"முஸ்லிம்களுக்கு எதிரான இனவாதம், மௌன அங்கீகாரம் வழங்கும் நல்லாட்சி"

-Mohamed Al Alavy-

சென்ற ஜனாதிபதித் தேர்தலின் போது தன்னை இலங்கையின் மண்டேலாவாக சித்தரித்துக் காட்ட நெல்சன் மண்டேலாவினதும் மகாத்மா காந்தியினதும் புகைப்படங்களை தனது புகைப்படங்களுடன் இனைத்து ஊழலுக்கு முற்றுப்புள்ளி, மக்கள் மீதான வரிச்சுமை நீக்கம், இனவாதத்திற்கு முற்றுப்புள்ளி போன்ற கோஷங்களை முதன்மைப் படுத்தி தேர்தல் பிரசாரத்தில் ஈடுபட்டதனாலே  ஏதோ தப்பிப் பிழைத்து சிறுபான்மையினரின் ஆதரவுடன் குறிப்பாக முஸ்லிம்களின் 98/= ஆதரவுடன் இன்றைய ஜனாதிபதிக்கு ஆட்சியை பிடிக்க முடிந்தது. 

தேர்தல் பிரசாரங்களின் போது ஊழல்' வரிச்சுமை என பல்வேறு குற்றச்சாட்டுகளை மஹிந்த அரசுக்கெதிராக இவர்கள் முன்வைத்தாலும் முஸ்லிம்களை பொருத்தவரை அவர்கள் மஹிந்த ராஜபக்ஷவுக்கு எதிராக வாக்களித்தமைக்கான பிரதான காரணம் தமது இனத்திற்கு எதிராக கட்டவிழ்த்து விடப்பட்ட மூர்க்கத்தனமாக தாக்குதல்களும் , முழு முஸ்லிம் சமூகத்தின் மத உணர்வுகளை கொச்சைப் படுத்தி மனங்களை புண்படுத்தும் வகையில் இனவாதிகளின் மேற்கொண்ட நடவடிக்கைகளை அவ்வரசு தடுத்து நிறுத்தாது அவர்களுக்கு பின்கதவால் உதவி செய்து கொண்டிருந்தமையேயாகும்.

மஹிந்தவைத் தோற்கடித்து மைத்திரிபால சிரிசேனவை ஆட்சியில் அமரவைக்க துருப்புச் சீட்டாக செயல்பட்ட மற்றுமொரு முன்னாள் ஜனாதிபதியான சந்திரிகா அம்மையார் முஸ்லிம்களுக்கு மத்தியில் உரையாற்றுகையில் 

'இனவாதிகள் முஸ்லிம்களுக் கெதிரான நடவடிக்கைகளில் ஈடுபட்டால் அவர்களை நாய்கூண்டில் அடைப்பேன் என்று வீராவேசமாக பேசியதை முஸ்லிம்கள் இலகுவில் மறந்து விட மாட்டார்கள். ஜனாதிபதித் தேர்தல் நிறைவுற்று ஒன்றரை வருடங்களுக்கு மேலாகிறது மக்கள் மீதான வரிச்சுமைகள் தலைக்கு மேல் சென்று கொண்டுருக்கிறது.

நீறுபூத்த நெருப்பாயிருந்த இனவாதம் மீண்டும் பற்றியெறிய ஆரம்பிப்பதற்கான அறிகுறிகள் கிட்டத்தட்ட தென்படத் தொடங்கியுள்ளதை தெஹிவளைப் பள்ளி' மற்றும் மஹியங்கனை சம்பவத்திற்கு உரிய நடவடிக்கை எடுக்க விடாமல் இனவாதிகள் அதை அணுகும் முறை போன்றவை படம் பிடித்துக் காட்டுகிறது. முழு உலக முஸ்லீம்களாலும் உயிரை விட மேலாக மதிக்கப்படும் இறைத்தூதரான முஹம்மது நபியையும் அல்லாஹ்வையும் அவமதிக்கும் வகையில் ஞானசார தேரர் தெரிவித்த கருத்துதானது இனவாதியான ஞானசார தேரர் தான் ஒரு மத சகிப்புத்தன்மையோ' மத விழுமியங்களை மதிக்கும் பண்பாடோ பௌத்த மதம் போதிக்கும் அறநெறியோ நாகரிகமோ தெரியாத ஒரு காவி வேஷத்தில் உலா வரும் தெருவோரச் சண்டியன் என்பதை பறைசாற்றுகிறது.

எது எப்படியோ கடந்த அரசு  இனவாதிகளுக்கு தீனி போட்டு வளர்த்ததை அரச பயங்கரவாதம் என்று வர்ணிக்கப்படுகிறதென்றால் இனவாதத்தை தூண்டும் வகையில் பேசி சிங்கள மக்களை உசுப்பேற்றிக்கொண்டிருப்போரை கண்டும் காணாதது போல ஒரு பொருப்புள்ள அரசு செயல் படுவதும்' அவர்களின் நடவடிக்கைகளை கட்டுப்படுத்த ஆக்கப்பூர்வமான நடவடிக்கைகளை எடுக்காது மௌன அங்கீகாரம் வழங்கிக் கொண்டிருப்பதும் மிகப்பெரும் பயங்கரவாதமே! 

நல்லாட்சி அரசு பகிரங்க மேடைகளில் பொதுவாகவும் முஸ்லிம்களுக்கு குறிப்பாகவும் தந்த வாக்குறுதிகளை நிறைவேற்ற முன்வர வேண்டும் என்பதே அனைவரினதும் எதிர்பார்ப்பு..!