'சுவன நன்மராயம் கூறப்பட்ட' ஜமாத்து வெறியர்களுக்கு பகிரங்கமடல்

Assalaamu alaikum

சமீபத்தில் பிரபல Jaffna Muslim வெப்தளத்தில் சகோதரர் ஒருவர் எழுதிய கட்டுரை ஒன்றை பார்க்க நேர்ந்த போது, அதன் அடியில் கொடுக்கப்பட்டிருந்த 'கொமண்டுகள் ' என்னை அதிர்ச்சியூட்டின .

ஒரு சகோதரனை எவ்வளவு அவதூறு கூற முடியுமோ அவ்வளவு அவதூறு கூறி விமர்சிக்கப்பட்டிருந்தது .அவர் எழுதி  இருந்தது எல்லாம் அமெரிக்க  சார்பான சவூதி அரேபிய அரசாங்கத்தை விமர்சித்து இருந்தமை மட்டும்தான்...

உம்மா எங்கே செல்கிறது .. ?

சரித்திரத்தில் சகோதரத்துவத்தின்  சிகரங்களாக இருந்த நாம் அழுக்கடைக்குள் விழுந்து விட்டோமா ?

தன்னையே இறைவன் என்று கூறிக்கொண்டிருந்த பிர் அவுனிடம் மூஸா நபி ( அலை ) அவர்களை அனுப்பிய அல்லாஹ் ,பண்பான வார்த்தைகளை பயன் படுத்துமாறு கேட்டான் . ஒரே கலிமாவை சொன்ன  உடன் பிறவா சகோதரன் தன் கொள்கையில் இல்லை என்பதற்காக கடும் வார்த்தைகளால் திட்டித்தீர்க்கப்படுகிறான் . சமுக வலைத்தளங்களில் வாக்குவாதங்களின் போது பிரயோகிக்கப்படும் வார்த்தைகள், கீழ் தரத்தை விட மோசமானதாக இருக்கின்றன .

சவூதியில் நிலவும் கொடுங்கோல்  மன்னர் ஆட்சிக்கு எதிராக எழுதினால் அல்லது பேசினால் கிடைக்கும் பட்டம் ஷியா ஆதரவான அல்லது ஷியா பணம் கொடுக்கப்பட்ட எழுத்தாளன் என்பதுதான் ..

அல்லது சமூகத்தின் சமதானம் பற்றி பேசினால் கிடைக்கும் பட்டம் கபுறு மூட்டி    என்பதுதான்..

மேற்குறிப்பிட்ட  இரு கூட்டமும் இல்லாத நிலையில் இருப்பவர்களை அவ்வாறு விமர்சிக்கும் பட்சத்தில்  ஒருவரைப் பற்றி அவதூறு கூறும்  கூலியை நீங்கள் மறுமையில் பெற்றுக்கொள்வீர்கள் என்பதை மறந்து விடாதீர்கள் .

நம்மில் யாரும் சொர்க்கத்துக்கு நன்மராயம் கூறப்பட்டவர்கள் கிடையாது .முஸ்லீம்களாக வாழும்  நமது முடிவுகள் நமது கைகளில் இல்லை . வாழ்க்கை முழுவதும் காபிராக வாழ்ந்தவர் கடைசி   நேரத்தில்
கலிமாவுடன் மரணிப்பதையும் , வாழ்க்கை முழுவதும் முஸ்லீமாக வாழுபவர் , கடைசி   நேரத்தில்
கலிமா சொல்ல முடியாமல் சில வேளை இறைமறுப்புடன் மரணிப்பதையும் நம் முன்னே கண்டு கொண்டிருக்கிறோம்.

நபிகள் நாயகம் ( ஸல் ) அவர்கள் கூறினார்கள் "உங்களில் ஒருவர் தனது ஆயுள் முழுவதும் சொர்க்கத்தில் உள்ளவர்களின் நன்மைகளை செய்வார். இறுதியில் நரகத்தில் உள்ளவர்களின் தீமையை செய்து நரகத்துக்கு சென்று விடுவார் . அதே போல  ஒருவர் தனது ஆயுள் முழுவதும் நரகத்தில்  உள்ளவர்களின் தீமைகளை  செய்வார். இறுதியில் சொர்க்கத்தில்  உள்ளவர்களின் நன்மையை  செய்து சொரக்கத்துக்கு  சென்று விடுவார் "

யார் நேரான வழியில் இருக்கிறோம் என்பது அளவற்ற அருளாளன் அல்லாஹ்வை தவிர யாருக்கும் தெரியாது .அதனால்தான் ஒவ்வொரு தொழுகையிலும் இஹ்தினஸ் ஸிராத்தல் முஸ்தகீன் ( எங்களை நேரான வழியில் நடத்துவாயாக )என தினமும் கேட்கிறோம்.

