'விக்னேஸ்வரன் நினைக்கும் விடயங்களை, நிறைவேற்றிக்கொள்ள நல்லாட்சி இடமளிக்காது'

வடக்கில் இல்லாத பிரச்சினைகளை போலியாக வெளிக்காட்டுவதற்கு, வட மாகாண முதலமைச்சர் விக்னேஸ்வரனுக்கு இடமளிக்கப்படாது என சுகாதார அமைச்சர் ராஜித சேனாரட்ன தெரிவித்துள்ளார்.

வடக்கில் உரிய நிர்வாகத்தை மேற்கொள்ள சர்வதேசத்தின் ஒத்துழைப்பு அவசியம் என விக்னேஸ்வரன் கருத்து வெளியிட்டமை தொடர்பில் கொழும்பு ஊடகமொன்று, ராஜிதவிடம் வினவிய போது இதனைத் தெரிவித்துள்ளார்.

அவர் மேலும் கூறுகையில், எமது நாட்டுப் பிரச்சினைகளுக்கு நாமே தீர்வு காணாது அவற்றை சர்வதேசத்திடம் கூறுவது சில்லறைத்தனமாக செயற்பாடாகும்.

விக்னேஸ்வரன் நினைக்கும் விடயங்களை நிறைவேற்றிக் கொள்ள நல்லாட்சி அரசாங்கம் இடமளிக்காது. வடக்கில் இன்று சுமூகமான சூழ்நிலை காணப்படுகின்றது.

இதேவேளை, வடக்கில் இல்லாதப் பிரச்சினைகளை பொய்யாக கூறி விக்னேஸ்வரன் குழப்பம் விளைவித்து வருவதாக ராஜித சேனாரட்ன மேலும் தெரிவித்துள்ளார்.