ஹஜ் யாத்திரை குறித்து, இஸ்லாமிய நாடுகள் மறுபரிசீலனை செய்ய வேண்டும் - அயதுல்லா கமேனி

ஆண்டுதோறும் இஸ்லாமியர்களால் மேற்கொள்ளப்படும் ஹஜ் புனித யாத்திரை நிர்வாக ஏற்பாடுகள் தொடர்பாக, செளதி அரேபியா நிர்வாகத்தின் மீது ஈரானின் உயரிய மதத்தலைவர் அயதுல்லா கமேனி கடும் கண்டனம் தெரிவித்துள்ளார்.

இந்த ஆண்டு ஹஜ் யாத்திரை, செப்டம்பர் 11-ம் தேதி துவங்கும் நிலையில், ஈரானியர்கள் யாரும் பங்கேற்க மாட்டார்கள்.

இந் நிலையில், அயதுல்லா கமேனி வெளியிட்டிருக்கும் அறிக்கையில், ஹஜ் யாத்திரை நடத்தப்படும் விதம் குறித்து அடிப்படை ரீதியாக இஸ்லாமிய நாடுகள் மறுபரிசீலனை செய்ய வேண்டும் என்று அயதுல்லா கமேனி வலியுறுத்தியுள்ளார்.

கடந்த ஆண்டு ஹஜ் யாத்திரையின்போது, ஏற்பட்ட நெரிசலில் நூற்றுக்கணக்கான ஈரானியர்கள் உள்பட, ஏராளமான யாத்ரிகர்கள் கொல்லப்பட்டனர். செளதி அரேபியாவின் மெக்கா நகருக்குத்தான் இந்த ஹஜ் யாத்திரை மேற்கொள்ளப்படுகிறது.

அங்கு நடக்கும் உயிரிழப்புக்களுக்கு செளதி அரேபியாவின் நிர்வாகக் கோளாறுகள்தான் இதற்குக் காரணம் என ஈரான் குற்றம் சாட்டியது. "அல்லாவின் பாதையைத் தடுத்தவர்கள் செளதி ஆட்சியாளர்கள். புனித இல்லத்துக்குச் செல்லும் நம்பிக்கைக்குரிய பக்தர்களின் பாதையில் இடையூறு ஏற்படுத்தியிருக்கிறார்கள். அவர்கள் ஏமாற்றுக்காரர்கள். தவறாக வழி நடத்துபவர்கள்" என அயதுல்லா கமேனி செளதியை சாடியுள்ளார்.

"இஸ்லாமிய உலகம் முழுவதும் அந்த ஆட்சியாளர்கள் இழைத்துள்ள குற்றங்களுக்காக, அவர்கள் பொறுப்பில் இருந்து தப்புவதற்கு இஸ்லாமிய உலகம் விட்டுவிடக்கூடாது" என கமேனி வலியுறுத்தியுள்ளார்.

பேச்சுவார்த்தை தோல்வி

ஹஜ் பயணம் தொடர்பாக, கடந்த மே மாதம் இரு நாடுகளுக்கும் இடையில் பேச்சுவார்த்தை நடைபெற்றது. குறிப்பாக, ஈரானியர்களுக்கு வழங்கப்படும் விசா மற்றும் விமானச் சேவைகள், அவர்கள் ஹஜ் பயணத்தை நிறைவு செய்ய முடியாத அளவுக்கு உள்ளதாக ஈரான் தரப்பில் குற்றம் சாட்டப்படுகிறது. இப் பிரச்சினைகளுக்கு பேச்சுவார்த்தை மூலம் தீர்வு காண மேற்கொண்ட முயற்சி பலனளிக்கவில்லை.

ஈரானியர்களின் பாதுகாப்பு மற்றும் மரியாதை தொடர்பான கோரிக்கைகளை நிறைவேற்ற செளதி தவறிவிட்டதாக ஈரான் கூறுகிறது. ஆனால், அந்தக் கோரிக்கைகள் ஏற்க முடியாதவை என செளதி நிராகரிக்கிறது.

கடந்த ஆண்டு ஹஜ் யாத்திரையில் 60 ஆயிரம் ஈரானியர்கள் பங்கேற்றனர். மெக்கா அருகே ஏற்பட்ட நெரிசலில் 400 பேர் கொல்லப்பட்டனர்.

மத்திய கிழக்கில் இரு நாடுகளும் தொடர்ந்து பகைமை பாராட்டி வருகின்றன.

இந்த ஆண்டு ஜனவரி மாதம், இரு தரப்புக்கும் இடையிலான தூதரக உறவுகள் முறிந்துவிட்டன. சுன்னி முஸ்லிம்களப் பெரும்பான்மையாகக் கொண்ட செளதியில், ஷியா முஸ்லிம் மதகுரு ஒருவர் தூக்கிலிடப்பட்ட விவகாரத்தை அடுத்தே இந்த முறிவு ஏற்பட்டது.