இனவாதிகளை கைதுசெய்ய, அதிரடி உத்தரவு

இனவாத மற்றும் அடிப்படைவாத ஊடகப் பிரசாரங்களில் ஈடுபட்டுள்ள குழுக்களை உடனடியாக கைது செய்யுமாறு ஜனாதிபதி பிரதமருக்கு உத்தரவிட்டுள்ளதாக பொலிஸ் தலைமையக தரப்புத் தகவல்கள் தெரிவிக்கின்றன.

இதனடிப்படையில், சிங்களவர்கள் அல்லாத ஏனைய இனங்களுக்கு எதிராக துவேஷத்தை தூண்டும் வகையில் ஆர்ப்பாட்டம் ஒன்றில் ஈடுபட்ட, டேன் பியசாத் என்ற நபரை கைது செய்துள்ள பொலிஸார், தவ்ஹித் ஜமாத் அமைப்பின் அப்துல் ராசிக் என்பவரையும் கைது செய்யள்ளனர்.

டேன் பியசாத் என்று அழைக்கப்படும் தெமட்டகொடையை சேர்ந்த சுரேஷ் பியசாத் என்ற நபர், கொழும்பு கோட்டை நீதவான் நீதிமன்றத்தில் ஆஜர்ப்படுத்தப்பட்டு 10 நாள் விளக்கமறியலில் வைக்கப்பட்டுள்ளார்.

இனவாதத்தை தூண்டியமை, இனங்களுக்கு இடையில் அமைதியின்மையை உருவாக்க முயற்சித்தமை ஆகிய குற்றச்சாட்டில் இந்த நபர் கைது செய்யப்பட்டுள்ளார்.

கைது செய்யப்படுவதற்கு முன்னர் சமூக வலைத்தளங்களில் கடும் இனவாதமாக பேசியிருந்த பியசாத் என்ற இந்த நபர் நேற்று கைது செய்யப்படும் போது தான் தவறு செய்யவில்லை என பொலிஸாரிடம் கூறினார்.

இதேவேளை இந்த நபர் கைது செய்யப்படுவதற்கு முன்னர் வார இறுதியில் அனுராதபுரத்தில் பிக்குமார் கூடியிருந்த கூட்டம் ஒன்றில் உரையாற்றிய போது, நீர் வழங்கல் அமைச்சர் ரவூப் ஹக்கீம், நீர் தேக்கங்களில் விஷத்தை கலக்கக் கூடும் என குற்றம் சுமத்தியிருந்தார்.

அத்துடன் மேலும் சிலருடன் கொழும்பு கோட்டை ரயில் நிலையத்திற்கு எதிரில் வந்த பியசாத், முஸ்லிம்களுக்கு எதிராக தற்கொலை குண்டு தாக்குதல் நடத்தப் போவதாக அச்சுறுத்தல் விடுத்திருந்தார்.

நாட்டின் நல்லிணக்கத்திற்கு அச்சுறுத்தலாக இருந்து கொண்டு இனவாதத்தை கக்கி வரும் 4 பேருக்கு எதிராக பொலிஸ் மா அதிபரிடம் செய்த முறைப்பாட்டுக்கு பின்னர் இந்த கைது சம்பவம் நடந்துள்ளதாக தேசிய ஐக்கிய முன்னணியின் தலைவர் அசாத் சாலி தெரிவித்துள்ளார்.

சுரேஷ் பியசாத், பொதுபல சேனா அமைப்பின் செயலாளர் கலகொட அத்தே ஞானசார தேரர், கிழக்கு உப சங்கநாயக்கர் அம்பிட்டியே சுமணரத்ன மற்றும் தவ்ஹித் ஜமாத் அமைப்பின் தலைவர் அப்துல் ராசிக் ஆகியோருக்கு எதிராக தான் முறைப்பாடு செய்துள்ளதாகவும் அவர் கூறியுள்ளார்.