ஆட்சியாளர்களை நம்பி, ஏமாந்து விட வேண்டாம் - மனோ

ஆட்சியாளர்கள் கிராமங்கள் தொடங்கி ஐக்கிய நாடுகள் சபை வரை அள்ளி வீசும் வாக்குறுதிகளையும் பிரகடனங்களையும் உத்தரவாதங்களையும் அளவுக்கு அதிகமாக நம்பி ஏமாந்து போய் விட வேண்டாம் என தேசிய சகவாழ்வு கலந்துரையாடல் மற்றும் அரசகரும மொழிகள் அமைச்சரும் தமிழ் முற்போக்கு கூட்டணித் தலைவருமான மனோ கணேசன் தெரிவித்தார்.

சமூக அபிவிருத்தி நிறுவனத்தின் ஏற்பாட்டில் கொழும்பில் இன்று(21) இடம்பெற்ற உண்மை மற்றும் நல்லிணக்கத்திற்கான மக்கள் ஒன்றியத்தினை அங்குரார்ப்பணம் செய்து வைக்கும் நிகழ்வில் அவர் உரையாற்றும் போதே மேற்கண்டவாறு தெரிவித்தார். அங்கு தொடர்ந்து உரையாற்றிய அவர்,

இந்த நாட்டில் தீர்க்கப்படாத ஒன்றாக இருந்து கொண்டிருக்கும் இனப் பிரச்சினைதான் மனித உரிமை மீறல்கள் அனைத்துமே நடைபெறுவதற்கு பிரதான காரணமாக இருந்து கொண்டிருக்கின்றது.

போர்க் குற்றம், அரசியல் படுகொலைகள், சட்டவிரோத கொலைகள், மனிதக் கடத்தல்கள், காணாமலாக்குவது அனைத்துமே நேரடியாகவோ மறைமுகமாகவோ நடந்தேறியிருப்பதற்கு இனப்பிரச்சினை தீர்க்கப்படாமலிருப்பதுதான் அடிப்படைக் காரணமாக அமைந்திருக்கின்றது என்பதனை ஆட்சியாளர்கள் புரிந்து கொள்ள வேண்டும்.

தேசிய இனப்பிரச்சினை தீராத வரைக்கும் நாட்டின் எந்தப் பிரச்சினையும் தீராது. நாட்டின் தேசிய இனப்பிரச்சினையோடு சம்பந்தமில்லாமல் நடக்கும் குற்றச் செயல்கள் ஒரு ஐந்து வீதமாகத்தான் இருக்கும்.
நாட்டின் ஆட்சியாளர்கள் கண்ணிருந்தும் குருடர்களாகவும் காதிருந்தும் செவிடர்களாகவும் அறிவிருந்தும் முட்டாள்களாகவும் இருப்பதுதான் இனப் பிரச்சினைக்கான தீர்வு இழுத்தடிப்பதற்கான காரணங்களாகும்.