வடகிழக்கு இணைப்பிற்கு எதிரான, கோசம் போடுபவர்களை கண்டிப்பவர்களுக்கு..!

வடகிழக்கு இணைப்பிற்கு மு.கா தலைமை உடன்பாடு என்பதை விட அதுவே மு.கா கட்சியின் நீண்ட கால நிலைப்பாடு எனலாம் (இணைந்த வடகிழக்கில் முஸ்லிங்களுக்கான தனி அழகு) 

வடகிழக்கு இணைப்பிற்கான முன்னெடுப்புகளை நல்லாட்சி அரசாங்கத்தின் உதவியுடன் சர்வதேசமும் டயஸ்போறாக்களும் சேர்ந்து செய்து கொண்டு இருக்கிறார்கள் என்பதே உண்மை. இம்முன்னெடுப்புகள் ஆரம்பத்தில் ஆட்டம் காணாமல் இறுக்கமான தளமாக போடப்படுமானால் அடுத்த கட்ட நகர்வுகள் இலகுவாக அமையும்.

எனவே, இவ்வாரம்ப  முன்னெடுப்புகளுக்கான எதிர்வினையே கிழக்கு முஸ்லிம் மக்களின் வடகிழக்கு இணைப்பிற்கு எதிரான கோஷங்கள் ஆகும். இவ்விடயத்தில் கிழக்கு முஸ்லிம் மக்கள் அரசியல்வாதிகளை நம்புவதற்கு தயாரில்லை என்பதனால், இவ்விடயம் தொடர்பாக  கிழக்கு  மக்கள் அதிக கரிசனை செலுத்துவதை புரிந்து கொள்ளக்கூடியதாகவுள்ளது. 

அதுமட்டுமில்லாமல் நல்லாட்சி அரசாங்கத்தில் காணப்படும் தலைவர்கள் கூறும் கருத்துக்கள்  கூட முஸ்லிங்கள் மத்தியில் பலவிதமான கருத்துக்களை தோற்றுவித்துள்ளது.  இவ்வாறான தலைவரின் கருத்துக்களுக்கு எதிரான வெளிப்பாடுகளே வடகிழக்கு இணைப்பிற்கு எதிரான கோஷங்களுக்கு இன்னுமொரு காரணி எனலாம்.

மு.கா கட்சியின் பயணத்தில், முன்னாள் தலைவர் தொடக்கம் இன்றுவரை இனப்பிரச்சினைக்குரிய தீர்வாக இணைந்த வடகிழக்கில் முஸ்லிங்களுக்கான தனி அழகு எனும் கோரிக்கையே வலுப்பெற்று இருக்கிறது. இதனையே மு.கா தாரக மந்திரமாக கொண்டுள்ளது. இதில் மு.கா தலைவர் உறுதியாக இருக்கிறார் என்பதை "2006 வடகிழக்கு பிரிப்பு நீதிமன்ற தீர்ப்பிற்கு பிறகு தலைவர் ரவூப் ஹக்கீம் ஊடக அறிக்கை" மூலம் புரிந்து கொள்ளலாம். 

வடகிழக்கு பிரிப்பின் பின் மு.கா தலைமை ரவூப் ஹக்கீம் அவர்களின் ஊடக அறிக்கையின் ஒரு பகுதி ...

ஸ்ரீலங்கா முஸ்லிம் காங்கிரஸைப் பொறுத்தவரையில் எமது முன்னாள் தலைவர் எம்.எச்.எம்.அஷ்ரபின் காலம் தொட்டு நிபந்தனையுடனான வடக்கு – கிழக்கு இணைப்பை நாங்கள் கொள்கையாகக் கொண்டிருந்தோம்.

