SLTJ தௌபா செய்யுமா..?

-இப்திகார் ஹஸன்-

ஜப்னா முஸ்லிம் செய்தி வெப்தளத்தில் வெளியடப்பட்டிருந்த ஒரு செய்தியில் பின்வரும் வாசகம் பதியப்பட்டிருந்தைக் கவனித்தேன். அதாவது “சிறிலங்கா தௌஹீத் ஜமாஅத்தின் பொதுச் செயலாளர் கைது செய்யப்பட்டிருக்கிறார். அவரைச் சிறையடைப்பதில் காபிர்களின் ஆர்வத்தை விட முஸ்லிம்களின் ஆர்வம் அதிகமாக இருக்கிறது”. 

இவ்வாhத்தையினை உற்று நோக்கும் போது அவர்களின் தஃவா முறையின் முறைகேடுகளையும் அதன் பலவீனத்தன்மையும் உணரக்கூடியதாக இருக்கின்றது. நபிகளார் ஸல்லல்லாஹு அலைஹிவஸல்லம் அவர்கள் கூட தனது தஃவா பணியை ஆரம்பிக்கும் முன் ஸபா மலையில் ஏறி குறைசிகளை ஒன்று கூட்டி “இந்த மலைக்குப் பின்னால் உங்களை அழிக்க எதிரிகள் வருகின்றார்கள் என்று நான் கூறினால் என்னை நம்புவீர்களா?” என்பது போன்ற கேள்விகளைக் கேட்டு அவர்களின் உள்ளத்தில் தன்னைப் பற்றியுண்டான நம்பகத்தன்மையை எவ்வாறு இருக்கின்றது என்பதனை பரீட்சித்துப் பார்த்தார்கள். அதில் அவர்கள் வெற்றிகண்டதன் பின் தான் அவர்கள் தனது தஃவா பணியை ஆரம்பித்தார்கள். 

எனவே அண்ணல் நபி ஸல்லல்லாஹு அலைஹிவஸல்லம் அவர்கள் எமக்கு காட்டித்தந்த வழிகாட்டல்களின் மிக முக்கியமான ஒரு விடயம் எமது நடத்தைகள், பேச்சு வார்த்தைகள் மூலம் மக்களின் உள்ளங்களை வென்றெடுத்தல் வேண்டும் என்பது. 

இவ்விடயத்தினை சற்றும் கவனிக்காது சிறீலங்கா தவ்ஹீத் ஜமாஅத்தினர் (SLTJ) ஈடுபடுவது எமக்கு மிகவும் வருத்தத்தைத் தருகின்றது. அவர்கள் மற்றவர்களின் தவறுகளை விமர்சிப்பதென்றாலும் அல்லது தனது கொள்கைகளை முன்வைப்பதென்றாலும் மற்றவர்களையும், இஸ்லாமிய அமைப்புக்களையும் இழிவுபடுத்தி மட்டம் தட்டித்தான் இதுவரையும் நடந்து கொண்டே இருக்கின்றார்கள். இவ்வாறே தனது கொள்கைக்கு இணங்காத அனைவரையும் இத்தீய நடத்தையினூடாக அணுகுகின்றார்கள். 

இவ்வாறான நடவடிக்கையினால் அவர்களே தமக்குரிய எதிரிகளை அதிகமாக சம்பாதித்துள்ளார்கள் என்பது யாராலும் மறுக்க முடியாத ஒரு உண்மை. இதனை தற்பொழுதாவது அவர்கள் உணர்ந்து நடப்பார்கள் என்றால் அவர்கள் தனது வழியில் வெற்றிடைவார்கள். 

அதிலும் மிக முக்கியமான ஒரு நிபந்தனை என்னவென்றால் அவர்கள் பீஜேயானிஸக் கொள்கையில் இருந்து தௌபா செய்து விடல் வேண்டும். ஏனெனில் இந்தியாவில் அதிகமான உலமாக்கள், இஸ்லாமிய அமைப்புகள் ஒன்று சேர்ந்து பீ.ஜே என்பவரின் கொள்கை வழிகேட்டில் உள்ளது என்று தீர்ப்பு வழங்கியுள்ளார்கள். சிலர் அந்தக் கொள்கை முர்தத் எனவும் பத்வா வழங்கியுள்ளார்கள். 

எனவே இவர்கள் பீ.ஜேயின் கொள்கையில் இருந்து தௌபா செய்யாவிட்டால் இலங்கையில் உள்ள முஸ்லிம் அமைப்புகள் யாரும் எவ்விடயத்திலும் “மார்க்க விடயமாக இருக்கட்டும் அல்லது பொதுவான சமூக விடயமாக இருக்கட்டும்” சிறீலங்கா தௌஹீத் ஜமாஅத்தினர்களுடன் (SLTJ) இணையக் கூடாது. 

ஏனெனில் பாமர மக்கள் தெரியாமல் இவர்களும் முஸ்லிம்கள் என நினைத்து இவர்களது கொள்கையை பின்பற்றி வழிகேட்டில் போகாமல் பாதுகாக்கும் தார்மீகப் பொறுப்பு இஸ்லாமிய அமைப்பு மற்றும் ஜமாஅத்தினர்களுக்கு உள்ளது என்பதனை வலியுறுத்திக் கூறுகின்றேன்.