தமிழ் - முஸ்லிம் அமைப்புகள் தற்போது, எங்களுடன் பேச்சு நடத்துகின்றன - மகிந்த

வடக்கில் ஆவா என்ற குழுவை தாங்கள் உருவாக்கவில்லை எனவும் அரசாங்கம் வேண்டுமென்றே சேறுபூசுவதாகவும் நாட்டுக்கும் மக்களுக்கு துரோகமிழைக்கும் எந்த செயலையும் தாங்கள் செய்யவில்லை எனவும் முன்னாள் ஜனாதிபதி மகிந்த ராஜபக்ஸ தெரிவித்துள்ளார்.

கம்பஹா உடுகம்பள பிரதேசத்தில் உள்ள நாடாளுமன்ற உறுப்பினர் பிரசன்ன ரணதுங்கவின் இல்லத்தில் நடைபெற்ற கூட்டம் ஒன்றில் உரையாற்றும் போதே அவர் இதனை கூறியுள்ளார்.

தற்போதைய அரசாங்கத்தினால், நாட்டுக்கு ஏற்பட்டுள்ள அழிவு மற்றும் சாபத்தில் இருந்து விடுப்படவே எங்கள் மீது குற்றச்சாட்டுக்களை சுமத்தி வருகின்றனர்.

நல்லாட்சி அரசாங்கம் பதவிக்கு வந்து இரண்டு ஆண்டுகளில் நாடு நிலையில்லாத நிலைமைக்கு சென்றுள்ளது. நல்லிணக்கம் என்பது இல்லாமல் போயுள்ளது.

நாங்கள் நல்லிணக்கத்தை கெடுப்பதாக சிலர் குற்றம் சுமத்துகின்றனர். நல்லிணக்கத்தை நாங்களே முதலில் ஏற்படுத்தினோம்.

வடக்கிற்கும் தெற்கிற்கும் சுதந்திரமாக பயணம் செய்ய முடியும். எனினும் எவ்வளவு காலத்திற்கு எம்மால் வடக்கிற்கு சுதந்திரமாக செல்ல முடியும் என்று தெரியாது.

வடக்கில் உருவாகியுள்ள ஆவா குழுவை எமது காலத்தில் முன்னாள் பாதுகாப்புச் செயலாளர் கோத்தபாய ராஜபக்ச உருவாக்கியதாக சிலர் எம்மீது குற்றம் சுமத்துகின்றனர். சேறுபூசுகின்றனர்.

எனினும் நாங்கள் எப்போதும் இப்படியானவற்றை செய்ததில்லை. மக்களுக்கு துரோகம் செய்ய மாட்டோம்.

அரசாங்கம் என்னை கொள்ளையன், இனவாதி, தமிழ், முஸ்லிம் மக்களுக்கு எதிரானவன் என்று கூறி ஆட்சி அதிகாரத்தை கைப்பற்றியது. அப்படியான ஒரு நிலைப்பாட்டை நாட்டில் ஏற்படுத்தினர்.

நாங்கள் தமிழ் மக்களுக்கு எதிராக போரிடவில்லை. பயங்கரவாதத்திற்கு எதிராகவே போரிட்டோம். பிரபாகரன் வடக்கில் இருந்து தமிழ் மற்றும் முஸ்லிம் மக்களை விரட்டியடித்தார்.

நாங்கள் இந்த மக்கள் வடக்கில் சுதந்திரமாக வாழும் சூழலை ஏற்படுத்திக்கொடுத்தோம்.

வெளிநாட்டு சக்திகள் இணைந்து எமது அரசாங்கத்திற்கு எதிராக சூழ்ச்சி செய்தன. தற்போது மக்களுக்கு இது புரிய ஆரம்பித்துள்ளது.

தமிழ், முஸ்லிம் மக்களின் அமைப்புகள் தற்போது எங்களுடன் பேச்சுவார்த்தைகளை நடத்தி வருகின்றன. தவறி போனது என்பதை அவர்கள் அறிந்துக்கொண்டுள்ளனர் என முன்னாள் ஜனாதிபதி மகிந்த ராஜபக்ஸ குறிப்பிட்டுள்ளார்.