நான் வாயைத் திறந்தால் வம்பு, எனவே மௌனவிரதம் அனுஷ்டிக்கிறேன் - ஹக்கீம்

– மப்றூக் –

ஸ்ரீலங்கா முஸ்லிம் காங்கிரசினுள் கடந்த காலங்களில் மிகப்பெரும் சவால்களையெல்லாம் தாம் சந்தித்துள்ளமையினால், தற்போது ஏற்பட்டிருக்கும் குடுமிச் சண்டையில் தான் ஈடுபட வேண்டிய தேவையில்லை என்று அந்தக் கட்சியின் தலைவரும், அமைச்சருமான ரஊப் ஹக்கீம் தெரிவித்தார்.

அதேவேளை, பத்திரிகைகளில் சிலர் அறிக்கைப் போர்களை நடத்திவரும் நிலையில், கட்சியின் தலைவர் என்கிற வகையில், தான் – ஒரு மௌன விரதத்தினை அனுஷ்டித்து,  கட்சியை மிகவும் கச்சிதமாக நடத்திக் கொண்டு செல்ல வேண்டியுள்ளதாகவும் அவர் கூறினார்.

சம்மாந்துறை ஆதார வைத்தியசாலையில் நிர்மாணிக்கப்பட்டுள்ள வெளி நோயாளர் பிரிவுக்கான கட்டிடம், மருந்துக் களஞ்சியம், இயன் மருத்துவ அலகு, தாதியர் விடுதிக் கட்டிடம், மூடிய நடைபாதை, அம்பியுலன்ஸ் வண்டித் தரிப்பிடம் மற்றும் சாரதி விடுதி ஆகியவற்றினை, அமைச்சர் ஹக்கீம் இன்று சனிக்கிழமை -02- திறந்து வைத்த பின்னர், அங்கு இடம்பெற்ற கூட்டத்தில் கலந்து கொண்டு உரையாற்றுகையிலேயே, அவர் மேற்கண்ட விடயங்களைக் கூறினார். அவர் அங்கு தொடர்ந்து பேசுகையில்;

எதிர்வரும் 05 ஆம் திகதி தொடக்கம் நாடாளுமன்றமானது அரசியல் யாப்பு சபையாக தன்னுடைய அமர்வுகளைத் தொடங்கவுள்ளது. இதனூடாக இந்த நாட்டுக்கான புதிய அரசியல் யாப்பினை உருவாக்கும் ஒரு நடவடிக்கை உருவாகவுள்ளது. எனவே, நாம் மிகத் தீவிரமாக இயங்கி, எமது சமூகத்தின் உரிமை சார்ந்த விடயங்கள் தொடர்பில் கவனம் செலுத்தி வருகின்றோம்.

எதிர்வரும் நோன்பு காலத்துக்கு முன்பாக, இங்குள்ள பிரதேசங்களில் நிலவும் குடிநீர் தட்டுப்பாட்டினை முடிவுக்குக் கொண்டுவர முடியும் என்று நம்புகிறோம். இதேவேளை, நெய்னாகாடு போன்ற பகுதிகளிலுள்ள குடிநீர் மஞ்சள் நிறத்தில் உள்ளமையினால், குடிப்பதற்கு அது உகந்ததாக இல்லை. அதற்குரிய தீர்வினையும் மிகவிரைவில் நாம் வழங்கவுள்ளோம்.

அம்பாறை மாவட்டத்தில், குடிநீர்த் தேவையினை மிக வேகமாக நிறைவு செய்யும் ஒரு நிலையினை நாம் அடைந்திருக்கின்றோம். அதற்கான ஆரம்ப கட்டப் பணியினை தொடங்கி வைத்த எமது கட்சியின் மறைந்த தலைவர் மர்ஹும் எம்.எச்.எம். அஷ்ரப் அவர்களை இந்த நேரத்தில் நன்றியுடன் ஞாபகப்படுத்திக் கொள்கிறோம்.

தற்போதைய அரசியல் சூழ்நிலையில் ஒரு மௌன விரதத்தினை நான் அனுஷ்பது நல்லது என்று நினைக்கிறேன்.  வாயைத் திறந்தால் வம்பாகப் போய்விடும் என்பதற்காகவே மௌன விரதம் நல்லது என்று நினைக்கிறேன். எனவே, தற்போதைய கட்சி விவகாரங்களைக் கதைப்பதை நான் தவிர்த்து வருகிறேன்.

பத்திரிகைகளில் சிலர் அறிக்கைப் போர்களை நடத்துகின்றனர்.  எனவே, தலைமை மட்டத்தில் ஒரு மௌன விரதத்தினை அனுஷ்டித்து,  கட்சியை மிகவும் கச்சிதமாக நடத்திக் கொண்டு செல்ல வேண்டியுள்ளது. என்னைப் பொறுத்த மட்டில் கட்சிக்குள் தற்போது நிலவுகின்றதை விடவும் மிகப்பெரும் சவால்களையெல்லாம் நாம் சந்தித்திருக்கிறோம். எனவே, தற்போதைய குடுமிச் சண்டையில் நான் ஈடுபட வேண்டிய அவசியம் இல்லை” என்றார்.

இக் கூட்டத்தில் பார்வையாளர்களாக பெருமளவிலான பொதுமக்களும் கலந்து கொண்டனர்