காதி நீதிமன்றங்களுக்கு பெண்களை, நியமிக்குமாறு கோருபவர்களின் கவனத்திற்கு..!

-Safras Arham-

இந்நாட்டு முஸ்லிம்களுக்கு அல்லாஹ் வழங்கிய பேரருள்களில் ஒன்று முஸ்லிம்களுக்கான தனியான காழி நீதி மன்றங்கள் கிடைத்துள்ளதாகும். அவை ஆரம்ப காலம் முதல் சமீப காலம் வரை நேர்த்தியாகவும் ஒழுங்காகவும் இருந்து வந்ததை யாவரும் ஏற்றுக்கொள்வர். என்றாலும் பிற்காலத்தில் வழங்கப்பட்ட சில தீர்ப்புகளும், காழி நீதிமன்றங்களின் செயற்பாடுகளும் பலரையும் சிந்திக்கச் செய்துள்ளது என்பதை மறுப்பதற்கு இல்லை.

பெண்களால் செய்யப்படும் முறைப்பாடுகள் சரியாக பரசீலிக்கப்படாமையும், வழங்கப்படும் தீர்ப்புகள் பெண்களுக்கு பாதிப்பானதாக அமைந்து வருவதனாலும், இதனிடையே கைலஞ்சங்கள் தவறான தீர்ப்புகளுக்கு வழிகோருவதாக இருப்பதாலும் பெண் சமூகம் ஆண்காழிமார்கள் மீது வெறுப்புணர்வோடு எழுதுவதையும் பேசுவதையும் காணக் கூடியதாக உள்ளது. 

இந் நிலையில் நமது சமய சமூக விழுமியங்களை ஆராய்ந்து பார்ப்பது இன்றியமையாததாகும். இஸ்லாமிய வரலாற்றில் எங்குமே பெண்கள் காழிமார்களாக கடைமையாற்றியதாக வரலாற்றுப் பதிவுகளில் காணப்படவில்லை. அதேநேரம் தீர்ப்பு வழங்கும் போது கணவன்மார்களுக்கு துணையாக மனைவிமார்கள் இருந்துள்ளனர் என்பது காணக்கிடைக்கின்றது. அவ்வாறே ஒழுக்கசீலம் மிக்க எமது தாய்மார்கள் குடும்பப் பிரச்சினைகளை நீதிமன்றம் வரை சென்று தீர்வு பெறும் முயற்சியில் ஈடுபடாது, குடும்பத்தில் உள்ள மூத்தவர்கள், ஊரில் உள்ள பெரியவர்கள் மூலமே தீர்த்துக்கொண்டுள்ளனர் என்ற நற்செய்தியையும் ஊர்மக்கள் பேசிக் கொள்வதை பார்க்கின்றோம். இது இஸ்லாத்தின் அடிப்படையைச் சார்ந்ததாகும். அல்குர்ஆன் கூறும் பின்வரும் வசனம் இதற்கு சான்றாக உள்ளது. 

(கணவன்-மனைவி ஆகிய) அவ்விருவரிடையே (பிணக்குண்டாகி) பிரிவினை ஏற்பட்டுவிடும் என்று நீங்கள் அஞ்சினால். கணவனின் உறவினர்களிலிருந்து ஒருவரையும் மனைவியின் உறவினர்களிலிருந்து ஒருவரையும் மத்தியஸ்தர்களாக ஏற்படுத்துங்கள்; அவ்விருவரும் சமாதானத்தை விரும்பினால், அல்லாஹ் அவ்விருவரிடையே ஒற்றுமை ஏற்படும் படி செய்துவிடுவான் - நிச்சயமாக அல்லாஹ் நன்கு அறிபவனாகவும், நன்குணர்கிறவனாகவும் இருக்கின்றான். (அத்தியாயம்-04, வசனம்-35) 

இதன் அடிப்படையிலேயே முஸ்லிம் விவாகப்பதிவில் மணவாளன் மணப்பெண் போன்றோர்களின் சாட்சி பதிவதற்கென்று ஒரு இடம் ஒதுக்கப்பட்டுள்ளது குறிப்பிடத்தக்கதாகும். 

எனவே குடும்பப் பிரச்சிணைகள் எவ்வாறு தீர்கப்படல் வேண்டும் என்பதற்கு அல்குர்ஆனின் இந்த வழிகாட்டல் மிகவும் பொருத்தமானதாகும். அதேவேளை பெண்கள் காழியாக நியமனம் பெற்றால் அவர்களால் விசாரணைகளை ஆண்கள் போன்று நடாத்த முடியுமா என்பதும் கேள்விக்குரியதாகும்.
எனவே தலைவலிக்கு தலையணையை மாற்றுவதைவிட மருந்து செய்வதே ஆரோக்கியமாகும், காழிமார்களின் தீர்ப்பு திருப்தியானதாக இல்லாவிட்டால் அல்லது அவர்கள் மீது குற்றச்சாட்டுக்கள் காணப்பட்டால் அது பற்றி முறைப்பாடு செய்வதற்கு காழி உயர் நீதிமன்றம் இருப்பதனால் அதன் மூலம் மேலதிக நடவடிக்கைகள் எடுக்கலாம்.

ஷரீஅத் முறையில் தீர்ப்பு வழங்கவென ஏற்படுத்தப்பட்டுள்ள காழி நீதிமன்ற முறைமை அதனடிப்படையிலே நிகழ வேண்டும். அவ்வாறன்றி பெண் காழிமார்கள் நியமனத்தின் மூலம் தான் சரியான தீர்ப்பைப் பெறலாம் என்று எண்ணி அத்தகைய நியமன வேண்டுகோல்கள் விடுப்பது நமது சமூகக் கட்டமைப்புக்கு மாறுபட்ட ஒன்றாகத் தெரிகிறது.