சிங்கள சகோதரரின் துஆ - பிழையான முன்மாதிரியும், முரண்பாடும்

 -சுவைவர் மீரான்-

பஸ்ஸில் தனது மொபைல் போனை கள்வனிடம் பறிகொடுத்த சிங்களவர் ஒருவருக்கு ஹாஜியார் ஒருவர் ஒரு துஆவை கற்றுக்கொடுக்க, அந்த மொபைல் போன் அவரது வீட்டையே சென்றடைந்ததாக சொல்லப்படும் ஒரு சம்பவம் பிரசுரமாகி, பலத்தை விமர்சனங்களையும் எதிர்கொண்டது.

அதனைத் தொடர்ந்து கட்டுரையாசிரியர் தன் சார்பு விளக்கத்தை வழங்கி, அதுவும் பிரசுரமாகி உள்ளது.

இந்த சம்பவம் உண்மையில் இஸ்லாமிய வழிகாட்டல்கள், போதனைகளுக்கு முரணாக இருப்பதால், இது ஒரு பிழையான முன்மாதிரியாக முஸ்லிம்கள் மத்தியில் ஏற்றுக் கொள்ளப்பட்டு விடக்கூடாது என்பதால் அது குறித்த சிறு விளக்கத்தை மட்டும் வழங்க விரும்புகின்றேன்.

1. உள்ளே நின்றுகொண்டு இருந்த பயணி ஒருவரின் பொக்கட்டுக்குள் கையை விடுவதை கண்டு ஹாஜியார் சைகையால் எச்சரித்தார், பின்னர் அவன் திடீர் என்று இறங்கி ஓடும் பொழுது அமைதியாக இருந்தார்.

இது தவறான ஒரு முன்மாதிரி ஆகும், ஒருவன் நீரில் மூழ்கும்வரை கரையில் சும்மா நின்றுவிட்டு, மையத்தை வைத்துக்கொண்டு துஆ ஓதுவதற்கு இஸ்லாம் கற்றுத்தரவில்லை. ஹாஜியார் என்றால், நிச்சயமாக ஒரு ஆண், ஆகவே திருடன் பொக்கட்டுக்குள் கையை விட்ட பொழுதே அவர் சத்தமாக கத்தி இருக்க வேண்டும். அவன் திடிரென இறங்கி ஓடும் பொழுதாவது பயணிகளை எச்சரித்து இருக்க வேண்டும். ஒரு முஸ்லிம் ஒருபொழுதும் இப்படி இருக்கக் கூடாது.

உடனேயே தடுக்க சந்தர்ப்பம் இருந்தும், தவற விட்டுவிட்டு, பஸ் போனபிறகு கைகாட்ட (துஆ ஓத) நபி (ஸல்) அவர்கள் ஒரு பொழுதும் கற்றுத்தரவில்லை. முஸ்லிம் விவேகமானவனாகவும், எச்சரிக்கை உணர்வுள்ளவனாகவும் இருக்க வேண்டும்.

2. ஹதீஸ் - பிழையான புரிதல்

முஸ்லிம் கிரந்தத்தில் ஸஹிஹ் தரத்திலும், இன்னும் பல கிரந்தங்களிலும் பதிவாகியுள்ள குறித்த ஹதீஸ், அபூ சலமா (ரலி) அவர்கள் மரணித்த சந்தர்ப்பத்தில், நபி (ஸல்) அவர்கள் அபூ சலமாவின் மனைவி உம்மு சலமா (ரலி) குறித்து ஓதியதாகும். அந்த ஹதீசிலேயே தெளிவாக ஒரு சொல் பயன்படுத்தப் பட்டு உள்ளது, مَا مِنْ مُسْلِمٍ என்பதே அதுவாகும். "யாராவது ஒரு முஸ்லிம்" என்று நபி (ஸல்) அவர்கள் தெளிவாக குறிப்பிடுகின்றார்கள். முஸ்லிமல்லாத, அல்லாஹ்வை ஏற்றுக்கொள்ளாத ஒருவரின் துஆ  ஏற்றுக்கொள்ளப்படும் என்று இஸ்லாம் எத்தகைய உறுதியையும் வழங்கவில்லை, அது மட்டுமின்றி முஸ்லிமல்லாத ஒருவருக்காக பாவமன்னிப்பு / பிரார்த்தனை புரிவதை இறைவன் தடை செய்து இருக்கின்றான்.


