SLMC யின் யாப்பு குர்ஆன், ஹதீஸுக்கு அமைவானதா..? றிஸ்வி முப்தியிடம் விளக்கம்கேட்டு கடிதம்

தற்போது நடைமுறையிலுள்ள ஸ்ரீலங்கா முஸ்லிம் காங்கிரஸின் யாப்பானது குர்ஆன், ஹதீஸ், மஷூரா எனும் சன்மார்க்கம் சார்ந்த வழிகாட்டல்களுக்கு அமைவாக உள்ளதா என பகுப்பாய்ந்து ஆலோசனை வழங்குமாறு ஸ்ரீ லங்கா முஸ்லிம் காங்கிரஸின் அரசியல் உயர்பீட உறுப்பினர் பதவியிலிருந்து இடை நிறுத்தம் செய்யப்பட்டுள்ள மௌலவிகள் இருவரும் அகில இலங்கை ஜம்இயத்துல் உலமா சபைத் தலைவர் அஷ்ஷெய்க் எம்.ஐ.எம். ரிஸ்வி முப்தியிடம் கடிதமூலம் கோரிக்கை விடுத்துள்ளார்கள்.

இடைநிறுத்தி வைக்கப்பட்டுள்ள ஸ்ரீ லங்கா முஸ்லிம் காங்கிரஸின் அரசியல் உயர்பீட உறுப்பினர்களான மௌலவி ஏ.எல்.எம். கலீல் மற்றும் மௌலவி எச்.எம்.எம். இல்லியாஸ் ஆகிய இருவரும் கையொப்பமிட்டு உலமா சபைத்தலைவருக்கு கடந்த 23 ஆம் திகதி பதிவுத்தபால் மூலம் கடிதத்தை அனுப்பி வைத்துள்ளார்கள்.

ஸ்ரீ லங்கா முஸ்லிம் காங்கிரஸின் யாப்பில் மஷுரா கோட்பாட்டினை வலுப்படுத்துவதற்காகத் தேவையான இடங்களில் நிரந்தரமான மஷுரா உப குழுக்கள் அமைய வேண்டுமா என்பது பற்றியும் அப்படியாயின் எவ்வாறான பொருத்தமான அத்தியாயங்களில் அவற்றை அமைக்கலாம் என்று வழிகாட்டும் படியும் மௌலவிகள் இருவரும் உலமா சபையை வேண்டியுள்ளார்கள்.

முஸ்லிம் காங்கிரஸின் யாப்பின் (3.1), (3.3.A, B, C), (7.3), (8.3 C), (8.9), (8.9 K), (9 D), (11.B) ஆகிய அத்தியாயங்களில் விசேட கவனம் செலுத்தும் படியும் யாப்பில் குறிப்பிடப்பட்டுள்ள ஒழுக்க நெறிக் கோவையின் சில பிரிவுகளிலும் (4.1 D, 5. 1 B, 5. 1 D)  கவனம் செலுத்தும் படியும் கோரப்பட்டுள்ளது. ஒழுக்க நெறிக் கோவையின் பிரதியொன்றும் உலமா சபையின் பரிசீலனைக்காக அனுப்பி வைக்கப்பட்டுள்ளது.

ஸ்ரீ லங்கா முஸ்லிம் காங்கிரஸ் கட்சியின் யாப்பின் பிரகாரம் அக்கட்சியின் செயற்பாடுகள் அனைத்தும் குர்ஆன், ஹதீஸ் ஆகியவற்றின் வழிகாட்டலில் நடைமுறைப்படுத்தப்பட வேண்டும் என்றும் கட்சியில் எடுக்கப்படும் தீர்மானங்கள் அனைத்தும் மஷுரா கோட்பாட்டுக்கு அமைவாக இருக்க வேண்டும் என்றும் குறிப்பிடப்பட்டுள்ளது என்பதும் உலமா சபையிடம் சுட்டிக்காட்டப்பட்டுள்ளது.

