ஞானசாரா - மைத்திரி சந்திப்பு, மிகத் தவறானது என்கிறார் சிராஸ்

ரவுடியாக அடையாளம் காணப்பட்டுள்ள ஞானசாராவை ஜனாதிபதி மாளிகைக்கு அழைத்து, அவருடன் ஜனாதிபதி மைத்திரிபால சந்திப்பு மேற்கொண்டமை மிகப்பெரும் தவறாகும் என மூத்த முஸ்லிம் சட்டத்தரணியான சிராஸ் நூர்த்தீன் ஜப்னா முஸ்லிம் இணையத்திற்கு கூறினார்.

அவர் இதுகுறித்து மேலும் கூறுகையில்,

பல நீதிமன்ஙகளில் ஞானசாரா குறித்த வழக்குகள் நடைபெறுகிறது. அவர் நீதிமன்றத்தை அவமதித்துள்ளார். பிடிவிறாந்துகூட பிறப்பிக்கப்பட்டவர், சிறையில் அடைக்கப்பட்டவர், இஸ்லாத்தை அவமதித்தவர், அல்குர்ஆனை தூற்றியவர்.

இனவாதத்திற்கு தூபமிட்டவர், கலவரத்திற்கு வித்திட்டவர், பள்ளிவாசல்கள் தாக்கப்பட காரணமானவர், கிறிஸ்த்தவ தேவாலயங்களில் தாக்குதலின் காரணகர்த்தா.

இப்படியெல்லாம் அவர் மீது தெளிவான குற்றச்சாட்டுக்கள் இருக்கையில் நாட்டின் ஜனாதிபதி இப்படிப்பட்ட ஒரு ரவுடி பௌத்த மதகுருவை எப்படி ஜனாதிபதி மாளிகைக்கு அழைத்து கலந்துரையாடலாம்..?

ஞானசாரா போன்ற ஒரு அடாவடி பௌத்த குருவுடன் கிறிஸ்த்தவ மதகுருக்களும், முஸ்லிம் பிரதிநிதிகளும் ஒன்றாக அமர்ந்திருந்தமையும் வெட்கப்படக்கூடியது.

நாட்டின் ஜனாதிபதி ஒருவரே இப்படி அடாவடி பௌத்த தேரரை சந்திக்க முடியமாயின் அவர் மீது எதிர்காலத்தில் நாம் தொடர்ந்துள்ள வழக்குகளுக்கு என்னாவாகும் எனவும் சிந்திக்கத் தேன்றுகிறது. முஸ்லிம் இளைஞர்கள் சட்டத்தில் நம்பிக்கை வைத்துள்ளனர். இந்திலையில் ஜனாதிபதி மைத்திரியின் செயற்பாடானது முஸ்லிம் இளைஞர்களின் நம்பிக்கையில் பங்கத்தை ஏற்படுத்துமெனவும் சிராஸ் நூர்த்தீன் ஜப்னா முஸ்லிம் இணையத்திற்கு மேலும் தெரிவித்தார்.

ஜனாதிபதி செயலகத்தில் நேற்று (07) சர்வமத தலைவர்களுடனான கலந்துரையாடல் ஜனாதிபதி மைத்ரிபால தலைமையில் நடைபெற்றது. இதில் நீதியமைச்சர் மற்றும் பௌத்த, கிறிஸ்த்தவ், இந்து, இஸ்லாமிய மதகுருக்களுடன் பொதுபல சேனாவின் ஞானசாராவும் பங்கேற்றமை குறிப்பிடத்தக்கது.