ஸ்டோக்ஸூக்கும், இங்கிலாந்துக்கும் வருத்தம் தெரிவித்துக் கொள்கிறேன் - பிராத்வெய்ட்

டி20 உலகக்கிண்ண தொடரின் இறுதிப் போட்டியில் பென் ஸ்டோக்ஸை வெளுத்து வாங்கிவிட்டு அவரை புகழ்ந்து தள்ளியுள்ளார் பிராத்வெய்ட்.

கடைசி ஓவரில் வெற்றிக்கு 19 ஓட்டங்கள் தேவை என்ற நிலையில் பென் ஸ்டோக்ஸ் வீசிய அந்த ஓவரில் 4 சிக்சர்கள் பறக்க விட்டு மேற்கிந்திய தீவுகள் அணிக்கு 2வது முறையாக கிண்ணம் வென்று கொடுத்தார் பிராத்வெய்ட்.

கடைசி ஓவரில் இவரது அதிரடியால் இங்கிலாந்தின் உலகக்கிண்ண கனவு சின்னாபின்னமானது. அதேபோல் பென் ஸ்டோக்ஸும் உடைந்து போய்விட்டார்.

இந்நிலையில் பென் ஸ்டோக்ஸூக்காக வருத்தப்படுவதாக தெரிவித்த பிராத்வெய்ட் கூறுகையில், ”உண்மையில் பென் ஸ்டோக்ஸ் ஒரு ஜாம்பவான். கடைசி 2 மாதங்களாக அவர் இங்கிலாந்துக்கு செய்ததை மறந்துவிடக் கூடாது.

கிரிக்கெட் என்பது ஒரு தயவற்ற விளையாட்டு. இதில் தான் அனைவரும் இருக்கின்றனர்.

ஸ்டூவர்ட் பிராட் ஓவரில் யுவராஜ் சிங் 6 சிக்சர்களை விளாசியதை நினைவுப்படுத்தி பாருங்கள். ஆனால் பிராட் தற்போது நல்ல உச்சத்திலே தான் இருக்கிறார்.

ஸ்டோக்ஸூக்கு அந்த இரவு கடினமானதாக இருந்தது. அவருக்கும் இங்கிலாந்து அணிக்கும் வருத்தம் தெரிவித்துக் கொள்கிறேன்.

மேலும், பென் ஸ்டோக்ஸ் நீண்ட காலம் இங்கிலாந்து அணிக்கு விளையாட ஆசைப்படுகிறேன்” என்று வாழ்த்தியுள்ளார்.