சிலர் குழப்பம் ஏற்படுத்த முயற்சி - ரவூப் ஹக்கீம்

கட்சியின் செயற்பாடு தொடர்பில் கட்சிக்குள் கலந்துரையாடாமல் வெளியில் இருந்துகொண்டு அறிக்கைவிடுவதோ அல்லது தலைமைத்துவத்துக்கு எதிராகக் கருத்துக் கூறுவதிலோ எந்தவித பலனும் இல்லையென சிறிலங்கா முஸ்லிம் காங்கிரசின் தலைவரும், நகரத் திட்டமிடல் மற்றும் நீர் வழங்கல் அமைச்சருமான ரவூப் ஹக்கீம் தெரிவித்தார்.

முஸ்லிம் காங்கிரசின் மாநாட்டில் கலந்துகொள்ளாதவர்களுக்கு எதிராக ஒழுக்காற்று நடவடிக்கை எடுப்பதா என்பதை தேவைப்பட்டால் கட்சி கூடி தீர்மானிக்கும் என்றும் அவர் கூறினார். அரசாங்கத் தகவல் திணைக்களத்தில் நேற்று(21)நடைபெற்ற ஊடகவியலாளர் சந்திப்பில் அண்மையில் நடைபெற்ற மு.கவின் தேசிய மாநாட்டில் அக்கட்சியின் செயலாளர் கலந்துகொள்ளாமை குறித்து அமைச்சரிடம் வினவப்பட்டது. இதற்குப் பதிலளிக்கும்போதே அமைச்சரும் மு.கவின் தலைவருமான ரவூப் ஹக்கீம் மேற்கண்டவாறு கூறினார்.மேலும் இது பற்றிக்கூறிய அவர்:

பிரச்சினை இல்லாத கட்சி எதுவும் இல்லை. கட்சிகளுக்குள் கருத்து முரண்பாடுகள் ஏற்படுவது சாதாரணமானது. கட்சியின் செயற்பாடு தொடர்பில் உடன்பாடில்லாவிட்டால் அதனை கட்சிக்குள் பேசித் தீர்க்கவேண்டும். அதனைவிடுத்து வெளியில் இருந்துகொண்டு அறிக்கை வெளியிடுவதும், தலைமைத்துவத்தை விமர்சிப்பதும் எந்தவித பலனையும் கொடுக்காது. அவ்வாறானவர்கள் தொடர்பில் தேவைப்பட்டால் கட்சி கூடி தீர்மானம் எடுக்கும் என்றார்.

மு.கா மாநாட்டில் முஸ்லிம்களின் கலாசாரத்துக்கு மாறான முறையில் நிகழ்ச்சிகள் நடத்தப்பட்டதாக முன்வைக்கப்படும் விமர்சனம் தொடர்பில் ஊடகவியலாளர் ஒருவர் எழுப்பிய கேள்விக்குப் பதிலளித்த அமைச்சர்,

சகல இனங்களின் கலாசாரத்துக்கும் மதிப்பளிப்பதன் ஊடாகவே இனங்களுக்கிடையில் நல்லிணக்கத்தை ஏற்படுத்த முடியும். மு.கா மாநாட்டிற்கு அழைக்கப்பட்டிருந்த ஆதிவாசிகள், தமது கலாசார வழக்கத்தின் படி கந்தக் கடவுளை வணங்கி நாட்டுத் தலைவருக்கு தேன் முட்டியைக் கொடுத்து வரவேற்பது வழமை. இதனை முன்னிட்டு தமது வரவேற்பு நடனத்தை நடாத்துவதற்கு அனுமதி கோரியிருந்தனர்.

எமது மதத்தில் அவ்வாறான கலாசாரம் இல்லாதபோதும் பிறிதொரு இனத்தின் கலாசாரத்துக்கு மதிப்பளித்து அதற்கு இடமளித்தோம். இதில் என்ன பிழை இருக்கிறது. இதை வைத்து முஸ்லிம் கலாசாரத்துக்கு எதிராக செயற்பட்டதாக சிலர் குழப்பம் ஏற்படுத்த முயற்சிப்பதாகவும் அவர் கூறினார்.

அதேவேளை, மஹிந்த ராஜபக்‌ஷ நிர்வாகத்தில் தமது இனத்துக்கு எதிரான நடவடிக்கைகள் அதிகரித்திருந்த நிலையிலேயே அப்போதைய அரசாங்கத்திலிருந்து விலகவேண்டி ஏற்பட்டதாகக் குறிப்பிட்ட அமைச்சர் ரவூப் ஹக்கீம், யுத்தம் முடிவடைந்த பின்னர் மீண்டும் பல யுத்தங்கள் ஏற்படுத்தப்பட்டு நல்லிணக்கத்துக்கான சூழல் இல்லாமல் செய்யப்பட்டது. எனினும், ஜனாதிபதி மைத்திரிபால சிறிசேன மற்றும் பிரதமர் ரணில் விக்ரமசிங்க ஆகியோர் தலைமையிலான அரசாங்கத்தில் நல்லிணக்கத்தைக் குழப்ப இடமளிக்கப்படாது என்றார்.