் காணிக்கருகில் காணிகள் வழங்கப்பட வேண்டுமெனவும் அமைச்சரிடம் வேண்டப்பட்டுள்ளது.

சுமார் ஒன்றரை மணிநேரம் நடைபெற்ற இக்கலந்துரையாடலின் பின்பு அமைச்சர் சம்பிக்க தம்புள்ளை பள்ளிவாசல் விவகாரத்துக்கு விரைவில் தீர்வு பெற்றுத் தருவதாக உறுதியளித்ததாகவும் அசாத்சாலி தெரிவித்தார்.

தம்புள்ளை பள்ளிவாசல் 2012 ஆம் ஆண்டு ஏப்ரல் மாதம் 20 ஆம் திகதி தம்புள்ளை ரங்கிரி ரஜமகாவிகாரை அதிபதி இனாமலுவே தேரரின் தலைமையிலான குழுவின ரால் தாக்கப்பட்டமை குறிப்பிடத்தக்கது.

தம்புள்ளை புனித பூமியில் பள்ளிவாசல் இருக்கக்கூடாது அப்புறப்படுத்தப் படவேண்டுமென அன்று முதல் அழுத்தங்கள் பிரயோகிக்கப்பட்டு வருவது குறிப்பிடத்தக்கதாகும்.