ஹஜ் - உம்ரா முகவர்கள், வேலை வாய்ப்பு முகவர்களாகவும் செயற்படுவது சிறந்ததல்ல

(ARA.Fareel + விடிவெள்ளி)

ஹஜ், உம்ரா முகவர்களாகப் பதிவு செய்து கொண்டுள்ளவர்கள் வெளிநாட்டு வேலை வாய்ப்பு முகவர்களாகவும் செயற்படுவது சிறந்ததல்ல என ஹஜ் குழு கருதுவதாக அமைச்சர் ஹலீமின் பிரத்தியேக செயலாளரும், ஹஜ்குழு உறுப்பினருமான எம்.எச்.எம்.பாஹிம் தெரிவித்தார்.

இதேவேளை, முஸ்லிம் சமய கலாசார பண்பாட்டலுவல்கள் திணைக்களத்திடமிருந்து ஹஜ் உம்ரா முகவர் நிலைய அனுமதிப்பத்திரத்தை மாத்திரம் பெற்றுள்ள முகவர் நிலையங்கள் பெண்களை வெளிநாட்டு வேலைவாய்ப்புகளுக்காக அனுப்பினால் வெளிநாட்டு வேலைவாய்ப்பு பணியகமே அவர்களுக்கு எதிராக நடவடிக்கை எடுக்க வேண்டும்.

முஸ்லிம் சமய மற்றும் தபால் அமைச்சினால் நடவடிக்கை எடுக்க முடியாது எனவும் அவர் தெரிவித்தார்.

அண்மையில் வெளிநாட்டு வேலைவாய்ப்பு பணியக அதிகாரிகளால் கைது செய்யப்பட்ட ஹஜ் உம்ரா முகவர் தொடர்பில் வினவியபோதே அவர் இவ்வாறு தெரிவித்தார். அவர் தொடர்ந்தும் கருத்து தெரிவிக்கையில்,

சில ஹஜ் உம்ரா முகவர்கள், வெளிநாட்டு வேலை வாய்ப்பு பணியகத்தில் தம்மைப் பதிவு செய்து கொண்டு அதற்கான அனுமதிப்பத்திரத்தைப் பெற்று வெளிநாட்டுக்கு தொழிலாளர்களை அனுப்புகிறார்கள். இவர்களுக்கு எதிராக நடவடிக்கை எடுக்க முடியாது.

ஹஜ், உம்ரா முகவர்களாகப் பதிவு செய்து கொண்டுள்ளவர்கள் வெளிநாட்டு வேலை வாய்ப்பு முகவர்களாகவும் செயற்படுவது சிறந்ததல்ல என்றே ஹஜ் குழு கருதுகிறது. இந்த விவகாரத்தை எவ்வாறு கையாள்வது என்பது குறித்து கடந்த காலங்களில் பேச்சுவார்த்தை நடாத்தப்பட்டுள்ளது. இது பற்றி தொடர்ந்து ஆராய்ந்து வருகிறது இது ஒரு சட்டப்பிரச்சினையாகும் என்றார்.

இதேவேளை ஹஜ், உம்ரா முகவர் நிலைய அனுமதிப்பத்திரத்தை மாத்திரம் பெற்றுள்ள மருதானையைச் சேர்ந்த முகவர் ஒருவர் வெளிநாட்டுக்கு பெண்களை பணிப்பெண்ணாக அனுப்ப முயற்சித்த போது வெளிநாட்டு வேலைவாய்ப்பு பணியக விஷேட விசாரணைப் பிரிவினரால் கைது செய்யப்பட்டு விசாரணைகள் முன்னெடுக்கப்பட்டு வருகின்றன.

இவ்வாறான மோசடிகளில் ஈடுபடும் முகவர்கள் தொடர்பில் எதிர்காலத்தில் கடும் நடவடிக்கை எடுக்கப்படும் என வெளிநாட்டு வேலைவாய்ப்பு அமைச்சர் தலதா அத்துகோரள தெரிவித்துள்ளார்.