3. துஆ - பிழையான அர்த்தப்படுத்தல்

انا لله وانا اليه راجعون؛ اللهم اجرني في مصيبتي واخلفلي خيرا منها என்கின்ற இந்த துஆ கூட, காணாமல் போன, இழந்த பொருளை மீண்டும் தரும்படி கேட்கவில்லை. மாறாக என்றுதான் خلفلي خيرا منها அமைந்துள்ளது, அதாவது, இழந்ததை (பொருள் / நபர்  / அறிவு / சந்தர்ப்பம் ) விட சிறந்ததை தரும்படி கேட்பதாகவே அமைந்துள்ளது. இதன் அடிப்படையிலேயே, அபூ சலமா (ரலி) அவர்களின் விதவை மனைவி உம்மு சலமா (ரலி) அவர்களுக்கு அல்லாஹ் உலகத்திலேயே சிறந்த மனிதரான முகம்மது நபி (ஸல்) அவர்களை கணவனாக வழங்கினான்.

இந்த வகையிலும் குறித்த சம்பவம், இந்த துஆவுடன் பொருந்திப் போகவில்லை.

4. தரவுகளின் உறுதியற்ற தன்மை

பள்ளி மிம்பருக்குப் பக்கத்தில் நின்று ஹாஜியார் சொன்னார் என்பதாகவே மூல ஆக்கம் குறிப்பிடுகின்றது. இரண்டாவது ஆக்கத்தில், விமர்சனங்களுக்குப் பதிலாக, தான் கேட்டதை நிரூபிக்க ( மிம்பர் ) இடத்தை ஆதாரமாக குறிப்பிட்டதாக கட்டுரையாசிரியர் குறிப்பிடுகின்றார்.

இது உண்மையிலேயே மிகவும் பலவீனமான வாதம் ஆகும். நாடு முழுவதும் பள்ளிவாசல்களும், மிம்பர்களும் உள்ள நிலையில், குறித்த ஆக்கங்கள் எவ்வித ஆதாரத்தையும் வழங்கவில்லை. குறைந்த பட்சம், எந்த ஊர், எந்தப் பள்ளிவாசல், யார் அந்த ஹாஜியார் போன்ற எந்த விபரங்களையும் வழங்காமல், எதனையும் கேள்வியும் கேட்கக் கூடாது என்று எதிர்பார்ப்பது, மலையேறிப் போன காலத்தின் பழமையான ஒருவித மனநிலையே.

5. இறுதியாக, நிகழ்வுக்கான சாத்தியங்கள்.

மேற்படி ஒரு சம்பவம் நடந்திருக்குமா என்றால், அதற்கான சாத்தியங்கள் அறவே இல்லை என்று முற்றாக மறுப்பதற்கில்லை. ஏனெனில் , "காணாமல் போன வைரக்கல் திருமண மோதிரம், 14 வருடங்களின் பின்னர் மீனின் வயிற்றில் இருந்து கண்டுபிடிக்கப் பட்டது" என்றெல்லாம் செய்திகளை, புகைப்படங்களுடன் வாசித்து இருக்கின்றோம். ஆகவே, இதனை அந்த வகையில் வேண்டுமானால் அனுகிவிட்டுப் போகலாமே தவிர, அதல்லாமல் இந்த விடயத்திற்கு துஆவையும், ஹதீசையும் பொருத்துவது பிழையான முன்மாதிரி ஆகும். ஏனெனில் ஹாஜியார் முதலில் விட்ட தவறில் இருந்து, ஹதீஸின் பொருத்தமற்ற தன்மை, துஆவின் பொருத்தமற்ற தன்மை என்று நிறையவே உள்ளன.