தவக்குல் கர்மானின் இலங்கை விஜயமும், தொடரும் சர்ச்சைகளும்..!

(இது பேஸ்புக்கிலிருந்து கிடைத்த ஒரு பகுதி)

சகோதரர் றஸ்மின் மிஸ்குக்கு,

செய்தியும் சிந்தனையும் என்ற வீடியோ பக்கத்தில் தவக்குல் கர்மான் பற்றிய உங்களது உரையைக் கேட்டேன். ஆற்றொழுகப் பேசும் ஆற்றலைத் தந்த அல்லாஹ்வைப் புகழ்கிறேன். நாம் பெற்றிருக்கின்ற ஆற்றல்கள் அருள்கள் என்பதைப் போல அவை அமானிதம் என்பதையும் ஞாபகப்படுத்த விரும்புகிறேன்.

மகன் செய்யும் காரியங்களுக்கு தந்தை பொறுப்பாளியாக முடியுமா? உங்களது தவறுகளுக்காக உங்கள் தந்தையை பலிக்கடாவாக்க முடியுமா?

தவக்குல் கர்மானின் இலங்கை விஜயத்தின் போது சில நிகழ்வுகள் ஜாமிஆ ஆஇஷா ஸித்தீக்காவினாலும் மற்றும் சில நிகழ்வுகள் அவரது வேறு தொடர்புகளினாலும் ஒழுங்கு செய்யப்பட்டிருந்தன.

நீங்களும் பொது மக்களும் விளங்கிக் கொள்ள வேண்டும் என்பதற்காக ஓர் உதாரணத்தைக் குறிப்பிடுகிறேன்.

உங்களது நிகாஹ் மஜ்லிஸுக்கு சில SLTJ சகோதரர்களை அழைக்கின்றீர்கள். உங்கள் அழைப்பை ஏற்று உங்கள் ஊருக்கு அவர்கள் வருகிறார்கள். உங்கள் வீட்டில் நடந்த விருந்துபசாரத்திலும் கலந்து கொண்டு விட்டு மீண்டும் ஊருக்குத் திரும்பும் இடைவழியில் இஸ்லாம் விரும்பாத சில காரியங்களில் ஈடுபடுகிறார்கள் என வைத்துக் கொள்ளுங்கள்.

(தயவுசெய்து எமது இயக்க சகோதரர்கள் எவரும் அவ்வாறு பாவம் செய்ய மாட்டார்கள், அவர்கள் மலக்குகள் என்றெல்லாம் கூறாதீர்கள். உதாரணத்திற்காகத் தான் குறிப்பிடுகிறேன்)

இவ்வாறான நிகழ்வுகள் நடந்தால் விருந்துக்கு அழைத்த நீங்கள் பொறுப்பா? அல்லது முறை தவறி செயற்பட்ட அவர்கள் பொறுப்பா? உங்களது அழைப்பை ஏற்று வந்த காரணத்தினால் தான் இவ்வாறெல்லாம் நடந்தது. எனவே இவற்றுக்கெல்லாம் நீங்கள் தான் பதில் சொல்லியாக வேண்டும் என உங்களை நோக்கி ஒருவர் பேசினால் அவரைப் பற்றி என்ன கூறுவீர்கள்?

இந்த விடயத்தை இன்னும் தெளிவாக விளக்க வேண்டுமானால்,

அல்குர்ஆன் சிங்கள மொழித் தர்ஜுமாவை கொழும்பில் வெளியிட்டு வைத்தீர்கள். நாட்டின் பல பாகங்களிலிருந்தும் உங்கள் அமைப்பின் அழைப்பை ஏற்று ஆண்களும் பெண்களும் வந்திருந்தனர்.

நிகழ்ச்சி முடிந்ததன் பின்னர் தமது ஊருக்குப் அவர்கள் பயணப்படுகின்றனர். பொதுப் போக்குவரத்தைப் பயன்படுத்தி வந்தவர்களில் சில பெண்கள் பஸ்ஸில் தனக்கு அஜ்னபிய்யான ஆணுக்குப் பக்கத்தில் இருந்து பயணித்தனர்.