நீங்கள் நேரான வழியில் இருப்பது உங்களுக்கு உறுதியாக தெரிந்தால் ஏன் தினமும் தொழுகைகளில் ஓதும் சூரத்துல் பாத்திஹாவில் இந்த வசனத்தை ஓதுகிறீர்கள் ?

யாருமே மலக்குகள் இல்லை நானும் சரி வெவ்வேறு  ஜமாத்துகளில் உள்ள நீங்களும் சரிதான். அறிந்தோ அறியாமலோ பாவங்கள் செய்யக்கூடியவர்களே .சில விடயங்களில் சரியான கொள்கையில் இருக்கும் நாம் வேறு சில விடயங்களுக்கு முக்கியத்துவம் கொடுக்க தவறி விடுகிறோம். தவறிய அதே விடயங்களுக்கு இன்னொரு கூட்டத்தார் முக்கியத்துவம் கொடுத்து வருகிறார்கள் .இதை வைத்து ஒவ்வொரு கூட்டத்தாரையும் அல்லது  ஜமாத்தையும் காபிர்கள் என்று கூறும் அளவுக்கு சென்று விடுகிறார்கள் .

ஒவ்வொரு கூட்டத்தாரும் தாம் செய்யும் நன்மைகளில் திருப்தி காணும் அதே வேளை தாம் கோட்டை விடும் தவறுகளை உணரத்தவறி விடுகிறார்கள்

'லா இலாஹ இல்லலாஹ்' என்று கலிமா  மொழிந்த யாரையும் காபிர்கள் என்று பட்டம் கொடுத்து நீங்கள் காபிர்களாக ஆகி விட வேண்டாம் . தீர்ப்பளிக்கும் அல்லாஹ்வின் கடமையை நீங்கள் எடுத்துக்கொள்ளாதீர்கள் .

மார்க்க அறிஞர்களே ,மார்க்க இமாம்களே சர்வதேச விவகாரங்கள் 

 பற்றி பூரண அறிவு இல்லாமல் உத்தேசத்திலும் கற்பனைகளிலும் உங்கள் கருத்துக்களைஅமைத்துக்
கொள்ளாதீர்கள் . யாரையும் யாருடைய அடிவருடிகள் , காபிர்கள் , வழிகெட்டவர்கள் என்று பட்டம் கொடுத்து அல்லாஹ்வின் பண்பை நீங்கள் எடுத்துக்கொள்ள வேண்டாம் .

உங்களால் போதிக்கப்படும் பிரசாரங்கள் தவறானவையாக இருக்கும் பட்சத்தில் அது ஏற்படுத்தும் பாதகமான சமுக மாற்றங்கள், சமுக போக்குகள் , ஆகியவற்றுக்கு நீங்கள் தான் பொறுப்பாளிகள் ஆக இருப்பீர்கள். பரம்பரை பரம்பரையாக நிலவும் அந்த தவறான கொள்கைக்கும் ,மன நிலைக்கும்  பொறுப்பாளிகள் ஆக வேண்டிய நிலைக்கும்  ஆளாவீர்கள் .   அதற்கு அல்லாஹ்விடம் பதில் கூற வேண்டிய நிலைக்கும்  ஆளாவீர்கள் .  அது செய்யும் பாவத்துக்கும் உங்கள் கபுரு குழிகளில் பாவங்கள் எழுதப்பட்டுக்கொண்டே இருக்கும்.

அதனால் தான் அப்துல்லாஹ் இப்னு மாஸ் ஊத் (ரலி ) அவர்கள் கூறுகிறார்கள் :-
"நீங்கள் யாரையேனும் பின்பற்ற விரும்பினால் உங்களிடையே உயிரோடு உள்ளவர்களை பின்பாற்றாதீர்கள். இறந்தவர்களை  பின்பற்றுங்கள் .அந்த இறந்தவர்கள் யாரென்றால் நபிகள் நாயகம் ( ஸல் ) அவர்களும் அவர்களுடைய தோழர்களான ஸஹாப்பாக்களும் ஆவர் . ஏனினில் இறந்த  அவர்கள் வெற்றியை தழுவியதாக அல்லாஹ்வினாலும் ரஷூலினாலும் உறுதிப் படுத்தப்பட்டவர்கள் . உயிரோடு உள்ளவர்கள்  தோல்வியை தழுவ கூடும்.
அவர்களின் முடிவு நமக்கு தெரியாது ."

இனியேனும் நரம்பு இல்லாத நாக்குகளாலும் ,வரம்பு இல்லாத எழுத்துக்களாலும் மற்றவர்கள் மீது  அவதூறு கூறுவதில் இருந்தும் , மற்றவர்களை கீழாக எண்ணுவதில் இருந்தும் விலகி இருப்போமாக ..

-முஹம்மது ராஜி-