அன்றைய அரசு 1987 ஆம் ஆண்டு இந்திய - இலங்கை ஒப்பந்தத்தின் மூலம் முஸ்லிம்களிடம் எதையும் கேட்கவில்லை. அதேபோன்று இன்று வடக்கு – கிழக்கைப் பிரிப்பதிலும் முஸ்லிம்களுக்கு எந்த பங்கும் இருக்கவில்லை. வடக்கு – கிழக்கு முஸ்லிம்களின் பிரதான அரசியல் அபிலாசை, அங்கு சுயநிர்ணய உரிமையுடன் கூடிய இனத் தொடர்பற்ற முஸ்லிம் பெரும்பான்மை அலகு என்பதைத் தவிர வேறொன்றும் இல்லை. 

அத்துடன் மு.கா பிரதித் தலைவர்களில் ஒருவரான பிரதியமைச்சர் ஹரீஸ் அவர்கள் "வடக்குடன் கிழக்கை இணைப்பதற்கு மு.கா நிபயந்தனையுடன் ஆதரவு" என்று கூறியிருந்தார்.

அது மட்டும் இல்லாமல் ஏனைய முஸ்லிம் காங்கிரஸ் உறுப்பினர்களும் அதே நிலைப்பாட்டுடன்  தான் இருக்கிறார்கள்.

நல்லாட்சி அரசாங்கத்தின் ஜனாதிபதி அவர்கள் ....

"அண்மையில் வடக்கு மாகாணத்தில் (எந்த இடம் என்று மறந்துவிட்டது) நடைபெற்ற ஜெர்மன் கல்லூரி திறப்பு விழாவில் கலந்து கொண்ட ஜனாதிபதி அவர்கள், இலங்கையில் சிங்களவர்கள் நின்மதியாக வாழவேண்டும் என்றால் தமிழர்களுக்குரிய தீர்வுகள் வழங்கப்பட வேண்டும்" என்று கூறினார்.

சுதந்திர கட்சியின் 65வது ஆண்டு விழாவில், ஜனாதிபதியின் உரையிலிருந்து.......

பாண்டா - செல்வா ஒப்பந்தம் மற்றும் டட்லி - செல்வா ஒப்பந்தங்களுக்கு சிலர் இடமளிக்கவில்லை, இதன் பலனாக பாரிய யுத்தம், இந்திய ராணுவத்தின் வருகை, 13வது திருத்தச் சட்டம் என்பன நாட்டுக்குள் வந்தன. நாம் முதலில் செய்ய வேண்டியதை முன்னரே செய்திருந்தால் இந்த பாரிய பேரழிவு நடந்திருக்காது. (http://www.jaffnamuslim.com/2016/09/65.html) 

இதன் மூலம் ஜனாதிபதி சொல்ல வருவது என்ன? தமிழ் மக்கள் எதிர்பார்க்கும் தீர்வை கொடுப்பதற்கு ஜனாதிபதி உடன்பட்டுள்ளாரா? 

#இணைந்த வடக்கு கிழக்கில் முஸ்லிங்களுக்குரிய நிர்வாக அதிகார சபை கொடுப்பதற்கு தமிழர்களுக்கு ஆட்சேபனை இல்லை என்று வடக்கு மாகாணசபை முதல்வர் விக்னேஸ்வரன் ஐயா எதற்காக தெரிவித்தார்.  

வடகிழக்கு இணைப்பு சாத்தியமில்லை என்பதைவிட, அவ்வாறான முன்னெடுப்புகள் முஸ்லிங்களின் அனுமதி பெற்று முஸ்லிங்களுக்குரிய தீர்வுகளுடன் இடம்பெற வேண்டும் என்பதே கோசம் போடுபவர்கள் உண்மை நிலைப்பாடு ஆகும். வடகிழக்கு இணைப்பிற்கு எதிரான கோசம் போடுபவர்களை கண்டிப்பவர்கள் மேலேயுள்ள தலைவர்களின் கருத்துக்களுக்கு என்ன சொல்ல போகிறார்கள்.

-Manaff Ahamed Rishad-