இவ்வாறு இவர்கள் பயணித்ததால் மாநாட்டுக்கு அழைத்த SLTJ பொறுப்பாகுமா? அல்லது அப்பெண்களதும் அவர்களைக் கூட்டிவந்த ஆண்களினதும் மார்க்கம் பற்றிய அறியாமை காரணமா?

மேலுள்ள இரண்டு நிகழ்வுகளுக்கும் யார் காரணம்? அழைத்தவர்கள் காரணமா? அல்லது அழைக்கப்பட்டவர்களின் அசிரத்தையும் அறியாமையும் தான் காரணமா?

நிதானமாக யோசியுங்கள். குதர்க்கம் புரிய முயலாதீர்கள்.

இனி விடயத்துக்கு வருகிறேன்.

தவக்குல் கர்மான் இலங்கைக்கு வந்திறங்கியது முதல் அவர் நாட்டை விட்டு செல்லும் வரை அவரது எல்லா நிகழ்வுகளையும் ஜமாஅதே இஸ்லாமியும் ஆஇஷா ஸித்தீகாவுமே ஒழுங்குபடுத்தியதாகவே உங்களது உரையில் கூறியுள்ளீர்கள். மட்டுமல்ல அவர் வந்திறங்கும் போது கண்டி நடனத்துடன் அவரை வரவேற்றதையும் நிகழ்வுகளை அவரே குத்து விளக்கேற்றி ஆரம்பித்து வைத்ததையும் - கண்கள் இரண்டினாலும் நேரடியாகக் கண்ட சாட்சி போல - பேசியிருக்கிறீர்கள்.

உண்மையில் குறித்த நிகழ்வுகள் அனைத்தும் பட்டமளிப்பின் பின்னர் நடைபெற்ற நிகழ்வுகளாகும். ஒருபோதும் இந்நிகழ்வுகளை ஜமாஅதே இஸ்லாமியோ, ஆஇஷா ஸித்தீகாவோ நான் அறிந்த வகையில் ஒழுங்கு செய்யவில்லை.

தனிப்பட்ட சில நபர்களின் தொடர்பினால் ஒழுங்கு செய்யப்பட்ட நிகழ்வுகளில் தவக்குல் கர்மான் கலந்து கொண்டதற்கும் இஸ்லாம் விரும்பாத செயல்களை அவர் செய்ததற்கும் எந்த வகையில் ஜமாஅதே இஸ்லாமியும் ஆஇஷா ஸித்தீகாவும் பொறுப்பாக முடியும்?

உங்களது கூட்டத்தில் கலந்து கொண்டு விட்டு அஜ்னபியான ஆண்களோடு ஒன்றாக ஒரே சீட்டில் அமர்ந்து பயணித்த குறித்த பெண்களின் அறிவீனத்துக்காக SLTJ ஐ குறை சொல்வது நியாயமாகுமா?

ஒரு செய்தியை வெளியிட முன் அது தொடர்பாக ஆராய்வது ஒரு முஸ்லிமின் கடமையல்லவா? நபி ஸல்லல்லாஹு அலைஹி வஸல்லம் அவர்கள் சொன்ன செய்தியைக் கூட அக்கு வேறு ஆணி வேறு பிய்ந்தறிந்து பார்ப்பவர்கள் (கட்டாயம் அவ்வாறு பார்க்க வேண்டும்) ஏனைய மனிதர்கள் விடயத்தில் இவ்வாறு ஆராய்ந்து பார்க்க வேண்டாமா?

நபி ஸல்லல்லாஹு அலைஹி வஸல்லம் அவர்கள் சொல்லாத செய்தியைச் சொல்லபவர்களின் மறுமை நிலையை நன்கறிந்த நீங்கள்,

ஏனைய மனிதர்கள் விடயத்தில் தீர ஆராயாது வதந்திகளையும் அவதூறுகளையும் பரப்புபவர்களின் மறுமை நிலையை அறியவில்லையா?

-MZ Rizwanur Raheem-