முஸ்லிம்களை விக்னேஸ்வரன், இரையாக்கப் பார்க்கிறார்...!

 -ஆரூர் சலீம், ஊடகவியாலாளர், இந்திய-

இலங்கையில் நடைபெற்ற இறுதிகட்டப்போரில், தமிழர்கள் தங்கள் உடமைகள், உயிர்கள், மானம் என்று அனைத்தையும் இழந்தார்கள். பெரும் கோடீஸ்வரர்களும், அடுத்தவேளை உணவுக்கு கையேந்தி நின்றார்கள். அதுவரை தனிநாடு, அரசியல் அதிகாரம் என்று சொல்லிக்கொண்டிருந்தவர்கள், உயிர்பிழைத்து வாழ்ந்தாலே போதும் என்ற மனநிலைக்கு உள்ளானார்கள். அதன்பிறகு, ஒருவழியாக, போருக்கு முக்கிய காரணமாக இருந்த விடுதலைப்புலிகள் அமைப்பு தலைவர் பிரபாகரன் கொல்லப்பட்டு, அந்த இயக்கம் அழிக்கப்பட்ட பிறகு, தமிழர்கள் மட்மின்றி ஒட்டுமொத்த இலங்கையுமே நிம்மதி பெருமூச்சு விட்டது. இனி, இலங்கையில், பிரச்னை நீங்கி, வளர்ச்சி திட்டங்களில் கவனம் செலுத்த முடியும் என்று அனைவரும் கருதினார்கள். அங்கு, முதலீடு செய்ய வெளிநாட்டு முதலாளிகள் பலரும் ஆர்வம் காட்டினார்கள். 

ஆனால், அப்போதைய அதிபர் ராஜபக்சே சீனாவுக்கு ஆதரவாக இருந்ததால், அவரை மீண்டும் பதவிக்கு வரவிடாமல் தடுக்க அமெரிக்கா திட்டம் போட்டது. அதற்கேற்ப இப்போதைய அதிபர் மைத்திரி பால சிறிசேனா என்பவர், சிறுபான்மையினருக்கு ஆதரவானவர் என்று நம்பவைக்கப்பட்டு, அமெரிக்காவின் ஆசியோடு ஆட்சியில் அமரவைக்கப்பட்டார். இப்போது, அதன்விளைவாக, இலங்கையில் மீண்டும் குழப்பம் ஆங்காங்கே தலைதூக்கி வருகிறது. அத்தகைய குழப்பத்தை விளைவிப்பதில், தமிழ் அரசியல்வாதிகள் முக்கிய பங்கை வகிக்கின்றனர். 

வடக்கு மாகாணத்தில் பெரும்பான்மையாக தமிழர்களும், கிழக்கு மாகாணத்தில் முஸ்லிம்கள் கணிசமான அளவில் நிறைந்து வாழ்பவர்களாகவும் உள்ளனர்.. இந்த நிலையில், இருமாகாணங்களையும் இணைக்க வேண்டும் என்று கோரிக்கையை தமிழ் அரசியல்வாதிகள் வலியுறுத்தி வருகின்றனர். சர்வதேச சமூகங்களிடம், இந்த கோரிக்கையை வடக்கு மாகாண முதல்வர் விக்னேஸ்வரன் தலைமையிலான குழு, ஓயாமல் வலியுறுத்தி லாபி செய்து வருகிறது.

அப்படி, வடக்கு மற்றும் கிழக்கை இணைத்தால், வடகிழக்கு மாகாணத்தில், தமிழர்கள் பெரும்பான்மையாக மாறி, அரசியல் ரீதியாக பலம் பெறுவார்கள் ; ஆனால், தற்போது கிழக்கில் முஸ்லிம்கள் பெற்றுள்ள அரசிய பலம் குறைந்து, அவர்கள் சிறுமையடைவார்கள். கிழக்கில் முஸ்லிம்களின் பலம் குன்றி, அவர்கள் தமிழர்களின் தயவை எதிர்பார்த்தே வாழ வேண்டி வரும் என்று நன்கு தெரிந்திருந்தும், வடக்கு மாகாண முதலமைச்சர் விக்னேஸ்வரன், இரண்டு மாகாணங்களையும் இணைக்க வேண்டும் என்று வலியுறுத்தி வருகிறார். இதற்காக, குள்ளநரி வேலைகளிலும் ஈடுபட்டு வருகிறார்.  தமிழர்கள் நிலப்பசிக்கு, முஸ்லிம்களை இரையாக்கப் பார்க்கிறார்.

சமீபத்தில், ‘எழுக தமிழ்’, என்ற பேரணியை அவர் நடத்தினார். அதில், முஸ்லிம்களும், தமிழர்கள் தான் ; அவர்கள் வேறல்ல என்று கூறினார். தங்களை முஸ்லிம்களை என்று கூறிக்கொள்வது, அரசியல் ஆதாயத்துக்குதான் என்று கூறி முஸ்லிம் அடையாளத்தை கொச்சைப்படுத்தி, கோபத்தை கிளப்பியுள்ளார். 