நாங்கள் இருவரும் கட்சியின் தலைவருக்கு எதிராக சதி முயற்சியில் ஈடுபடும் நோக்குடன் தலைவரை மாற்றுவதற்கான பொது மகஜரொன்றில் கையொப்பமிட்டதாக பகிரங்கமாக ஊடகங்களில் குற்றம் சுமத்தப்பட்டுள்ளது. இது அபாண்டமான குற்றச்சாட்டாகும். இந்த குற்றச்சாட்டுக்கும் எமக்கும் எவ்விதமான சம்பந்தமும் இல்லை என்று கடிதத்தில் தெரிவிக்கப்பட்டுள்ளது.

குறிப்பிட்ட மகஜரின் பிரதியொன்றும் உலமா சபையின் தலைவருக்கு அனுப்பி வைக்கப்பட்டுள்ளதுடன் அம் மகஜரில் சதி முயற்சியில் ஈடுபட்டதற்கான ஆதாரங்கள் எதுவும் இருக்கின்றதா என்பதை ஆராய்ந்து தெளிவுபடுத்துமாறும் உலமா சபையிடம் கோரிக்கை விடுக்கப்பட்டுள்ளது.

கட்சியின் யாப்பும் ஒழுக்க நெறிக்கோவையும் மற்றும் மகஜரின் பிரதிகளும் அனுப்பி வைக்கப்பட்டுள்ளது.

உலமா சபையின் ஆலோசனைகள் கோரப்பட்டுள்ளதுடன் இது தொடர்பில் உதவிகள் செய்யுமாறும் கடிதத்தில் வேண்டப்பட்டுள்ளது.

முஸ்லிம் காங்கிரஸின் அரசியல் உயர்பீட உறுப்பினர்களான மௌலவி ஏ.எல்.எம். கலீல், ஸ்ரீ லங்கா முஸ்லிம் காங்கிரஸின் மஜ்லிஸ் ஏ. ஷுராவின் தலைவராக பதவி வகிப்பவராவார். இதேவேளை மௌலவி எச்.எம்.எம். இல்யாஸ் ஸ்ரீ லங்கா முஸ்லிம் காங்கிரஸின் உலமா பிரதிநிதியாவார்.

இதேவேளை, ஸ்ரீலங்கா முஸ்லிம் காங்கிரஸின் அரசியல் உயர்பீட உறுப்பினர் பதவியிலிருந்து இடை நிறுத்தி வைக்கப்பட்டுள்ள அகில இலங்கை ஜம்இய்யத்துல் உலமா சபையின் மௌலவிகள் இருவரும் அக்கட்சியின் யாப்பு தொடர்பாக உலமா சபையின் ஆலோசனைகள் கோரியுள்ளது பற்றி நிர்வாக சபைக் கூட்டத்தில் ஆராயப்படும். 

உலமா சபையில்  ஒவ்வோர் துறைக்கும் தனித்தனியான வெவ்வேறு பிரிவு இயங்கி வருகிறது. அப்பிரிவுகளில் இவ்விவகாரம் எந்தப் பிரிவினைச் சேர்ந்ததோ அப்பிரிவு இது பற்றி தீர்மானம் மேற்கொள்ளும் என அகில இலங்கை ஜம்இய்யத்துல் உலமா சபையின் தலைவர் அஷ்ஷெய்க் எம்.ஐ.எம்.ரிஸ்வி முப்தியும் பொதுச் செயலாளர் அஷ்ஷெய்க் எம்.எம்.ஏ. முபாரக்கும் ‘விடிவெள்ளி’ க்குத்து தெரிவித்தனர். 

அகில இலங்கை ஜம்இய்யத்துல் உலமா சபை அரசியலில் ஈடுபடாத ஒரு அமைப்பு என்பது குறிப்பிடத்தக்கது.  -ARA.Fareel-