'இஸ்லாமிய அமைப்புக்களை, அடிப்படைவாதிகளாக முத்திரை குத்திய நீதியமைச்சர்'

-மஸிஹுத்தீன் இனாமுல்லாஹ்-

இன மதவாத சக்திகள் குறித்து இன்று பாராளுமனறத்தில் நீதி அமைச்சர் ஆற்றிய உரை ஆறுதலையும் அதேவேளை கவலையையும் தருகின்றது, இலங்கையில் உள்ள சில இசலாமிய அமைப்புகளை பெயர் கூறி அவற்றை அடிப்படைவாத சக்திகளாக குறிப்பிட்டமை அவர் தவறாக வலை நடத்தப் பட்டுள்ளார் என்பதனை உணர்த்துகின்றது.
முஸ்லிம் பாராளுமன்ற உறுப்பினர்கள் அல்லது அமைச்சர்கள் அதுகுறித்த தெளிவோன்றை அவருக்கு வழங்க வேண்டும், அதேபோல் அந்த உயர் சபையிலும் தெரிவிக்க வேண்டும்.
இலங்கையில் உள்ள எந்தவொரு இஸ்லாமிய அமைப்பும், கல்வி நிலையமும் அடிப்படிவாத தீவிர வாத சிந்தனை கொண்டவை அல்ல, எந்தவொரு பிறநாட்டு சகதிகளுடனும் தொடர்புகள் கொண்டவையுமல்ல, எந்தவொரு இக்கட்டான தருணங்களிலும் முஸ்லிம்களை வன்முறைகளை நோக்கி அவை வழிநடத்தவும் இல்லை.
மாறாக ஜனநயாக வழிமுறைகளில் முஸ்லிம்கள் தமது உரிமைகளை,இருப்பை,பாதுகாப்பை உறுதிப்படுத்திக் கொள்வதனையே அத்தனை அமைப்புக்களும், நிறுவனங்களும் வலியுறுத்தி வருகின்றன.
இந்த நாட்டில் இனங்களுக்கிடையிலான சமாதான சகவாழ்வு மற்றும் நல்லிணக்கம் என்பவற்றிற்கு தொடர்ந்தும் அவை பங்களிப்புச் செய்து வருகின்றன போன்ற இன்னோரன்ன விடயங்களை அந்த உயர் சபையில் முஸ்லிம் அரசியல் தலைமைகள் நிதானமாக சாணக்கியமாக வலியுறுத்தி பதிவு செய்தல் வேண்டும்.
அரசியல் நோக்கங்களிற்காக பாராளுமன்றத்தில் அல்லது அமைச்சரவையில் ஆக்ரோஷமாக பேசுவதும் அவற்றை உடனடியாக ஊடகங்களிற்கு ஒழுகச் செய்வதும் கூட ஆரோக்கியமான அரசியலாகாது.
ஏனைய சமூகங்களைப் போல முஸ்லிம்களுக்கும் இந்த நாட்டில் எல்லா வித உரிமைகளும் இருக்கின்றன, நல்லாட்சி மாற்றத்திற்கு மாத்திரமல்லாது இந்த நாட்டில் அமைதி சமாதானம் ஸ்திரத் தன்மை அபிவிருத்தி என எல்லா துறைகளிலும் முஸ்லிம்கள் பாரிய பங்களிப்புக்களை செய்து வருகின்றனர்.
இந்த நாட்டில் யாருக்கும் அஞ்சி வாழவோ கெஞ்சி வாழவோ வேண்டிய அவசியம் எந்தவொரு சிறுபான்மை சமூகத்திற்கும் இல்லை என்பதனை பெரும்பான்மையான பெரும்பான்மை சமூகத்தினர் ஏற்றுக் கொள்கின்றனர்.
நல்லாட்சி அரசின் தலைவர்களும் அந்த நிலைப்பாட்டில் இருப்பதனையும், பேரினவாத சகதிகளை கையாள்வதில் அரசிக்கு இருக்கின்ற அரசியல் பரிமாணங்களையும் முஸ்லிம் சமூகத் தலைமைகள் உள்வாங்கி நிதானமாக சகிப்புத் தன்மையோடு நடந்துகொள்வதனையும் தெளிவாக தேசத்தின் தலைவர்களிற்கு உணர்த்துதல் வரலாற்றுக் கடமையாகும்.
கடந்த காலங்களில் கட்டவிழ்த்து விடப்பட்ட இனமத காழ்ப்புணர்வு பரப்புரைகள் வன்முறைகளிற்கு பின்னால் பல்வேறு அரசியல் நிகழ்ச்சி நிரல்கள் இருந்தது போல் தற்பொழுது ஏற்பட்டுள்ள பதட்ட நிலைகளிற்குப் பின்னாலும் அரசியல் நிகழ்ச்சி நிரல் இருப்பதாக ஜனாதிபதி மற்றும் பிரதம மந்திரி இருவரும் தெரிவித்துள்ளனர்.
அரசியலும் இராஜ தந்திரமும் முஸ்லிம் சமூகம் பறிகொடுத்து பரிதவிக்கும் பிரதான ஆயுதங்களாகும்.
தேசிய ஷூரா சபை, அகில இலங்கை ஜம்மியத்துல் உலமா போன்ற சிவில் சன்மார்கத் தலைமைகளுடன் அரசியல் தலைமைகளும் ஏனைய அமைப்புக்களும் கூட்டுப் பொறுப்புடன் செயற்படுவது களத்தின் தேவையாகும்.