முஸ்லிம்கள் தங்களையும் தமிழர்கள் நம்பியது ஒருகாலம். ஆனால், விடுதலைப்புலிகள் தலைவர் பிரபாகரன், முஸ்லிம்களை தமிழர்கள் என்று பார்க்கவில்லை. போர்நிறுத்தம் ஒப்பந்தத்தில் இருந்தபோதும், முஸ்லிம்களை கொல்வதை விடவில்லை. அவர்களை சொந்த நிலங்களிலிருந்து விரட்டினார். சொத்துகளை கொள்ளையடித்தார். இனசுத்திகரிப்பு என்ற பெயரில், அவருடைய கட்டுப்பாட்டில் இருந்த பகுதியில் இருந்து, முஸ்லிம்களை வெளியேற்றினார். பள்ளிவாசலுக்கு புகுந்து நூற்றுக்கணக்கானோரை சுட்டுக்கொன்றார். இன்னும் சொல்ல முடியாத பல கொடுமைகளை செய்தார்.

அப்போது, விக்னேஸ்வரன் மவுன சாட்சியாக இருந்தாரே தவிர, முஸ்லிம்களும் தமிழர்கள்தான்; அவர்களை கொல்லக்கூடாது என்று சொல்லவில்லை ; கண்டனம் தெரிவிக்கவில்லை. ஆனால், இப்போது, முஸ்லிம்களும் தமிழர்தான் என்று முதலைக் கண்ணீர் வடிக்கிறார்.. ஆனால், விக்னேஸ்வரன் சொல்வதை முஸ்லிம்கள் நம்பமாட்டார்கள். விக்னேஸ்வரன், முஸ்லிம்களின் நிலத்தை அபகரித்து, தமிழர்களின் நிலப்பசிக்கு அதை தீனியாக்கப்பார்க்கிறார் என்று அவர்களுக்கு நன்றாகவே விளங்கும். 

தமிழின வெறியால், ஏற்கனவே இலங்கை நாட்டு சிங்களவர்கள், முஸ்லிம்கள், தமிழர்கள் என்று அனைத்து தரப்பு மக்களும் நிறைய துன்பங்களை அனுபவித்து விட்டார்கள். அதன் கொடூர விளைவுகளை, பல வருடங்களாக அனுபவித்து விட்டார்கள். அழகு கொஞ்சும் இலங்கையை அலங்கோலமாக்கிய பெருமை தமிழின வெறியையே சாரும். எனவேதான், பிரபாகரன் அழிக்கப்பட்டதற்கு, தமிழர்களே ஆதரவு தெரிவித்தார்கள். 

ஆனால், இப்போது அதை விக்னேஸ்வரன் போன்றவர்கள் மறந்துவிட்டு, நயவஞ்சகமாக, அரசியல் அதிகாரத்தை அடைய திட்டம் போடுகின்றனர். ஆயுதப்போராட்டத்தால் அடைய முடியாத ஆதிக்கத்தை, இப்போது தந்திரத்தால் அடையப் பார்க்கின்றனர். இது தமிழர்கள்- முஸ்லிம்கள் நல்லிணக்கத்தை கெடுக்கவே செய்யும் என்று அவர்கள் கவலைப்படவில்லை.

ஒன்றாக இணைந்து வாழ வேண்டும் என்ற சிந்தனையை குழிதோண்டி புதைக்கும் என்றும் உணரவில்லை. தொடர்ச்சியாக, விக்னேஸ்வரன் போன்ற தமிழ் அரசியல்வாதிகள், முஸ்லிம்கள் ஆதிக்கம் பெறுவதற்கு எதிராக சதிகளை தீட்டி வருகிறார்கள். அடித்து விரட்டப்பட்ட முஸ்லிம்கள் தங்கள் சொந்த நிலங்களில் குடியேறுவதை கூட, மனசாட்சி இல்லாமல் தடுக்கப்பார்க்கிறார்கள். 

இது, தமிழர்கள், பிரச்னைக்குரியவர்கள் என்பதையே மற்ற இனத்தவர்கள் மத்தியில் தோற்றுவிக்கும். இவர்களோடு, இணைந்து வாழ்வது எந்த காலத்திலும் சாத்தியம் இல்லாதது என்ற எண்ணத்தை முஸ்லிம், சிங்களவர்கள் மத்தியில் தோற்றுவிக்கும். எனவே, இலங்கை தமிழர்கள், விக்னேஸ்வரனின் தவறான போக்கை கண்டிக்க வேண்டும். தங்களுடைய உரிமைகளை அரசிடம் கேட்டுப்பெறலாமே தவிர, அடுத்தவர்களின் முன்னேற்றத்தை தடுக்க நினைக்கக்கூடாது. 

பொறாமை, தன்னையும் அழித்து பிறரையும் அழித்து விடும். இதை விக்னேஸ்வரன் போன்றவர்களுக்கு, தமிழர்கள்தான் புரிய வைக்க வேண்டும். இல்லாவிட்டால், இலங்கையை சின்னபின்னமாக்கி, அமைதியை கெடுத்தவர்கள் என்ற பழியை, தமிழர்கள் சுமக்க நேரிடும்.